នៅឯការបើកសម្ពោធមជ្ឈមណ្ឌលសម្របសម្រួល នៅទីក្រុងអ៊ីស្តង់ប៊ុលជាផ្លូវការក្នុងថ្ងៃទី២៧ ខែកក្កដា អគ្គលេខាធិការអង្គការសហប្រជាជាតិ(UN) លោកអង់តូនីញូ ហ្គូតេរ៉េស បានស្វាគមន៍ចំពោះកិច្ចប្រឹងប្រែងនេះជាខ្លាំង។ ការបង្កើតមជ្ឈមណ្ឌលសម្របសម្រួលនៅទីក្រុងអ៊ីស្តង់ប៊ុលនេះ ជាផ្នែកមួយនៃកិច្ចព្រមព្រៀងដែលបានចុះហត្ថលេខាដោយរុស្ស៊ី អ៊ុយក្រែន តួកគី​ និង UN កាលពីសប្តាហ៍មុនក្នុងការបើកផ្លូវឱ្យដឹកគ្រាប់ធញ្ញជាតិចេញពីកំពង់ផែអ៊ុយក្រែន Odessa, Chernomorsk និង Pivdennyi តាមសមុទ្រខ្មៅទៅកាន់ពិភពលោកឡើងវិញដែលបានជាប់គាំងដោយសារសង្រ្គាមអ៊ុយក្រែន-រុស្ស៊ី។

 

«អគ្គលេខាធិការ (UN) ថ្លែងអំណរគុណដល់តួកគី​ដែលបានផ្តល់កន្លែងសម្រាប់ភាគី និង UN ដើម្បីជួយប្រតិបត្តិការគំនិតផ្តួចផ្តើមដឹកធញ្ញជាតិចេញតាមសមុទ្រខ្មៅ»។ លោក Farhan Haq អ្នកនាំពាក្យរងរបស់ប្រមុខ UN បញ្ជាក់បែបនេះនៅក្នុងសេចក្តីថ្លែងការណ៍ថ្ងៃទី២៨ ខែកក្កដា។

 

តាមសេចក្តីថ្លែងការណ៍ដដែល លោក ហ្គូតេរ៉េស ក៏បានអរគុណដល់រុស្ស៊ី និងអ៊ុយក្រែនដែលបានតែងតាំង និងបញ្ជូនអ្នកតំណាងជាន់ខ្ពស់ទៅកាន់ទីក្រុងអ៊ីស្តង់ប៊ុលយ៉ាងរហ័ស។ ប្រមុខ UN ព្រមទាំងបានសង្កត់ធ្ងន់ពីសារសំខាន់នៃការធ្វើការជាដៃគូដោយផ្ទាល់រវាងភាគីពាក់ព័ន្ធ ដើម្បីអនុវត្តគំនិតផ្តួចផ្តើមដឹកធញ្ញជាតិចេញតាមសមុទ្រខ្មៅប្រកបដោយប្រសិទ្ធភាព ក្នុងបំណងដើម្បីកាត់បន្ថយអសន្តិសុខស្បៀងអាហារសកល។ 

 

លើសពីនេះ Haq អ្នកនាំពាក្យរងរបស់ប្រមុខ UN លើកឡើងថា មជ្ឈមណ្ឌលសម្របសម្រួលនៅទីក្រុងអ៊ីស្តង់ប៊ុលនឹងអនុញ្ញាតឱ្យកប៉ាល់ឈ្មួញដឹកធញ្ញជាតិ និងគ្រឿងឧបភោគបរិភោគផ្សេងទៀត ក៏ដូចជាជីប្រកបដោយសុវត្ថិភាពពីកំពង់ផែសំខាន់ៗបីរបស់អ៊ុយក្រែនតាមសមុទ្រខ្មៅទៅកាន់ពិភពលោក។ 

 

ថ្លែងទៅកាន់រដ្ឋសមាជិក UN ក្នុងសន្និសីទកាសែតមួយថ្ងៃដដែល ប្រធានជំនួយមនុស្សធម៌ UN លោក Martin Griffiths សង្ឃឹមថា ការដឹកជញ្ជូនធញ្ញជាតិដំបូងចេញពីកំពង់ផែអ៊ុយក្រែននៅសមុទ្រខ្មៅនឹងអាចដំណើរការបាននៅថ្ងៃទី២៩ ខែកក្កដានេះ។ ប៉ុន្តែ ព័ត៌មានលម្អិតទាក់ទិននឹងសុវត្ថិភាពនៃការដឹកឆ្លងកាត់នេះនៅតែកំពុងពិនិត្យមើលនៅឡើយ៕