រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា លោកស្រី ភឿង សកុណា បានដឹកនាំក្រុមការងារចូលរួមប្រជុំបូកសរុបការងារ និងទិសដៅការងាររបស់គណៈកម្មាធិការអាយស៊ីស៊ី-អង្គររ(ICC-Angkor) នៅទីក្រុងប៉ារីស នាថ្ងៃទី២១កក្កដា។ ដំណើរបេសកកម្មក្នុងទឹកដីប្រទេសបារាំងនេះ លោកស្រី ភឿង សកុណា, លោក ហង់ ពៅ និងលោក បុង សុវត្ថិ បានចូលរួមពិភាក្សាទស្សនវិស័យរយៈពេល១០ឆ្នាំទៀត(២០២៣-២០៣៣)របស់អាយស៊ីស៊ី-អង្គរ នៅទីស្នាក់ការក្រសួងអឺរ៉ុប និងកិច្ចការអន្តរជាតិ។​

 

សូមជម្រាបថា​ ក្នុងសម័យប្រជុំពេញអង្គលើកទី២៨នៃគណៈកម្មាធិការអាយស៊ីស៊ី-អង្គរ នាទីស្នាក់ការអាជ្ញាធរជាតិអប្សរានៅខេត្តសៀមរាបកន្លងមក សហប្រធាននៃគណៈកម្មាធិការនេះ គឺប្រទេសបារាំងនិងជប៉ុន បានប្រកាសយ៉ាងឱឡារិកអំពីការបន្តបេសកកម្មជ្រោមជ្រែងចំនួន១០ឆ្នាំទៀតដល់កម្ពុជា ក្នុងកិច្ចការអភិរក្សនិងអភិវឌ្ឍន៍ប្រកបដោយចីរភាពរមណីយដ្ឋានបេតិកភណ្ឌពិភពលោកអង្គរ៕