ជាតិ
សង្គមជាតិ
ក្រសួងការងារ ព្រមានលោកស្រី យ៉ាង សុភ័ណ្ឌ ឲ្យបញ្ឈប់សកម្មភាពដឹកនាំកម្មករណាហ្គាវើលដ៍ លោកស្រី យ៉ាង សុភ័ណ្ឌ ប្រធានសហព័ន្ធសហជីពកម្ពុជា។ រូបពីហ្វេសប៊ុក លោក ឃុន ថារ៉ូ
× ភ្នំពេញ៖ ក្រសួងការងារ ព្រមានលោកស្រី យ៉ាង សុភ័ណ្ឌ ប្រធានសហព័ន្ធសហជីពកម្ពុជា ឲ្យបញ្ឈប់ជាបន្ទាន់រាល់សកម្មភាពល្មើសច្បាប់ ពាក់ព័ន្ធនឹងដឹកការដឹកនាំក្រុមតវ៉ាណាហ្គាវើលដ៍ បើពុំនោះទេនឹងចាត់វិធានការតាមច្បាប់។ ប៉ុន្តែ មេសហជីពចាត់ទុកការព្រមាននេះ ជាការចោទប្រកាន់។
ក្រសួងការងារ និងបណ្ដុះបណ្ដាលវិជ្ជាជីវៈ ពិនិត្យឃើញសកម្មភាព លោកស្រី យ៉ាង សុភ័ណ្ឌ ដែលពាក់ព័ន្ធនឹងក្រុមតវ៉ាណាហ្គាវើលដ៍នាពេលកន្លងមក គឺល្មើសច្បាប់។ លិខិតព្រមាន ចេញដោយលោក អាំង សេងលី ប្រធាននាយកដ្ឋានវិវាទការងារ កាលពីថ្ងៃទី៤សីហា ដែលក្រសួងបានបង្ហោះលើទំព័រហ្វេប៊ុកនៅរសៀលថ្ងៃទី៥សីហានេះ លើកឡើងថា លោកស្រី យ៉ាង សុភ័ណ្ឌ កន្លងមកបានដឹកនាំនិងធ្វើសកម្មភាពខុសវិជ្ជាជីវៈនៃលក្ខន្តិកៈសហព័ន្ធសហជីព ពាក់ព័ន្ធនឹងវិវាទក្រុមហ៊ុនណាហ្គាវើលដ៍។ ក្រសួងបានសង្កត់ធ្ងន់ថា លោកស្រី ដឹកនាំនិងបង្ខិតបង្ខំកម្មករនិយោជិតឲ្យចូលរួមធ្វើកូដកម្មតវ៉ា។
ជាមួយគ្នាដែរ ក្រសួងបញ្ជាក់ថា សកម្មភាពដែលលោកស្រីចូលរួមជាមួយក្រុមអ្នកតវ៉ាណាហ្គាវើលដ៍កន្លងមក គឺផ្ទុយនឹងច្បាប់ស្ដីពីសហជីព។ ក្រសួងបានព្រមានយ៉ាងដូច្នេះថា៖ «ចាប់ពីថ្ងៃទទួលបាននូវលិខិតព្រមាននេះ សូមលោកស្រីបញ្ឈប់ជាបន្ទាន់នូវសកម្មភាពល្មើសខាងលើ។ ករណីមិនគោរពតាមការព្រមនេះ ត្រូវទទួលរងការផ្តន្ទាទោសតាមច្បាប់ជាធរមាន»។
ប៉ុន្តែ អ្នកស្រី យ៉ាង សុភ័ណ្ឌ យល់ឃើញថា ក្រសួងចោទប្រកាន់លោកស្រី ដោយគ្មានភ័ស្តុតាងច្បាស់លាស់ឡើយ។ មេសហជីពរូបនេះ ស្នើសុំឲ្យក្រសួង បញ្ជាក់ករណីដែលចោទប្រកាន់លោកស្រីឲ្យលម្អិត រួមមានពេលវេលា ហើយបុគ្គលណាដែលលោកស្រីបង្ខិតបង្ខំ។
កន្លងលោកស្រី ធ្វើសកម្មភាពតាមវិជ្ជាជីវៈស្របតាមច្បាប់ ពិសេសគឺការឃ្លាំមើលសកម្មភាពរបស់ក្រុមអ្នកតវ៉ា។ ដូច្នេះ ការចោទប្រកាន់របស់ក្រសួងពុំមានឥទិ្ធពលឡើយ ហើយលោកស្រី នៅតែបន្តចូលរួមឃ្លាំមើលសកម្មក្រុមតវ៉ាណាហ្គាវើលដ៍ដូចដើម។
ក្នុងកិច្ចសម្ភាសជាមួយសារព័ត៌មានថ្មីៗតាមប្រព័ន្ធទូរស័ព្ទ លោកស្រីថា៖ «ខ្ញុំអត់បានដឹកនាំ ឬជ្រៀតជ្រែកខុសលក្ខន្តិកៈសហជីពឡើយ។ សួរថា ខ្ញុំទៅបង្ខិតបង្ខំកម្មករមួយណា? ពេលណាថ្ងៃណា? ហើយមានកម្មប្ដឹងខ្ញុំឬនៅ? អ្វីដែលខ្ញុំចូលរួមកន្លងជាអ្នកតវ៉ាណាហ្គាវើលដ៍ គឺការឃ្លាំមើលលើសិទ្ធិការងារ…ទៅថ្ងៃមុនខ្ញុំនៅតែបន្តចូលរួមឃ្លាំមើលដដែល»។
មេសហជីរូបនេះ ប្រាប់ក្រសួងវិញថា ពុំមែនក្រសួងចោទអ្នកស្រីថាខុសច្បាប់និងព្រមានដូចខាងលើទាំងខុសទំនង ហើយ អ្នកស្រីពិតជាខុសមែននោះទេ ព្រោះអ្នកស្រីយល់ដឹងច្បាប់ អនុវត្តតាមច្បាប់និងវិជ្ជាជីវៈ។ ដូច្នេះ អ្នកស្រី បន្តរក្សាជំហរឃ្លាំមើលក្រុមណាហ្គាវើលដ៍ដដែល៕ © រក្សាសិទ្ធិដោយ thmeythmey.com