ប្រធានាធិបតីស្រីលង្កា លោក Ranil Wickremesinghe បានប្រកាសដាក់ប្រទេសក្នុងភាពអាសន្ន នៅថ្ងៃទី១៧ ខែកក្កដា ដែលការណ៍នេះបានអនុញ្ញាតឱ្យអាជ្ញាធរ និងប៉ូលិសមានអំណាច ក្នុងការចាប់ខ្លួនជនសង្ស័យណាមួយ ហាមប្រាមការប្រមូលផ្ដុំគ្នា និងឆែកឆេរទ្រព្យសម្បត្តិឯកជនជាដើម។

 

ក្នុងការបោះឆ្នោតដោយសមាជិកសភា ថ្ងៃទី២៧ ខែកក្កដា សភាស្រីលង្កាបានគាំទ្រឱ្យពន្យារពេល ដាក់ប្រទេសក្នុងភាពអាសន្នក្នុង ១២០ សំឡេង ខណៈការបដិសេធមានតែ ២៣ សំឡេងប៉ុណ្ណោះ ក្នុងចំណោមសមាជិកសភាសរុប ២២៥នាក់។ សមាជិកសភាដែលនៅសល់បានបោះឆ្នោតអនុបវាទ​ ។ នេះបើតាមការចុះផ្សាយរបស់សារព័ត៌មាន Al Jazeera។ 

 

ក្រោយសភាបានប្រកាសការអនុម័តបន្តដាក់ប្រទេសក្នុងភាពអាសន្ន គណបក្សប្រឆាំងរិះគន់ ថា នេះជាចំណាត់ការរបស់រដ្ឋាភិបាលស្ដីទីដែលព្យាយាមរារាំងអ្នកប្រឆាំង និងក្រុមអ្នកតវ៉ា ដែលមិនពេញចិត្តនឹងការកាន់តំណែងរបស់លោក Wickremesinghe។ 

 

ស្របពេលជាមួយគ្នានេះសកម្មជន​ពីរ​នាក់ ​ដែល​មានបំណងផ្តួល​រំលំ​ប្រធានាធិបតី​ស្រីលង្កា​ត្រូវ​បាន​ចាប់​ខ្លួននៅថ្ងៃដដែលនោះ។ ប៉ូលិសបានលើកឡើងក្នុងសេចក្ដីថ្លែងការណ៍មួយផ្សេងថា ពួកគេបានចាប់ខ្លួន លោក Kusal Sandaruwan និងលោក Weranga Pushpika ពីការប្រមូលផ្ដុំមនុស្សខុសច្បាប់។

 

បន្ថែមពីនេះ ប៉ូលិសក៏បានបានចេញផ្សាយរូបថតរបស់ជនសង្ស័យចំនួន ១៤នាក់ដែលពាក់ព័ន្ធ នឹងការវាយប្រហារផ្ទះរបស់ លោក Wickremesinghe។ 

 

គួរបញ្ជាក់ថា ក្នុងរយៈពេលមួយថ្ងៃនៃការបោះឆ្នោតរបស់លោក Wickremesinghe យោធាបានវាយឆ្មក់ និងរុះរើជំរំដែលក្រុមបាតុករបានបង្កើតឡើងអស់រយៈពេលជាង ១០០ ថ្ងៃទល់មុខការិយាល័យប្រធានាធិបតី ហើយបាតុករខ្លះក៏ត្រូវបានវាយដំផងដែរ។ មេដឹកនាំ បាតុករបានប្តេជ្ញាធ្វើបាតុកម្មប្រឆាំងនឹងលោក Wickremesinghe ទាល់តែចុះចេញពីតំណែង ៕