មន្ត្រីតុលាការកំពូលស្រីលង្កាម្នាក់ដោយមិនបញ្ចេញឈ្មោះ បានប្រាប់ទូរទស្សន៍សិង្ហបុរី CNA ថាមានញត្តិដែលបានប្ដឹងទៅលើអ្នកនយោបាយ មន្ត្រីរាជការមួយចំនួន និងព្រមទាំងអតីត ប្រធានាធិបតីស្រីលង្កា លោក ហ្គោតាបាយ៉ា រ៉ាចាប៉ាក់សា ចំពោះការបង្កឱ្យវិបត្តិសេដ្ឋកិច្ចកាន់តែដុនដាបទៅ។ ទាក់ទិននឹងបញ្ហានេះ លោក រ៉ាចាប៉ាក់សា ត្រូវបង្ហាញខ្លួននៅតុលាការកំពូលនៅថ្ងៃទី១ ខែសីហាខាងមុខនេះ។

 

ទន្ទឹមនេះ ប្រព័ន្ធផ្សព្វផ្សាយស្រីលង្កា Newsfirst បានចុះផ្សាយដូចគ្នាថា អតីតប្រធានាធិបតីស្រីលង្កា បានរងពាក្យបណ្ដឹងដែលទាក់ទងនឹងវិបត្តិសេដ្ឋកិច្ចក្នុងប្រទេស ប៉ុន្តែលោក រ៉ាចាប៉ាក់សា នឹងបង្ហាញ ខ្លួនក្នុងនាមជាចុងចោទឯកជន ឬជាចុងចោទសាមញ្ញដូចប្រជាជនធម្មតាដែរ។

 

ជុំវិញរឿងនេះ មេធាវីស្រីលង្កាបានអះអាងថា លោក រ៉ាចាប៉ាក់សា មិនចាំបាច់ទៅតុលាការ ដោយផ្ទាល់ទេហើយអាចបង្ហាញខ្លួនតាមរយៈមេធាវីរបស់លោកបាន។ពេលនេះ លោកអតីតមេដឹកនាំស្រីលង្ការូបនេះ កំពុងតែស្នាក់នៅសិង្ហបុរី ហើយលោកក៏ទទួលបានការពន្យារ ពេលឱ្យនៅប្រទេសនោះរហូតដល់ថ្ងៃទី១១ ខែសីហាដែរ។

 

យ៉ាងណាមិញ រដ្ឋមន្ត្រី​ប្រព័ន្ធ​ផ្សព្វផ្សាយ និង​ជា​អ្នកនាំពាក្យគណៈរដ្ឋមន្ត្រីស្រីលង្កា លោក Bandula Gunawardena  បានលើកឡើងក្នុងសន្និសីទកាសែតថ្ងៃទី២៦ ខែកក្កដាថា​ លោកជឿថាលោក រ៉ាចាប៉ាក់សា នឹងត្រឡប់ទៅកាន់ស្រីលង្កាវិញ ហើយនៅពេលដែលលោកមកដល់ អាជ្ញាធរ​នឹង​ចាត់​វិធានការ​ចាំបាច់​ដើម្បី​ធានា​ថា​មិន​មាន​អ្វី​អាក្រក់​កើតឡើង​ចំពោះ​អតីត​ប្រធានាធិបតី​ឡើយរូបនេះឡើយ។

 

លោក Gunawardena ក៏សង្កត់ធ្ងន់ថា លោក រ៉ាចាប៉ាក់សា មិនមែនកំពុងលាក់ខ្លួននៅសិង្ហបុរី នោះទេ ព្រោះលោកមាន​ទិដ្ឋាការ​ដូច​អ្នក​ដទៃ​ដែរ៕