ថ្លែងប្រាប់សារព័ត៌មានថ្មីៗតាមទូរសព្ទ អំឡុងពេលកំពុងធ្វើដំណើរត្រឡប់មកខេត្តសៀមរាបវិញ នារសៀលថ្ងៃទី១២ ខែសីហា ប្រធានមន្ទីរអប់រំ យុវជន និងកីឡា ខេត្តសៀមរាប លោក លី ប៊ុណ្ណា បានចាត់ទុកជ័យលាភីកម្មវិធីប្រកួតដេញដោលយុវជនថ្នាក់ជាតិ ២០២២ នៅពេលនេះ ថាជាជ័យជំនះដ៏ត្រចេះត្រចង់សម្រាប់ខេត្តសៀមរាប។ លោកប្រាប់ថា នេះជាលើកដំបូងហើយសម្រាប់ខេត្តសៀមរាប ដែលទទួលបានពានរង្វាន់ ខណៈដែលកន្លងមក កម្មវិធីនេះរៀបចំសម្រាប់គ្រឹះស្ថានឯកជនតែប៉ុណ្ណោះ តែឆ្នាំនេះ ក្រសួងអប់រំ តាមរយៈនាយកដ្ឋានយុវជន បានបើកទូលាយឱ្យវិស័យសាធារណ និងឯកជនចូលរួម។ 

 

សម្រាប់លោក លី ប៊ុណ្ណា កម្មវិធីនេះពិតជាមានសារសំខាន់ណាស់សម្រាប់យុវជន ព្រោះវាបានបណ្ដុះបណ្ដាលសមត្ថភាព ជំរុញឱ្យសិស្សមានការស្រាវជ្រាវច្រើន អភិវឌ្ឍន៍សមត្ថភាពជាបន្តបន្ទាប់ទាំងចំណេះដឹងទូទៅ និងការនិយាយ។ ក្នុងនាមថ្នាក់ដឹកនាំវិស័យអប់រំខេត្ត លោកប្រាប់ថា នឹងជំរុញឱ្យសាលា បន្តចូលរួមកម្មវិធីដូច្នេះឱ្យបានកាន់តែច្រើនបន្ថែមទៀត។

 

សូមបញ្ជាក់ថា នៅវគ្គផ្ដាច់ព្រ័ត្រកម្មវិធីជជែកដេញដោលយុវជនថ្នាក់ជាតិ ២០២២ ធ្វើឡើងនៅថ្ងៃទី១២ ខែសីហា ក្រោមប្រធានបទ «យុវជនត្រូវមានចំណេះដឹង បំណិន និងចរិយាធម៌ជាពលរដ្ឋល្អ ដើម្បីក្លាយទៅជាសសរទ្រូងពិតប្រាកដរបស់ប្រទេសជាតិ»។ ក្នុងនោះ ក្រុមស្រប គឺយុវសិស្សមកពី សាលា ប៊ែលធី អន្ដរជាតិ រីឯក្រុមបដិសេធ យុវសិស្សមកពីវិទ្យាល័យ ហ៊ុន​ សែន ប្រាសាទបាគង៕

 

ព័ត៌មានពិស្ដារ សូមស្ដាប់បទសម្ភាសរវាងអ្នកសារព័ត៌មានថ្មីៗ ជាមួយលោក លី ប៊ុណ្ណា ដូចតទៅនេះ៖