អន្តរជាតិ
WHO ប្រកាសអាសន្នកម្រិតសកលចំពោះជំងឺអុតស្វា ខណៈករណីឆ្លងបន្តកើនឡើងខ្ពស់ អគ្គនាយក WHO លោក Tedros Adhanom Ghebreyesus។ រូបថត AFP
× អង្គការសុខភាពពិភពលោក ប្រកាសចាត់ថ្នាក់ជំងឺអុតស្វាក្នុងសញ្ញាអាសន្នសុខភាពកម្រិតសកល ដែលជាកម្រិតអាសន្នកម្រិតខ្ពស់បំផុត ដោយជំងឺនេះអាចឆ្លងរាលដាលទៅមនុស្សទូទាំងពិភពលោក។ WHO ក៏បញ្ជាក់ថា ការឆ្លើយតបជាសកលមានសារៈសំខាន់សម្រាប់ការបញ្ឃប់ការរីករាលដាលជំងឺអុតស្វានេះ។
WHO នៅថ្ងៃទី២៣ ខែកក្កដាបានកោះប្រជុំគណៈកម្មាធិការជំនាញផ្នែកជំងឺឆ្លងអាសន្ន ដើម្បីសម្រេចថាជំងឺអុតស្វាគួរចាត់ចូលក្នុងប្រភេទជំងឺអាសន្នសុខភាពកម្រិតសកល (PHEIC) ឬយ៉ាងណា។ ប៉ុន្តែគណៈកម្មាធិការជំនាញ មានយោបល់មិនចុះសម្រុងគ្នា។ ដូច្នេះ ការអារកាត់សេចក្ដីចុងក្រោយត្រូវបានធ្លាក់លើអគ្គនាយក WHO លោក Tedros Adhanom Ghebreyesus។
«ខ្ញុំបានសម្រេចចិត្តរួចហើយថា ការរីករាលដាលនៃជំងឺអុតស្វាមានសញ្ញាអាសន្នសុខភាព និងគួរឱ្យបារម្ភកម្រិតសកល»។ លោក Tedros បានប្រកាសបែបនេះក្នុងសន្និសីទកាសែតតាមប្រព័ន្ធវីដេអូពីទីក្រុងហ្សឺណែវនៅថ្ងៃទី២៣ ខែកក្កដា។
លោក Tedros បញ្ជាក់ថា នៅពេលដែលលោកបានកោះហៅគណៈកម្មាធិការអ្នកជំនាញកាលពីខែមិថុនាដើម្បីវាយតម្លៃពីហានិភ័យជំងឺមួយនេះ ករណីឆ្លងមានតែ៣,០៤០ករណីតែប៉ុណ្ណោះក្នុងប្រទេសចំនួន៤៧ ។ យ៉ាងណាមិញ ចាប់តាំងពីពេលនោះមក ការឆ្លងក៏កាន់តែកើនឡើងដែលបច្ចុប្បន្នករណីឆ្លងមានដល់១,៦ម៉ឺនករណីក្នុងប្រទេសនិងទឹកដីចំនួន៧៥ ហើយករណីស្លាប់សរុបមាន៥នាក់។
លោក Tedros បន្តថា ទោះបីជាជំងឺនេះមានសញ្ញាអាចឆ្លងជាសកលក្ដី តែហានិភ័យដែលជំងឺនេះលុកលុយចូលចរាចរណ៍អន្តរជាតិនាពេលបច្ចុប្បន្ននៅមានកម្រិតទាបនៅឡើយ។ បន្ថែមពីនេះ ហានិភ័យជំងឺស្វាយមានកម្រិតមធ្យមនៅទូទាំងពិភពលោក និងនៅគ្រប់តំបន់ទាំងអស់ លើកលែងតែនៅតំបន់អឺរ៉ុបដែលហានិភ័យមានកម្រិតខ្ពស់។
WHO អះអាងទៀតថា ការឆ្លើយតបជាសកលមានសារសំខាន់សម្រាប់ការបញ្ឃប់ការរីករាលដាលនៃជំងឺនេះ។ ឯទីក្រុងវ៉ាស៊ីនតោន ក៏បានស្វាគមន៍ការប្រកាសរបស់ WHO ហើយក៏បានទទូចសហគមន៍អន្តរជាតិសហការគ្នាទប់ស្កាត់ការរីករាលដាលនៃជំងឺមួយនេះផងដែរ។
ការរីករាលដាលនៃជំងឺអុតស្វា ត្រូវបានរាយការណ៍ដំបូងនៅដើមខែឧសភាឆ្នាំនេះ ដែលករណីឆ្លងបានរកឃើញនៅប្រទេសអាហ្វ្រិកខាងលិច និងកណ្តាល មុនត្រូវបានរកឃើញនៅអឺរ៉ុប៕ © រក្សាសិទ្ធិដោយ thmeythmey.com