ព្រះតេជព្រះគុណ ថូ ធូររស់ ប្រធានព្រៃសង្ឃសហគមន៍រុក្ខាវ័ន បានប្រាប់សារព័ត៌មាន ThmeyThmey25ថា បច្ចុប្បន្នព្រៃសង្ឃសហគមន៍រុក្ខាវ័នមានផ្ទៃដីសរុបមាន ៣០២៥៤ហិកតា។ ទំហំដីនេះជាការរួមបញ្ចូលរវាងសហគមន៍ចំនួនពីរ គឺព្រៃសង្ឃសហគមន៍រុក្ខាវ័ន និងសហគមន៍ព្រៃឈើរតនៈរុក្ខា។ ប្រធានព្រៃសង្ឃសហគមន៍រុក្ខាវ័ន បានពន្យល់ថា កន្លងមកសកម្មភាពនៃការការពារធំៗរួមមាន ការកាយព្រំ ដើម្បីការពារដីព្រៃសង្ឃរុក្ខាវ័នទំហំ១៨២៦១ហិកតា និងសកម្មភាពការល្បាតលើផ្ទៃទឹក និងផ្ទៃដីគោក។
 

«សម្មភាពកាយព្រំនៅក្នុងព្រៃសង្ឃ រួចរាល់ជាង៩០ភាគរយ។ ទំហំសរុបដែលត្រូវកាយមាន១៨២៦១ហិកតា ពេលនេះសល់ត្រឹម១៦ហិកតាប៉ុណ្ណោះ។  ចំណែកឯ សកម្មភាពល្បាត បច្ចុប្បន្នសហគមន៍ទាំងពីរធ្វើការរួមគ្នាលើកិច្ចការពារព្រៃ និងសត្វព្រៃ ដូចជាសកម្មភាពល្បាត ដោះអន្ទាក់ ចាប់បទល្មើសកាប់ឈើ បំផ្លាញព្រៃជារៀងរាល់ថ្ងៃ»។ ថេរដីកាព្រះតេជព្រះគុណ ថូ ធូររស់ លើកឡើងបែបនេះ​ ដោយបន្ថែមថានៅក្នុងព្រៃសង្ឃមានផ្ទៃដីធំ ដូច្នេះការល្បាតកំពុងជួបផលលំបាកមួយចំនួនដូចជា ទីមួយពាក់ព័ន្ធមធ្យោបាយនៃការល្បាត ទីពីរទាក់ទងការចំណាយជាប្រចាំសម្រាប់ការផ្គត់ផ្គង់លើការល្បាត។
 

​បច្ចុប្បន្នកិច្ចការពារព្រៃឈើ បានទទួលជំនួយថវិកា​ពីអង្គការដៃគូមួយចំនួន ប៉ុន្ដែកញ្ចប់នោះមិនទាន់គ្រប់គ្រាន់សម្រាប់ទ្រទ្រង់លើសកម្មភាពល្បាតប្រចាំថ្ងៃឡើយ។ លើសពីនេះនៅក្នុងរដូវវស្សាសកម្មភាពល្បាតអាចជួបបញ្ហាជាងរដូវប្រាំង។ ព្រះតេជព្រះគុណ ថូ ធូររស់ មានថេរដីការដូច្នេះ៖​  «​ នៅរដូវវស្សានេះនៅក្នុងព្រៃផ្លូវកាន់លំបាក សមាជិកខ្វះសម្ភារៈក្នុងពេលល្បាត ដូចជា សាំង ម៉ាស៊ូត តង់ និងសម្លៀកបំពាក់ និងសម្ភារៈជាតម្រូវការមួយចំនួនទៀត»។

ទន្ទឹមនឹងផលលំបាកខាងលើ សហគមន៍ក៏កំពុងជួបបញ្ហាមួយចំនួន កើតចេញពីពលរដ្ឋខ្លះរស់នៅជុំវិញព្រៃសង្ឃសហគមន៍ មិនចូលរួមបានស្វែងយល់ និងមិនចូលរួមសកម្មភាពការពារ និងអភិរក្សជីវៈចម្រុះ។ បន្ថែម​លើនេះ ពួកគាត់បានក្លាយជាអ្នកប្រព្រឹត្តិបទល្មើសសកម្ម ក្នុងការបំផ្លាញធនធាននៅក្នុងសហគមន៍៕   

 

កំណាត់ឈើដាក់ឆ្លងព្រំ ដោយជនល្មើសនៅក្នុងព្រៃសង្ឃសហគមន៍រុក្ខាវ័ន