អន្តរជាតិ
បក្សប្រឆាំងថៃនឹងដាក់ពាក្យបណ្តឹងទៅតុលាការធម្មនុញ្ញ ដើម្បីកំណត់ថ្ងៃត្រូវផុតអាណត្តិរបស់លោក ប្រាយុទ្ធ លោកប្រាយុទ្ធ ចន្ទអូចា នាយករដ្ឋមន្រ្តីថៃ។ រូបភាព៖ AFP
× បក្ស Pheu Thai ដែលជាបក្សប្រឆាំងដ៏សំខាន់មួយរបស់ថៃ បានកំណត់ថ្ងៃដាក់ពាក្យបណ្ដឹងទៅតុលាការធម្មនុញ្ញ នៅថ្ងៃទី១៧ ខែសីហា ដើម្បីសម្រេចថាតើលោកប្រាយុទ្ធ ចន្ទអូចា នាយករដ្ឋមន្រ្តីថៃ ត្រូវដល់អាណត្តិ ដែលមានរយៈពេល ៨ឆ្នាំ ត្រឹមថ្ងៃទី២៤ ខែសីហា ឬយ៉ាងណា។
គណបក្សប្រឆាំងដ៏ធំនៅថៃ Pheu Thai បានស្វះស្វែងរកសេចក្តីសម្រេចរបស់តុលាការ ដើម្បីកំណត់អាណត្តិរបស់លោក ប្រាយុទ្ធ ចន្ទអូចា នាយករដ្ឋមន្រ្តីថៃ។ តាមការចុះផ្សាយរបស់សារព័ត៌មាន The Nation បក្ស Pheu Thai នឹងដាក់ពាក្យបណ្ដឹងទៅតុលាការធម្មនុញ្ញ នៅថ្ងៃទី១៧ ខែសីហា ដើម្បីសម្រេចអាណត្តិរបស់នាយករដ្ឋមន្ត្រីថៃ។ រដ្ឋធម្មនុញ្ញថៃឆ្នាំ២០១៧ បានកំណត់អ្នកនយោបាយអាចកាន់តំណែងបានត្រឹម ២អាណត្តិ ដែលមានរយៈពេល ៨ឆ្នាំប៉ុណ្ណោះ។
អ្នកនាំពាក្យគណបក្ស Pheu Thai លោកស្រី Theerarat Samretwanich នៅថ្ងៃទី១៤ ខែសីហា បាននិយាយថា គណបក្សកំពុងពិនិត្យមើលព័ត៌មានលម្អិត ដើម្បីធានាថាពាក្យបណ្ដឹងរបស់បក្សមានប្រសិទ្ធភាពដោយគ្របដណ្តប់គ្រប់ទិដ្ឋភាពទាំងអស់។ លោកស្រី Theerarat ជឿថាអាណត្តិរបស់លោក ប្រាយុទ្ធ នឹងបញ្ចប់មុនថ្ងៃទី២៤ ខែសីហា ប្រសិនបើតុលាការបកស្រាយច្បាប់ដោយយុត្តិធម៌។
«ប្រសិនបើតុលាការមានភាពយុត្តិធម៌ នោះយើងមានទំនុកចិត្តថា តំណែងនាយករដ្ឋមន្ត្រីរបស់លោក ប្រាយុទ្ធ នឹងបញ្ចប់មុនថ្ងៃទី២៤ ខែសីហា»។ លោកស្រី Theerarat អ្នកនាំពាក្យគណបក្ស Pheu Thai អះអាងបែបនេះ ហើយលោកស្រីក៏បានអំពាវនាវដល់ប្រជាពលរដ្ឋថៃឲ្យតាមដានដំណើរការនេះ ហើយមើលថាតើតុលាការបកស្រាយច្បាប់ដោយយុត្តិធម៌ឬយ៉ាងណា។
មេដឹកនាំបក្ស Pheu Thai ធ្លាប់បានអះអាងថា អាណត្តិរបស់លោកប្រាយុទ្ធ នឹងត្រូវផុតត្រឹមថ្ងៃទី២៤ ខែសីហា ដោយសារលោកត្រូវបានតែងតាំងជាប្រធានក្រុមប្រឹក្សាជាតិសម្រាប់សណ្តាប់ធ្នាប់ និងសន្តិភាព បន្ទាប់ពីរដ្ឋប្រហារនៅក្នុងឆ្នាំ២០១៤។
យ៉ាងណាមិញ ក្រុមអ្នកច្បាប់នៃសភាតំណាងរាស្រ្ត បានអះអាងថា លោកប្រាយុទ្ធនឹងផុតអាណត្តិនៅឆ្នាំ ២០២៧ ព្រោះព្រះមហាក្សត្រថៃតែងតាំងជានាយករដ្ឋមន្រ្តីនៅក្នុងឆ្នាំ២០១៩។ វាមានមតិផ្សេងទៀតថា លោកប្រាយុទ្ធនឹងផុតអាណត្តិនៅឆ្នាំ២០២៥ បើផ្អែកលើអាណត្តិរបស់លោកប្រាយុទ្ធ បន្ទាប់ពីរដ្ឋធម្មនុញ្ញត្រូវបានអនុម័តនៅក្នុងឆ្នាំ២០១៧។
ទាក់ទិននឹងបេក្ខភាពកាន់តំណែងបន្ដក្នុងករណីលោកប្រាយុទ្ធដល់អាណត្តិ លោកស្រី Theerarat បានលើកឡើងថា អ្នកដែលមានសិទ្ធិចូលកាន់តំណែងបន្ទាប់ពីលោក Prayut គឺ Chaikasem Nitisiri, Chadchart Sittipunt និង Sudarat Keyuraphan មកពីគណបក្សប្រឆាំង ឬរដ្ឋមន្ត្រីក្រសួងសុខាភិបាល Anutin Charnvirakul និង Abhisit Vejjajiva នៃគណបក្សប្រជាធិបតេយ្យ។ ចំណែកឧបនាយករដ្ឋមន្ត្រី Prawit Wongsuwan និងជាមេដឹកនាំគណបក្ស Palang Pracharath មិនមានសិទ្ធិក្លាយជាអ្នកបន្តតំណែងទេផ្អែកតាមរដ្ឋធម្មនុញ្ញ៕
© រក្សាសិទ្ធិដោយ thmeythmey.com