នៅថ្ងៃទី២៧ ខែកក្កដា គណនីបណ្តាសង្គម Facebook មួយ​ បានបង្ហោះពីបដា នៅកោះ Samae San ដែលហាមឃាត់ភ្ញៀវទេសចរពាក់ឈុតប៊ីគីនី។ បន្ទាប់ពីមានការបង្ហោះបែបនេះ លោកឧត្តមនាវីឯក  Pokkrong Monthatpalin អ្នកនាំពាក្យកងទ័ពជើងទឹកថៃ បានចេញមុខបកស្រាយថា ស្លាកសញ្ញានោះ មិនមែនហាមឃាត់ភ្ញៀវទេសចរពាក់ឈុតប៊ីគីនីឡើយ ប៉ុន្តែវាជាការលើកទឹកចិត្តស្រ្តី កុំពាក់ឈុតបែបនោះ។ 

 

បើតាមអ្នកនាំពាក្យកងទ័ពជើងទឹក ការស្នើបែបនេះ ធ្វើឡើងដើម្បីការពារវប្បធម៌ និងប្រពៃណីថៃប៉ុណ្ណោះ។ 

 

«កងទ័ពជើងទឹក សូមស្នើឱ្យភ្ញៀវទេសចរកុំពាក់ឈុតប៊ីគីនីនៅឆ្នេររបស់ខ្លួន ដើម្បីសណ្តាប់ធ្នាប់ និងវប្បធម៌ រួមទាំងប្រពៃណីថៃ»។ លោក Pokkrong បានសង្កត់ធ្ងន់បែបនេះ ដោយបន្ថែមថា ពេលនេះ ស្លាកសញ្ញានោះ ត្រូវបានប្តូរចេញហើយ ដោយដាក់បដាថ្មី ដើម្បីឱ្យភ្ញៀវទេសចរងាយស្រួលយល់ពីបំណងរបស់កងទ័ពជើងទឹក ក្នុងការអភិរក្សវប្បធម៌ខ្លួន។ នេះបើតាមការចុះផ្សាយរបស់កាសែតបាងកកប៉ុស្តិ៍៕ 

 

កោះ Samae San ជាតំបន់មួយ ដែលទាក់ទាញភ្ញៀវទេសចរជាច្រើន ប៉ុន្តែវាស្ថិតនៅក្រោមយុត្តាធិការរបស់កងទ័ពជើងទឹកថៃ។ មិនតែប៉ុណ្ណោះ ចំនួនភ្ញៀវទេសចរ ដែលមកកោះនេះ ត្រូវបានកម្រិត និងមិនអនុញ្ញាតឱ្យស្នាក់នៅឡើយ រួមទាំងហាមឃាត់ការបរិភោគស្រា និងជួបជុំមនុស្ស ដែលមានសំឡេងរំខាន៕