ក្រសួងពាណិជ្ជកម្ម បានប្រាប់ទៅដល់សហគ្រាស ក្រុមហ៊ុនបរទេស អាជីវករ ដែលធ្វើអាជីវកម្មតាមប្រព័ន្ធអេឡិចត្រូនិក ឬអ្នករកស៊ីតាមអនឡាញ ឱ្យបានដឹងថា ក្រសួងបានពន្យារពេលការផាកពិន័យ ចំពោះការយឺតយ៉ាវលើការស្នើសុំលិខិតអនុញ្ញាត ឬអាជ្ញាបណ្ណពាណិជ្ជករ រហូតដល់ថ្ងៃទី៣ កក្កដា ឆ្នាំ២០២២ ។ 
 

ការសម្រេចពន្យាពេលនេះ ដោយសារមើលឃើញថា អាជីវករ សហគ្រាស ក្រុមហ៊ុន និងអ្នករកស៊ីតាមអនឡាញជាច្រើនលើសលប់ បានមកក្រសួងពាណិជ្ជកម្ម ដើម្បីដាក់ពាក់ស្នើសុំលិខិតអនុញ្ញាត ឬអាជ្ញាបណ្ណពាណិជ្ជកម្មតាមប្រព័ន្ធអេឡិចត្រូនិក ។ 
 

ដូច្នេះ អាជីវករ សហគ្រាស ក្រុមហ៊ុន និងអ្នករកស៊ីតាមអនឡាញ អាចទៅដាក់ពាក្យសុំលិខិតអនុញ្ញាត ឬអាជ្ញាបណ្ណពាណិជ្ជកម្មតាមប្រព័ន្ធអេឡិចត្រូនិក នៅនាយកដ្ឋានចុះបញ្ជីពាណិជ្ជកម្ម នៃអគ្គនាយកដ្ឋានសេវាពាណិជ្ជកម្ម ឬនៅមន្ទីរពាណិជ្ជកម្មខេត្ត និងសហគ្រាសឯកបុគ្គលនៅរៀងរាល់ម៉ោងធ្វើការ។ 
 

សូមជម្រាបថា ចំពោះអាជីវកម្មដែលធ្វើប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក ដោយមិនមានការអនុញ្ញាតពីក្រសួងពាណិជ្ជកម្មនោះ នឹងត្រូវទទួលការផាកពិន័យជាប្រាក់ និងអាចផ្តន្ទាទោស ដូចមានចែងក្នុងច្បាប់ ស្តីពីពាណិជ្ជកម្មតាមប្រព័ន្ធអេឡិចត្រូនិក៕