កីឡាជាតិ
ជាតិ
ប៉ារ៉ាហ្គេម៖កីឡាការិនី ងួន រតនា រកបានមេដាយទី២ លើវីញ្ញាសារត់ចម្ងាយ កីឡាការិនីកម្ពុជា ងួន រតនា ប្រកួតលើវិញ្ញាសារត់ចម្ងាយ ៨០០ម៉ែត្រ T46 (រូបពី Cambodia2023)
×
ដោយ៖ ហៀក ឆក
កីឡាការិនីកម្ពុជា ងួន រតនា ដណ្តើមបានមេដាយប្រាក់១ និងជាមេដាយទី២ របស់ខ្លួនលើវិញ្ញាសារត់ចម្ងាយ ៨០០ម៉ែត្រ ប្រភេទT46 ក្នុងព្រឹត្តិការណ៍កីឡាអាស៊ានប៉ារ៉ាហ្គេមលើកទី១១ នាទីក្រុងសូឡូ ប្រទេសឥណ្ឌូណេស៊ី។
បន្ទាប់ពីទទួលបានមេដាយមាសលើវិញ្ញាសារត់ចម្ងាយ ៤០០ម៉ែត្រ ប្រភេទ T46 កីឡាការិនី ងួន រតនា បន្តធ្វើបានល្អបន្ថែមទៀតដោយបានប្រកួតប្រជែងជាមួយកីឡាការិនីមកពីប្រទេសថៃ Pagjiraporn ក្នុងប្រភេទកីឡាអត្តពលិកម្មលើវិញ្ញាសារត់ចម្ងាយ ៨០០ម៉ែត្រ ប្រភេទ T46។
ទោះបីមិនអាចដណ្តើមបានមេដាយមាសក្តី តែកីឡាការិនីកម្ពុជារូបនេះ នៅតែអាចរក្សាដំណែងមេដាយប្រាក់បានសម្រាប់កម្ពុជា។ ការប្រកួតដ៏ប្រផិតប្រផើយរវាងកីឡាការិនីទាំងពីរគឺខុសគ្នានូវវិនាទីតែបន្តិចបន្តួចប៉ុណ្ណោះ ដោយកីឡាការិនីកម្ពុជាបញ្ចប់ក្នុងរយៈពេល ៣នាទី ១៩វិនាទី និង៩៩សេកុង ខណៈម្ចាស់មេដាយមាសថៃ បញ្ចប់ក្នុងរយៈពេល ៣នាទី ១៩វិនាទី និង២៨ សេកុង។
បញ្ចប់ការប្រកួតកីឡាការិនីកម្ពុជា គ្រងមេដាយប្រាក់ ចំណែកកីឡាការិនីថៃគ្រងដំណែងមេដាយមាស។ គិតត្រឹមពេលនេះសម្រាប់អត្តពលិកកម្ពុជាទទួលបានមេដាយសរុប២៤ ក្នុងនោះមេដាយមាស៦ ប្រាក់៩ និងសំរឹទ្ធ៩ ក្នុងព្រឹត្តិការណ៍អាស៊ានប៉ារ៉ាហ្គេមលើកទី១១ ក្រុងសូឡូ ប្រទេសឥណ្ឌូណេស៊ី ថ្ងៃទី៤ សីហា៕
Tag:
កីឡាអត្តពលកម្ម
អាស៊ានប៉ារ៉ាហ្គេម
© រក្សាសិទ្ធិដោយ thmeythmey.com