ជាតិ
ស្ថានទូតជប៉ុន រៀបចំកម្មសិក្សាផ្សព្វផ្សាយវប្បធម៌ និងភាសាជប៉ុន នៅគ្រឹះស្ថានអប់រំចំនួន៥ រូបភាពពីស្ថានទូតជប៉ុន
×
ដោយ៖ សែម ប្រាក់ដាវ
ភ្នំពេញ៖ ស្ថានទូតជប៉ុន នឹងរៀបចំកម្មវិធីកម្មសិក្សាផ្សព្វផ្សាយវប្បធម៌ និងភាសាជប៉ុន រួមជាមួយដេប៉ាតឺម៉ង់ភាសាជប៉ុន នៃវិទ្យាស្ថានភាសាបរទេស នៅសាកលវិទ្យាល័យភូមិន្ទភ្នំពេញ (RUPP)។ កម្មវិធីនេះធ្វើឡើង ក្នុងគោលបំណងឲ្យសិស្សានុសិស្សទាំងអស់ នៃវិទ្យាល័យនៅតាមតំបន់នានាទូទាំងប្រទេសកម្ពុជា មានឱកាសបានយល់ដឹងអំពីប្រពៃណី វប្បធម៌ បច្ចេកវិទ្យាប្រទេសជប៉ុន និងផលប្រយោជន៍ក្នុងការសិក្សាភាសាជប៉ុន។
បើតាមសេចក្ដីប្រកាសរបស់ស្ថានទូតជប៉ុនប្រចាំកម្ពុជា ចេញផ្សាយកាលពីថ្ងៃទី១១ ខែកក្កដា ស្ថានទូតជប៉ុន នឹងរៀបចំកម្មវិធីកម្មសិក្សាផ្សព្វផ្សាយវប្បធម៌ និងភាសាជប៉ុន ក្រោមកិច្ចសហការដោយមជ្ឈមណ្ឌលស្រាវជ្រាវ និងអប់រំច្បាប់ជប៉ុនណាហ្គូយ៉ា, វគ្គសិក្សាភាសាជប៉ុនឧបត្ថម្ភដោយJICA ក្នុងសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច(RULE), សាកលវិទ្យាល័យមេគង្គកម្ពុជា(MOC), មជ្ឈមណ្ឌលសហប្រតិបត្តិការកម្ពុជា-ជប៉ុន (CJCL) និងសហការឧបត្ថម្ភដោយមូលនិធិជប៉ុន។
កម្មវិធីសិក្សាផ្សព្វផ្សាយវប្បធម៌ និងភាសាជប៉ុននេះ នឹងប្រព្រឹត្តទៅនៅវិទ្យាល័យ ដីដុះ ខេត្តកំពង់ចាម នាថ្ងៃទី២១ ខែកក្កដា និងវិទ្យាល័យ ជាស៊ីម ប្រឡាយ ខេត្តកំពង់ធំ ថ្ងៃទី២២ ខែកក្កដា។ ចំណែកវិទ្យាល័យ កំពង់ក្ដី ខេត្តសៀមរាប នឹងប្រព្រឹត្តទៅនៅថ្ងៃទី២៣ ខែកក្កដា, វិទ្យាល័យ ហស បរិវាស ខេត្តកំពត ថ្ងៃទី២៨ ខែកក្កដា និងវិទ្យាល័យ ប៊ុនរ៉ានី ហ៊ុនសែន ព្រែកតាឌួង ខេត្តកណ្ដាល នៅថ្ងៃទី៣០ ខែកក្កដា ឆ្នាំ២០២២។
សូមបញ្ជាក់ថា កម្មវិធីទស្សនកិច្ចវិទ្យាល័យនេះ ស្ថានទូតជប៉ុនបានបង្កើតតាំងពីឆ្នាំ២០១៣មក ក្នុងគោលបំណងជំរុញសឱ្យសិស្សវិទ្យាល័យទាំងអស់ មានឱកាសបានយល់ដឹងកាន់តែស៊ីជម្រៅ និងមានអារម្មណ៍ស្និទ្ធស្នាលទៅកាន់ប្រទេសជប៉ុន៕
Tag:
កម្មសិក្សា
ភាសាជប៉ុន
© រក្សាសិទ្ធិដោយ thmeythmey.com