ចាប់តាំងចូលរួមជាមួយក្រុម Manchester United ដោយផ្ទេរពីរក្រុម Sporting CP របស់ព័រទុយហ្គាល់កាលពីខែមករា ឆ្នាំ ២០២០ មក Bruno ទទួលបានអាវលេខ១៨។ លេងបាន២រដូវកាល Bruno ជួយរកគ្រាប់បាល់ឱ្យបិសាចក្រហមបានចំនួន ៥០គ្រាប់ នៅទូទាំងការបង្ហាញខ្លួនចំនួន១២៦ប្រកួតនៅគ្រប់កម្មវិធី។
 

សម្រាប់រដូវកាល ២០២២-២៣ ខ្សែបម្រើសញ្ជាតិព័រទុយហ្គាល់ទទួលបានជម្រើសពីគ្រូបង្វឹកថ្មីគឺលោក Erik ten Hag ដោយអាចផ្លាស់ប្តូរយកអាវដែលមានលេខ ៨ ដែលគេស្រលាញ់និងចូលចិត្ត ក្រោយពេលកីឡាករខ្សែបម្រើវ័យចំណាស់ Juan Mata បានចាកចេញពីក្លិបពេលបញ្ចប់រដូវកាល។ ទទួលបានអាវលេខ៨ សម្រាប់រដូវកាលថ្មីជារឿងដ៏រំភើបមួយដែល Bruno ចង់បានដូចទៅនឹងការសាក់លើដៃខាងស្តាំរបស់គេដែលមានរូបលេខ៨។ 
 

កីឡាករវ័យ២៧ឆ្នាំ នឹងបង្ហាញខ្លួនឱ្យក្រុមបិសាចក្រហមលើកដំបូងក្នុងឯកសណ្ឋានលេខ៨ នាការប្រកួតមិត្តភាពត្រៀមបើករដូវកាលថ្មី ក្នុងប្រទេសថៃ ក្រុមបិសាចក្រហមថ្ងៃទី៨ កំពុងតែធ្វើដំណើរទៅកាន់ប្រទេសថៃ ដើម្បីត្រៀមការប្រកួតមិត្តភាពទល់ Liverpool នាថ្ងៃទី១២ ខែកក្កដា។
 

Bruno Fernandes ក្លាយជាកីឡាករទី៦ហើយប្រចាំ Man United ដែលបានពាក់អាវលេខ៨ នេះនៅក្នុងទឹកដី Old Trafford ចាប់តាំងពីឆ្នាំ ១៩៩៣ មក។ កីឡាករ៥​ រូបដែលធ្លាប់ពាក់អាវលេខ៨នេះ រួមមាន លោក Paul Ince, លោក Nicky Butt, Wayne Rooney, Anderson និង Juan Mata។
 

ចំណែកខ្សែការពារស្លាបចំណូលថ្មី Tyrell Malacia ក៏នឹងទទួលបានអាវលេខ១២ ដែលខ្លួនធ្លាប់បានប្រើអំឡុងនៅជាកីឡាកររបស់ Feyenoord។ ខ្សែការពារស្លាបឆ្វេងវ័យ២២ឆ្នាំរូបនេះ បានចុះកិច្ចសន្យា៤ឆ្នាំជាមួយបិសាចក្រហម ហើយរូបគេក៏ជាកីឡាករដំបូងដែល Man United បានចុះកិច្ចសន្យាយកមកសម្រាប់រដូវកាល ២០២២-២៣ ក្រោមការគ្រប់គ្រងរបស់លោក ​Erik ten Hag៕