Christensen ត្រូវបានបង្ហាញខ្លួនក្នុងនាមជាកីឡាករក្លិប Barca ក្រោយពេលចាកចេញពីទឹកដី Stamford Bridge ដោយសារតែផុតកំណត់កិច្ចសន្យា។ កីឡាករខ្សែការពារប្រចាំក្រុមជម្រើសជាតិអេស្ប៉ាញ Azpilicueta និង Marcos Alonso សុទ្ធសឹងតែជាគោលដៅចាប់អារម្មណ៍របស់ក្រុម Barca ក្នុងរដូវកាលនេះដូចគ្នា។ 
 

អំឡុងពេលធ្វើបទបង្ហាញជាមួយក្លិប Barca ខ្សែការពារសញ្ជាតិដាណឺម៉ាករូបនេះ បានបង្ហើបថា រូបគេបានពិភាក្សាជាមួយអតីតមិត្តរួមក្រុមជាខ្សែការពារទាំងពីររូប អំពីការផ្លាស់មកអេស្ប៉ាញនេះ។
 

«ខ្ញុំបាននិយាយជាមួយពួកគេ ហើយបានប្រាប់ថាខ្ញុំទៅចូលរួមជាមួយ Barca ពួកគេជាមិត្តដ៏ល្អសម្រាប់ខ្ញុំ ហើយខ្ញុំសង្ឃឹមថា ខ្ញុំនឹងអាចលេងជុំគ្នាជាថ្មីជាមួយពួកគេនៅក្លិបនេះ។ ខ្ញុំមិនទាន់បានចូលរួមជាមួយមិត្តរួមក្រុមថ្មីដែលសំបូរទៅដោយគុណភាពទាំងអស់នេះនៅឡើយទេ ។ ប៉ុន្តែខ្ញុំពិតជាចង់លេងជាមួយ Azpilicueta និង Alonso ខ្លាំងណាស់រដូវកាលក្រោយ។»។
 

មុនពេលចុះកិច្ចសន្យាជាមួយ Christensen ក្លិប Barca កាលពីថ្ងៃទី៦ ខែកក្កដា ក៏បានធ្វើបទបង្ហាញពីការមកដល់របស់ខ្សែបម្រើ Franck Kessie ដែលផ្ទេរមកពីក្លិប AC Milan ក្នុងនាមជាកីឡាគ្មានតម្លៃខ្លួនដូចគ្នា។ លោក Laporta អះអាងថា ដំបូងឡើយ ក្លិបត្រូវធ្វើរួមគ្នាសម្រាប់បទបង្ហាញរបស់កីឡាករទាំងពីរ ប៉ុន្តែដោយសារតែបញ្ហាហិរញ្ញវត្ថុ ក្លិបមិនអាចចុះកិច្ចព្រមព្រៀមកីឡាករពីរ ក្នុងពេលតែមួយបាន។
 

ក្លិបស្ថិតនៅតំបន់ Catalonia មួយនេះកំពុងស្ថិតនៅក្នុងបញ្ហាហិរញ្ញវត្ថុនៅឡើយ Barca ក៏កំពុងតែបន្តដោះស្រាយលើបញ្ហាប្រាក់ឈ្នួលកីឡាករ ដោយបន្តកាត់ប្រាក់ឈ្នួលកីឡាករ ដើម្បីអាចសម្របសម្រួលនាំយកកីឡាករថ្មីមកបាន៕