គណបក្សកម្ពុជានិយម ដែលដឹកនាំដោយ លោកយ៉ែម បុញ្ញឫទ្ធិ អតីតមន្ត្រីជាន់ខ្ពស់គណបក្សសង្គ្រោះជាតិ ទទួលបានអាសនៈ១ ពីការប្រកួតប្រជែងក្រុមប្រឹក្សាឃុំ-សង្កាត់អាណត្តិទី៥ ក្នុងចំណោម៣៨ឃុំ-សង្កាត់នៅ១០រាជធានី-ខេត្ត។ គណបក្សថ្មីមួយនេះ បានកៅអីជំទប់ទី២នៅឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ។
នៅឃុំភ្នំលៀប ដែលមាន១១អាសនៈ លោក យស លឿត ពីគណបក្សកម្ពុជានិយម ជាប់ជាជំទប់ទី២ ដោយលោក សួង សំផុង ពីគណបក្សប្រជាជនកម្ពុជា បន្តជាប់ជាមេឃុំ រីឯលោក ឃិត អាន ពីគណបក្សភ្លើងទៀន បានតំណែងជាជំទប់ទី១។
សមាជិកក្រុមប្រឹក្សាចំនួន៨នាក់ទៀត មាន អ្នកស្រី ក្រាក់ សារ៉េត, លោក លិវ អៀង, លោក ស្វាង ធី, លោក ដន សំអាត, លោក ម៉ាន យ៉ុន, លោក ហ៊ុន គាន, លោក ម៉ៅ វ័ន មកពីគណបក្សប្រជាជនកម្ពុជា និងលោក តុប ណាន ពីគណបក្សភ្លើងទៀន។
មន្ត្រីគណបក្សកម្ពុជានិយម បានលើកឡើងថា វាមិនចម្លែកឡើយដែលគណបក្សថ្មី និងទើបទទួលបានសិទ្ធិ៣ខែ ទទួលបាន១អាសនៈ ដែលជាការសម្រេចជ្រើសរើសផ្លូវតស៊ូចូលរួមប្រកួតជាជាងនៅស្ងៀមមិនធ្វើអ្វីសោះ។ លោក យ៉ែម បុញ្ញឫទ្ធិ ប្រធានគណបក្ស បានអបអរសាទរ លោក យស លឿត។ លោកបានសរសេរថា៖ «សូមជូនពរ លោក យស លឿត ឲ្យបានជោគជ័យគ្រប់ភារកិច្ច ក្នុងការបម្រើ ការពារ យុត្តិធម៌ ជូនប្រជាពលរដ្ឋ និងសង្គមជាតិខ្មែរយើង»។
យោងតាមលទ្ធផលផ្លូវការ គណបក្សចំនួន៩ក្នុងចំណោម១៧ បានទទួលអាសនៈក្នុងអណត្តិទី៥នេះ ដោយក្នុងចំណោម១១៦២២អាសនៈនៃ១៦៥២ឃុំ-សង្កាត់ គណបក្សប្រជាជនកម្ពុជា ទទួលបានទៅដល់ ៩៣៧៦អាសនៈ គណបក្សភ្លើងទៀន បាន ២១៩៨អាសនៈ។
គណបក្សហ៊្វុនស៊ិនប៉ិច ស្ថិតនៅលេខ៣ ដោយបាន១៩អាសនៈ បន្ទាប់មកគណបក្សខ្មែររួបរួមជាតិ បាន១៣អាសនៈ។ គណបក្សប្រជាធិបតេយ្យមូលដ្ឋាន បាន៦អាសនៈ គណបក្សខ្មែរស្រឡាញ់ជាតិ បាន៥អាសនៈ គណបក្សយុវជនកម្ពុជា បាន៣អាសនៈ គណបក្សកម្ពុជានិយម បាន១អាសនៈ និងគណបក្សសំបុកឃ្មុំសង្គមប្រជាធិបតេយ្យ បាន១អាសនៈ។
បើតាមគ.ជ.ប ពលរដ្ឋចេញទៅបោះឆ្នោត មានជិត៧,៤លាននាក់ ដែលស្មើនឹង៨០,៣២ភាគរយ ខណៈសន្លឹកឆ្នោតបានការមានជាង៧,២លានសន្លឹក និងមិនបានការមានជិត១៦ម៉ឺនសន្លឹក៕