ខ្មែរក្រហម
ជាតិ
រដ្ឋាភិបាលកម្ពុជានឹងផ្តល់ថវិកា ១,១ លានដុល្លារដល់សាលាក្ដីខ្មែរក្រហម
× រាជរដ្ឋាភិបាលកម្ពុជា នឹងមានលទ្ធភាពផ្តល់ថវិកាចំនួន ១,១ លានដុល្លារអាមេរិកសម្រាប់បើកប្រាក់បៀវត្សរ៍ជូនដល់មន្ត្រីបុគ្គលិកភាគីជាតិ រួមទាំងចៅក្រម ព្រះរាជអាជ្ញាផងដែរ សម្រាប់ត្រីមាសទី១ ឆ្នាំ២០១៤ នេះ។ នេះសេចក្តីថ្លែងការណ៍រួមរវាងរាជរដ្ឋាភិបាលកម្ពុជា និងគណៈប្រតិភូជាន់ខ្ពស់អង្គការសហប្រជាជាតិពាក់ពន្ធ័នឹងអង្គជំនុំជម្រះវិសាមញ្ញក្នុងតុលាការកម្ពុជា នៅថ្ងៃទី២៨ ខែមករានេះ។
សេចក្ដីប្រកាសនេះត្រូវបានធ្វើឡើងនៅក្នុងកិច្ចប្រជុំរវាងលោកឧបនាយករដ្ឋមន្ត្រី សុខ អាន និងគណៈប្រតិភូជាន់ខ្ពស់ អង្គការសហប្រជាជាតិ(អ.ស.ប.) ដឹកនាំដោយលោក Miguel de Serpa Saores អគ្គលេខាធិការរង អ.ស.ប. ទទួលបន្ទុកផ្នែកច្បាប់ អមដោយលោកស្រី Maria Eugenia Casar ឧបការីអគ្គលេខាធិការ និងជាអគ្គហិរញ្ញិក អ.ស.ប និងលោកឯកអគ្គរដ្ឋទូត ដេវីដ សេហ្វ័រ អ្នកជំនាញការពិសេសរបស់អគ្គលេខាធិការ អ.ស.ប ទទួលបន្ទុកសាលាក្តីខ្មែរក្រហម។
ពាក់ព័ន្ធទៅនឹងការផ្ដល់ថវិកានេះដែរ លោក សុខ អាន ក៏បានលើកឡើងថាកម្ពុជាគាំទ្រលើគម្រោងសំណើបច្ចុប្បន្នរបស់គណៈកម្មការទី៥នៃមហាឮសន្និបាត ក្នុងកិច្ចប្រជុំរបស់ខ្លួននៅអំឡុងខែមីនា ឆ្នាំ២០១៤ខាងមុខនេះ ដើម្បីអនុម័តលើការផ្តល់ឧបត្ថម្ភធនដល់សាលាក្ដី ដែលបានមកពីវិភាគទានទៀងទាត់របស់ អ.ស.ប។
ភាគីទាំងពីរបានឯកភាពបន្តកិច្ចសហប្រតិបត្តិ ការជាមួយគ្នាលើរាល់បញ្ហាពាក់ព័ន្ធនឹង អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) និងបាន បង្ហាញពីការតាំងចិត្តក្នុងការជម្នះនូវបញ្ហាប្រឈមផ្នែកថវិកាដែល អ.វ.ត.ក. កំពុងជួបប្រទះ ដើម្បីចៀសវាងការពន្យារពេលណាមួយនៅក្នុងនីតិវិធីតុលាការ និងធានាបាននូវសុខុមាលភាពរបស់បុគ្គលិកទាំងភាគីជាតិ និងអន្តរជាតិ។
លោកឧបនាយករដ្ឋមន្ត្រីក៏បានសម្តែងនូវទស្សនៈ របស់រាជរដ្ឋាភិបាលកម្ពុជា នៅក្នុងការសម្រេចឲ្យបានឆាប់រហ័សតាមតែអាចធ្វើទៅបាន នូវផែនទីបង្ហាញផ្លូវច្បាស់លាស់មួយ ឈានទៅរកយុទ្ធសាស្ត្របញ្ចប់សម្រាប់ អ.វ.ត.ក ហើយភាគីទាំងពីរបានប្តេជ្ញាចិត្តរបស់ខ្លួនក្នុងការបន្តគាំទ្រ អ.វ.ត.ក និង សម្រេចឲ្យបាននូវយុត្តិធម៌ប្រឆាំងនឹងឧក្រិដ្ឋកម្មអន្តរជាតិ៕
© រក្សាសិទ្ធិដោយ thmeythmey.com