លោក Tomohiro Kato ក្នុងឆ្នាំ២០០៨ បានបើករថយន្តបុកសម្លាប់អ្នកថ្មើរជើងចំនួន ៣នាក់ និងរបួស ២នាក់ ក្នុងសង្កាត់ Akihabara ក្នុងក្រុងតូក្យូ។ បន្ទាប់ចេញពីរថយន្ត បុរសរូបនេះ បានចាក់សម្លាប់មនុស្សចំនួន ៤នាក់ និងធ្វើឱ្យមនុស្សចំនួន ៨នាក់ផ្សេងទៀតរបួស។ នេះបើតាមការចុះផ្សាយរបស់ទីភ្នាក់ងារព័ត៌មាន Kyodo។ 

 

ក្នុងសន្និសីទសារព័ត៌មានមួយនៅថ្ងៃទី២៦ ខែកក្កដា លោក Yoshihisa Furukawa រដ្ឋមន្រ្តីយុត្តិធម៌ជប៉ុន បានចាត់ទុកហេតុការណ៍ក្នុងឆ្នាំ២០០៨ បានធ្វើឱ្យប៉ះពាល់សង្គមជប៉ុនយ៉ាងខ្លាំង ដោយសារវាបានដកយកជីវិតប្រជាជនចំនួន ៧នាក់។ បើតាមលោក​ Yoshihisa Furukawa មុនចុះហត្ថលេខាអនុវត្តទោសប្រហារជីវិតនៅថ្ងៃទី២២ ខែកក្កដា រដ្ឋាភិបាលជប៉ុន បានពិចារណាយ៉ាងខ្លាំង។ 

 

ការប្រហារជីវិតអ្នកទោសលើកចុងក្រោយនេះ ជាលើកទីពីរហើយ នៅក្នុងរដ្ឋបាលរបស់លោកគីស៊ីដា ហ្វូមីអូ នាយករដ្ឋមន្រ្តីជប៉ុន ដែលចូលកាន់តំណែងនៅក្នុងខែតុលា ឆ្នាំ២០២១។ នៅក្នុងខែធ្នូ កន្លងទៅ ជប៉ុន បានប្រហារជីវិតអ្នកទោសចំនួន ៣នាក់។ មកទល់ពេលនេះ អ្នកទោស ដែលត្រូវបានកាត់ទោសប្រហារជីវិតនៅជប៉ុន បានកើនដល់ ១០៦នាក់៕