អន្តរជាតិ
បៃឌិន ចាត់ទុកឥណ្ឌាជាដៃគូខ្វះមិនបាន ក្នុងថ្ងៃខួបឯករាជ្យឥណ្ឌាលើកទី៧៥ លោក នារិន្ទ្រា ម៉ូឌី នាយករដ្ឋមន្រ្តីឥណ្ឌា ជាមួយលោកចូ បៃឌិន ប្រធានាធិបតីអាម៉េរិក។ រូបភាព៖ AFP
× ប្រធានាធិបតីអាម៉េរិក លោក ចូ បៃឌិន នៅថ្ងៃទី១៤ ខែសីហា បានអបអរសាទរខួបឯករាជ្យជាតិឥណ្ឌាលើកទី៧៥ ដោយបានចាត់ទុកអាម៉េរិក និងឥណ្ឌា ជាដៃគូគ្នាមិនអាចខ្វះបាន ដែលត្រូវបន្តធ្វើការជាមួយគ្នា ដើម្បីដោះស្រាយបញ្ហាសកលរួមគ្នាច្រើនឆ្នាំទៅមុខ។
ថ្ងៃទី១៥ ខែសីហា ឆ្នាំ២០២២ ជាថ្ងៃរំលឹកខួបលើកទី៧៥ ដែលឥណ្ឌាទទួលបានឯករាជ្យជាតិពីអាណានិគមអង់គ្លេសក្នុងឆ្នាំ ១៩៤៧។ មុននេះមួយថ្ងៃ ប្រធានាធិបតីអាម៉េរិក លោក ចូ បៃឌិន បានចេញសេចក្ដីថ្លែងការណ៍មួយ អបអរសាទរឥណ្ឌាចំពោះថ្ងៃសំខាន់នេះ និងបានហៅប្រទេសអាស៊ីខាងត្បូងមួយនេះ ជាដៃគូមិនអាចខ្វះបាន។
«ឥណ្ឌា និងអាម៉េរិក ជាដៃគូដែលមិនអាចខ្វះបាន ហើយភាពជាដៃគូយុទ្ធសាស្ត្រអាម៉េរិក និងឥណ្ឌា ជាបាតគ្រឹះនាំឱ្យមានការប្តេជ្ញាចិត្តរួមគ្នារវាងយើងទាំងពីរ ចំពោះនីតិរដ្ឋ និងការលើកកម្ពស់សេរីភាព និងសេចក្តីថ្លៃថ្នូររបស់មនុស្ស»។ ប្រមុខរដ្ឋអាម៉េរិក បានលើកឡើងបែបនេះ។
លោក បៃឌិន ក៏បានរំលឹកទៅដល់មេដឹកនាំចលនាទាមទារឯករាជ្យរបស់ឥណ្ឌាលោក Mahatma Gandhi ផង។ បើតាមមេដឹកនាំរូបនេះ អាម៉េរិកសូមចូលរួមជាមួយប្រជាជនឥណ្ឌា ដើម្បីគោរពដល់ដំណើរប្រជាធិបតេយ្យរបស់ពួកគេ ដែលនាំផ្លូវដោយភាពពិត និងអហិង្សាដ៏យូរអង្វែងមកហើយ។ ប្រធានាធិបតីអាម៉េរិក បានបន្តថា ថ្ងៃខួបឯករាជ្យជាតិលើកទី៧៥ របស់ឥណ្ឌាប្រៀបដូចជាខួប៧៥ឆ្នាំ នៃទំនាក់ទំនងការទូតរវាងអាម៉េរិក និងឥណ្ឌាដែលជាប្រទេសប្រជាធិបតេយ្យដ៏អស្ចារ្យ២ក្នុងពិភពលោកដែរ។
ជាងនេះទៅទៀត លោក បៃឌិន ក៏បានបញ្ជាក់ថា សហគមន៍ប្រជាជនអាម៉េរិកដែលមានដើមកំណើតឥណ្ឌាបានធ្វើឱ្យប្រទេសលោកមានការច្នៃប្រឌិតខ្ពស់ មានភាពរួមបញ្ជូលកាន់ តែខ្លាំង និងក្លាយជាសង្គមជាតិមួយរឹងមាំជាងមុន។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
លោក បៃឌិន បានថ្លែងបញ្ចប់ដោយបង្ហាញទំនុកចិត្តខ្ពស់ចំពោះទំនាក់ទំនងរវាងប្រទេសប្រជាធិបតេយ្យទាំងពីរជាច្រើនឆ្នាំទៅមុខទៀត ដែលនឹងបន្តឈរជាមួយគ្នាដើម្បីការពារសណ្តាប់ធ្នាប់ដែលផ្អែកលើច្បាប់ ពង្រឹងសន្តិភាព វិបុលភាព និងសន្តិសុខសម្រាប់ប្រជាជន ជំរុញការអភិវឌ្ឍដោយបើកចំហ និងដោយសេរីនៅឥណ្ឌូប៉ាស៊ីហ្វិក ហើយរួមគ្នាដោះស្រាយបញ្ហាប្រឈមដែលជួបប្រទះជុំវិញពិភពលោក៕
© រក្សាសិទ្ធិដោយ thmeythmey.com