អន្តរជាតិ
ប្រជាជនអាម៉េរិក ៤៤ភាគរយរកការងារបន្ថែម ដើម្បីបង្កើនចំណូល តែអ្នកជំនាញថាមិនសូវមានប្រសិទ្ធភាព រូបភាព៖ Unsplash
× បច្ចុប្បន្ន អត្រាប្រជាជនអាម៉េរិកដែលមានការងារ ឬមុខរបរច្រើនជាង១ កើនឡើងជាលំដាប់។ ពួកគេខិតខំធ្វើការច្រើនកន្លែង ដើម្បីបង្កើនចំណូលប្រចាំខែ ខណៈប្រទេសកំពុងជួបបញ្ហាសេដ្ឋកិច្ច និងមានអតិផរណាខ្ពស់។ នេះបើផ្អែកលើការស្ទង់មតិតាមប្រព័ន្ធអនឡាញរបស់វេបសាយ Insuranks ដែលជាទីផ្សារធានារ៉ាប់រងអាជីវកម្មខ្នាតតូច។ ផ្ទុយទៅវិញ អ្នកជំនាញបានពន្យល់ថា ការមានមុខរបរលើសពី១ មិនប្រាកដថាអាចបង្កើនចំណូលប្រចាំខែនោះទេ។
ការស្ទង់មតិរបស់ទីផ្សារធានារ៉ាប់រងអាជីវកម្មខ្នាតតូច Insuranks បានបង្ហាញថាប្រជាជនអាម៉េរិក ៤៤ភាគរយ បានចាប់ផ្ដើមធ្វើការ ឬមានរបរបន្ថែមយ៉ាងហោចណាស់១ទៀត ផ្សេងពីការងារគោល ដើម្បីបង្កើនចំណូល។ នេះដោយសារ តម្លៃទំនិញបានឡើងថ្លៃយ៉ាងខ្លាំង ស្របពេលអាម៉េរិកមានវិបត្តិអតិផរណាខ្ពស់ មិនធ្លាប់ជួបក្នុងរយៈពេល ៤០ឆ្នាំចុងក្រោយ។
បញ្ហាសេដ្ឋកិច្ចជាចំណែកដ៏ធំធ្វើឱ្យជីវភាពប្រជាជនអាម៉េរិកជួបការលំបាក។ ក្នុងចំណោមប្រជាជន ៤៤ភាគរយខាងលើ ការស្ទង់មតិបានរកឃើញថា ប្រជាជន ២៨ភាគរយបានសម្រេចចិត្តធ្វើការ និងចាប់របរផ្សេងមួយទៀត ដោយសារបញ្ហាអតិផរណា។ ទាក់ទិននឹងការងារក្រៅម៉ោងដែលជារបរបន្ថែមនោះ បុគ្គលិកម្នាក់ៗជាមធ្យមត្រូវធ្វើការ ១៣ម៉ោងក្នុងមួយសប្ដាហ៍ ហើយទទួលបានប្រាក់ ៤៨៣ដុល្លារក្នុងមួយខែ។
មុនពេលសម្រេចចិត្តបន្ថែមការងារ ឬស្វែងរករបរក្រៅម៉ោងការងារគោល មនុស្សម្នាក់ៗ គួរតែមានគោលដៅច្បាស់លាស់ ថាតើពួកគេធ្វើដើម្បីបង្កើនចំណូល ឬចង់បង្កើនចំណេះជំនាញថ្មីបន្ថែមពីលើចំណេះដែលបានពីការងារគោល។ ទំហំប្រាក់ខែ ពេលវេលាធ្វើការ និងកម្លាំងពលកម្មក៏ជាចំនុចដែលត្រូវពិចារណាមុនសម្រេចចិត្តធ្វើការបន្ថែមដែរ។ នេះបើតាមអ្នកជំនាញផ្នែកការងារ លោក Gorick Ng។
ប្រសិនបើមនុស្សសម្រេចចិត្តធ្វើការដើម្បីបង្កើនចំណូល អ្នកជំនាញផ្នែកហិរញ្ញវត្ថុ លោកស្រី Peula Pant បានពន្យល់ថា ការធ្វើការលើសពីការងារចម្បង ៨ម៉ោង ឬមានមុខរបរច្រើនប្រហែលជាមិនអាចជួយឱ្យមនុស្សបង្កើនចំណូលប្រចាំខែប្រកបដោយប្រសិទ្ធភាពឡើយ។ លោកស្រីបានបន្ថែមថា ប្រសិនបើមនុស្សម្នាក់ៗមានការងារគោលប្រកបដោយវិជ្ជាជីវៈមួយដែលផ្ដល់ប្រាក់ខែខ្ពស់សមរម្យហើយ វាគួរតែយកពេលនៅសល់ខិតខំដុសខាត់សមត្ថភាព អភិវឌ្ឍចំណេះដឹងបន្ថែម ដើម្បីស្នើឡើងដំណែងវិញទើបជាការល្អ។ មនុស្សគួរមានជំនាញច្បាស់លាស់មួយពិតប្រាកដជាជាងការទៅធ្វើការងារច្រើនមុខ ដែលខុសៗគ្នា។
យ៉ាងណាមិញ ការបន្ថែមមុខរបរអាចជាជម្រើសមួយសម្រាប់រកចំណូលបន្ថែម ប្រសិនបើគម្លាតនៃចំណូល និងការចំណាយមានទំហំធំខ្លាំង។ មួយវិញទៀត ការមានមុខងារច្រើនជាង១ អាចជាជម្រើសល្អសម្រាប់និស្សិត ព្រោះពួកគេអាចមានពេលវេលាច្រើន ហើយវាជាពេលដែលពួកគេគួរសិក្សាពីការងារឱ្យបានច្រើនបំផុតក្នុងជីវិត ជាជាងចាប់ផ្ដើមគិតពីរឿងរៀបការ៕
© រក្សាសិទ្ធិដោយ thmeythmey.com