អន្តរជាតិ
ការសិក្សា៖ អណ្ដើកជាសត្វឈាមត្រជាក់ អាយុវែង និងមិនងាយចាស់តាមអាយុ សត្វអណ្តើក Jonathan ដែលមានអាយុ ១៩០ឆ្នាំ។ រូបភាព៖ AFP
× ភាវៈមានជីវិតទាំងអស់សុទ្ធតែត្រូវស្លាប់ តែភាវៈខ្លះមិនប្រែទៅចាស់ទ្រុឌទ្រោមតាមអាយុឡើយ បើទោះវាមានអាយុច្រើនក្ដី។ ពពួកសត្វល្មូន ត្រី សត្វល្អិត និងថលជលិកទាំងអស់ គឺជាពពួកសត្វឈាមត្រជាក់ដែលអ្នកវិទ្យាសាស្ត្របានរកឃើញថាវាមិនងាយចាស់ជរា និងមានអាយុវែង។ ជាក់ស្ដែង អណ្ដើកលូតលាស់រាប់ឆ្នាំទម្រាំពេញវ័យ ហើយបន្ទាប់ពីពេញវ័យ វាលែងប្រែប្រួលរូបរាងនិងទំហំទៀតហើយ វានៅតែមានរូបរាងដដែលរហូតដល់ថ្ងៃស្លាប់។
ការសិក្សាថ្មីពីរចុះផ្សាយលើទិនានុប្បវត្តិ Science បានសង្កេតពីភាពចាស់របស់ពពួកសត្វឈាមត្រជាក់ដូចជាពពួកល្មូន និងថលជលិក ៧៧ប្រភេទផ្សេងៗគ្នានៅជុំវិញពិភពលោក។ អ្នកវិទ្យាសាស្ត្របានរកឃើញថាពពួកសត្វឈាមត្រជាក់ខ្លះមានអាយុវែងខ្លាំងរហូតដល់ជាងមួយសតវត្សក៏មាន ហើយវាវិវដ្ដទៅរកភាពចាស់យឺតខ្លាំងគួរឱ្យកត់សម្គាល់ ឬសត្វខ្លះមិនចាស់ទាល់តែសោះបើទោះមានអាយុច្រើន។
ជាក់ស្ដែង កន្ធាយអាចរស់នៅរហូតដល់ ៨០ឆ្នាំ ខណៈអណ្ដើកអាចមានអាយុរហូតដល់ ១៥០ឆ្នាំឯណោះ។ សត្វទាំងពីនេះវិវដ្ដខ្លួនទៅរកភាពចាស់យឺតណាស់ ហើយវានឹងលែងប្រែប្រួលរូបរាងបន្ទាប់ពីវាពេញវ័យ បើទោះវាមានអាយុច្រើនក៏ដោយ។ ការអះអាងរបស់អ្នកស្រាវជ្រាវដែលថា ពពួកសត្វឈាមត្រជាក់មិនងាយចាស់ មិនមែនមានន័យថាអាយុមិនកើនឡើង ហើយមិនស្លាប់នោះទេ។ សត្វទាំងអស់សុទ្ធតែកើនអាយុ គ្រាន់តែវាមិនប្រែប្រួលរូបរាងដែលមើលទៅឃើញចាស់ទ្រុឌទ្រោមតាមអាយុ។
ទាក់ទិននឹងហេតុផលដែលពពួកសត្វល្មូន និងថលជលិកមិនងាយចាស់ ការសិក្សាចាស់មួយបានពន្យល់ថា ដោយសារពពួកសត្វឈាមត្រជាក់ទាំងនោះពឹងលើសីតុណ្ហភាពខាងក្រៅមកតម្រូវសីតុណ្ហភាពក្នុងរាងកាយ។ ដូច្នេះដំណើរដុតរំលាយអាហារមានល្បឿនយឺត ធ្វើឱ្យភាពចាស់នៃរូបរាងកាយក៏យឺតដែរ។ ចំណែកពពួកឈាមក្ដៅ ដូចជាមនុស្ស ឬកណ្ដុរ មានដុតរំលាយអាហារលឿន ដែលធ្វើឱ្យភាពចាស់វិវដ្តលឿនតាមនោះដែរ។
យ៉ាងណាមិញ ការសិក្សាថ្មីនេះយល់ឃើញផ្ទុយពីការសិក្សាចាស់។ ទំនាក់ទំនងនៃការរំលាយអាហារ និងភាពចាស់ ត្រឹមត្រូវតែចំពោះសត្វអណ្តើក និងកន្ធាយប៉ុណ្ណោះ ក្នុងចំណោមពពួកសត្វឈាមត្រជាក់ទាំងអស់។ ម្យ៉ាងវិញទៀត សត្វអណ្ដើក និងកន្ធាយអាចរស់នៅបានយូរ និងមិនងាយចាស់ព្រោះវាមានលក្ខខណ្ឌជីវសាស្ត្រពិសេស ដូចជាមានស្នូករឹងការពារខ្លួនពីមជ្ឈដ្ឋានខាងក្រៅ មិនឱ្យសត្វដទៃស៊ី និងគ្រោះថ្នាក់ផ្សេងៗ។ ជាឧទាហរណ៍នាពេលថ្មីៗនេះ អណ្ដើកយក្ស Jonathan បានក្លាយជាសត្វលើដីដែលចំណាស់ជាងគេបំផុតក្នុងពិភពលោក បន្ទាប់ពីឈានចូលអាយុ ១៩០ឆ្នាំ។
គួរបញ្ជាក់ថា ពពួកសត្វឈាមត្រជាក់រួមមានដូចជា អណ្ដើក កន្ធាយ ពស់ បង្គួយ ក្រពើ កង្កែប គីង្គក់ កញ្ចាញ់ចេក ត្រីជាច្រើនប្រភេទ និងសត្វល្អិតទាំងអស់៕
© រក្សាសិទ្ធិដោយ thmeythmey.com