មុនពេលសម្រេចទទួលការងាររបស់ក្លិប DC United គ្រូបង្វឹកវ័យ៣៦ឆ្នាំ រូបនេះបានបង្ហើបថា ក្រោយពេលប្រកាសលាលែងពីក្រម Derby ក៏មានក្រុមមួយចំនួននៅអង់គ្លេស និងក្នុងតំបន់អឺរ៉ុបបានទាក់ទងឱ្យទៅដឹកនាំដែរ។ Rooney បានឆ្លើយតបទៅក្លិបទាំងនោះថា រូបគេចង់សម្រាកមួយរយៈពេល។
 

ចាប់តាំងពីមានព័ត៌មានថា Rooney វិលត្រលប់ទៅដឹកនាំក្លិបចាស់នៅអាម៉េរិកនោះ ស្រាប់តែមានរិះគន់យ៉ាងខ្លាំងលើអតីតខ្សែប្រយុទ្ធ Man Utd រូបនេះ ពីសំណាក់អ្នកទស្សនាបាល់ទាត់អង់គ្លេស ។ ពួកគេរិះគន់ថា ការវិលត្រឡប់ក្លិបចាស់វិញនេះ ដោយសារតែ Rooney បរាជ័យក្នុងអាជីពដឹកនាំនៅអង់គ្លេស។ ក្រោយកាន់តំណែងជាគ្រូបង្វឹកនៅ DC United, Rooney បានឆ្លើយតបថាការទៅដឹកនាំក្លិបនៅអាម៉េរិកមិនមែនជាការបរាជ័យនៃអាជីពឡើយ។
 

«ខ្ញុំបានឃើញអត្ថបទមួយចំនួន ប្រាកដណាស់នៅអង់គ្លេស ក្នុងនោះបាននិយាយថាអាជីពការដឹកនាំរបស់ខ្ញុំបរាជ័យ ហើយខ្ញុំគិតថានេះជារឿងដែលមិនគោរពមួយដល់លីគអាម៉េរិកមួយនេះ។ ខ្ញុំបានដឹកនាំ Derby រយៈពេលជាង ១៨ខែ ខ្ញុំមានអារម្មណ៍ទទួលបានបទពិសោធន៍ច្រើនពីការបង្វឹកនេះ ក្នុងនាមជាអ្នកចាត់ការ ហើយការវិលមកអាម៉េរិកជាការប្រកួតប្រជែងដ៏អស្ចារ្យ។»។ Rooney និយាយបែបនេះ ក្នុងសន្និសីទកាសែតរបស់ក្លិបតាមបណ្តាញ Youtube។
 

អំឡុងនៅជាកីឡាកររបស់ Man United លោក Rooney បានជួយរកគ្រាប់បាល់រហូតដល់ទៅ ២៥៣គ្រាប់ដល់ក្រុម ហើយជួយបិសាចក្រហមឈ្នះពានរង្វាន់ Premier League ៥លើក និង ​Champions League ១លើក។
 

Rooney វ័យ៣៦ឆ្នាំ ធ្លាប់ជាកីឡាករក្លិប DC United អំឡុងឆ្នាំ ២០១៨ និង ២០១៩ មុនពេលចាកចេញទៅចូលរួមជាមួយក្លិប Derby County របស់អង់គ្លេសវិញនៅឆ្នាំ ២០២០ ក្នុងនាមជាកីឡាករ និងជាគ្រូបង្វឹក។ ​អតីតកីឡាករក្លិប Manchester United កាលពីដើមខែមិថុនា បានប្រកាសលាលែងពីតំណែងក្លិប Derby County ក្រោយរួមរស់រយៈពេល ១៨ខែ ហើយក្លិប Derby County នេះបានជួបបញ្ហាហិរញ្ញវត្ថុត្រូវបានកាត់ឱ្យទៅលេងនៅក្របខណ្ឌលំដាប់ទី៣នៅអង់គ្លេស។ 
 

បច្ចុប្បន្នក្លិប DC United កំពុងជាក្រុមស្ថិតនៅលំដាប់ទី១៤ បាតតារាង ដោយមានត្រឹមតែ ១៧ពិន្ទុពីការប្រកួតចំនួន ១៧ ហើយជំនួបចុងក្រោយគេបង្អស់កាលសប្តាហ៍មុន ​DC United បានចាញ់ក្រុម Philadelphia Union រហូតដល់លទ្ធផល ៧-០៕