«ចំពោះទិសដៅនៃការពង្រឹងកិច្ចសហប្រតិបត្តិការក្នុងវិស័យយោធា លោកជំទាវ [ឯកអគ្គរដ្ឋទូតអ៊ីស្រាអែល] បានសម្តែងការគាំទ្រ និងបានបញ្ជាក់ថា កិច្ចប្រជុំនេះ គឺជាការបើកច្រកសម្រាប់ការសម្លឹងមើលឱកាសនៃការចាប់ផ្តើមកិច្ចសហប្រតិបត្តិការកងទ័ពរវាងប្រទេសទាំង២ នាពេលអនាគត»។ នេះជាសំណេរលើទំព័រហ្វេសប៊ុករបស់កងទ័ពជើងគោកកម្ពុជា។ 

 

ជាមួយគ្នានេះ អ្នកស្រី បានវាយតម្លៃខ្ពស់ចំពោះទំនាក់ទំនងមិត្តភាពដ៏ល្អរវាងកម្ពុជា-អ៊ីស្រាអែល ក្នុងរយៈពេលយូរឆ្នាំកន្លងមក ជាពិសេសកិច្ចសហប្រតិបត្តិការក្នុងវិស័យកសិកម្ម។ អ្នកស្រី លើកឡើងថា មាននិស្សិតកម្ពុជាជាច្រើន បានទៅសិក្សា និងហាត់ការក្នុងវិស័យកសិកម្ម នៅអ៊ីស្រាអែល។ ក្រៅពីនេះ អ្នកស្រី រំលេចពីវិស័យសក្តានុពលមួយចំនួនទៀតរវាងកម្ពុជា-អ៊ីស្រាលអែល ដូចជា ធនធានទឹក ថាមពល ការងារ និង បច្ចេកវិទ្យា ជាដើម។ 

 

រីឯលោក ហ៊ុន ម៉ាណែត បានរម្លឹកពីចំណងមិត្តភាពដ៏យូរលង់រវាងកម្ពុជា-អ៊ីស្រាអែល ដែលគិតចាប់តាំងពីការភ្ជាប់ទំនាក់ទំនងការទូតជាមួយគ្នាក្នុងឆ្នាំ១៩៦៧មក។ លោក ថ្លែងទៅកាន់អ្នកស្រី អរណា សាហ្គីវ ថា បច្ចុប្បន្ននេះ កម្ពុជា-អ៊ីស្រាអែល មានកិច្ចសហប្រតិបត្តិការល្អលើវិស័យសំខាន់ៗជាច្រើន រួមមាន ទេសចរណ៍ អប់រំ ហើយជាពិសេស វិស័យកសិកម្ម។ 

 

ទំព័រហ្វេសប៊ុករបស់កងទ័ពជើងគោកកម្ពុជា បានសរសេរពីប្រសាសន៍របស់លោក ហ៊ុន ម៉ាណែត ដូច្នេះថា៖«ចំពោះវិស័យសេដ្ឋកិច្ច និងយោធា ទោះបីសកម្មភាពកិច្ចសហប្រតិបត្តិការនៅមានកម្រិត ប៉ុន្តែ ក៏ស្ថិតក្នុងលទ្ធភាព និងសក្តានុពលដែលអាចបន្តពង្រឹងឲ្យបានរីកចម្រើនទៅមុខផងដែរ ដែលអាចជួយដល់ការផ្សារភ្ជាប់ទំនាក់ទំនងរវាងប្រទេស និងប្រទេសឲ្យកាន់តែជិតស្និទ្ធ»៕