អន្តរជាតិ
Hacker មួយរូបប្រកាសលក់ទិន្នន័យអ្នកប្រើប្រាស់កម្មវិធីជំងឺកូវីដ-១៩ នៅចិនចំនួន៤៨,៥គណនី រូបភាព៖Reuters
× Hacker មួយរូប (អ្នកវាយប្រហារទិន្នន័យតាមប្រព័ន្ធអ៊ីនធឺណិត) បានប្រកាសលក់ទិន្នន័យអ្នកប្រើប្រាស់កម្មវិធីសុខភាព ទាក់ទិនជំងឺកូវីដ-១៩ ដែលដំណើរការដោយក្រុងសៀងហៃចំនួន ៤៨,៥គណនី ក្នុងតម្លៃជាង ៤ពាន់ដុល្លារ។ នេះជាការធ្លាយទិន្នន័យសាធារណៈលើកទីពីរ នៅក្នុងក្រុងសៀងហៃ ក្នុងរយៈពេលត្រឹមមួយខែប៉ុណ្ណោះ។
Hacker មួយរូប ដែលបានដាក់ឈ្មោះ «XJP» បានដាក់លក់ទិន្នន័យអ្នកប្រើប្រាស់កម្មវិធីសុខភាព ទាក់ទិនជំងឺកូវីដ-១៩ ដែលដំណើរការដោយក្រុងសៀងហៃ ចំនួន ៤៨,៥គណនី លើវេទិកា Breach Forums ក្នុងថ្ងៃទី១០ ខែសីហា។ តម្លៃនៃទិន្នន័យទាំងនោះមានចំនួន ៤៨៥០ដុល្លារ។
តាមរយៈគំរូចំនួន ៤៧គណនី ដែលHacker បានបញ្ចេញ វាមានដូចជា លេខទូរសព្ទ ឈ្មោះ លេខអត្តសញ្ញាណជនជាតិចិន និងលេខកូដសុខភាព។
តាមការចុះផ្សាយរបស់ទីភ្នាក់ងារព័ត៌មាន Reuters មនុស្សចំនួន ១១នាក់ ក្នុងចំនួន ៤៧នាក់ ត្រូវបានទាក់ទងទៅ ប៉ុន្តែមនុស្សចំនួន ២នាក់ប៉ុណ្ណោះ ដែលអះអាងថាលេខអត្តសញ្ញាណរបស់គេ គឺខុស។
«ទិន្នន័យនេះ មានបញ្ជាក់ពីបុគ្គល ដែលរស់នៅ និងធ្លាប់មកក្រុងសៀងហៃ ចាប់តាំងពីការប្រើប្រាស់កម្មវិធី Suishenma»។ Hacker ដែលដាក់ឈ្មោះ «XJP» បានបញ្ជាក់បែបនេះ។
កម្មវិធី Suishenma ជាប្រព័ន្ធលេខកូដសុខភាពរបស់ក្រុងសៀងហៃ ដែលត្រូវបានបង្កើតឡើង ដើម្បីប្រយុទ្ធប្រឆាំងនឹងជំងឺកូវីដ-១៩។ កម្មវិធីមួយនេះ បញ្ជាក់ប្រាប់ប្រជាជនពីតំបន់ក្រហម លឿង និងបៃតងនៃជំងឺកូវីដ-១៩ ផង។
គួររំឭកថា នៅខែមុន ក្រុមHacker បានអះអាងថា ពួកគេបានទាញយកទិន្នន័យរបស់ប្រជាជនចិន ចំនួន ២៣ terabytes ពីប៉ូលិសក្រុងសៀងហៃ៕
© រក្សាសិទ្ធិដោយ thmeythmey.com