អគ្គស្នងការនគរបាលជាតិ អះអាងថា ក្នុងចំណោមពួកគេទាំង១៤៦នាក់នោះ អ្នកប្រើសារធាតុញៀន មាន១០០នាក់ និង៤៦នាក់ទៀត ពុំបានប្រើឡើយ។ ក្នុងចំណោមពួកគេទាំងអស់នោះ ក៏ជនអនាថា ស្រ្តីមានផ្ទៃពោះ និងកុមារផងដែរ។ ប្រភពដដែល បានឲ្យដឹងថា ភាគច្រើនក្នុងចំណោមពួកគេ ត្រូវបានបញ្ជូនទៅមណ្ឌលស្ថារនីតិសម្បទា ហើយមួយចំនួនតួច ពិសេសស្រ្តីនិងកុមារ ត្រូវបានបញ្ជូនទៅមន្ទីរសង្គមកិច្ចខេត្តបាត់ដំបង។ 

 

លោក  ពេជ្រ សារ៉ែន អធិការនៃអធិការដ្ឋាននគរបាលក្រុងបាត់ដំបង បានប្រាប់សារព័ត៌មានថ្មីៗ នៅថ្ងៃទី១៥ សីហា ថា ការចុះធ្វើប្រតិបត្តិប្រមូលយុវជនប្រុសស្រីជាង១០០នាក់នេះ គឺស្ថិតនៅទីតាំងផ្សេងៗគ្នាតាមឃុំ-សង្កាត់ ក្នុងក្រុងបាត់ដំបង។ លោកអធិការ បញ្ជាក់ថា៖«កិច្ចប្រតិបត្តិការខាងលើនេះ គោលបំណងដើម្បីរក្សាសន្តិសុខ សុវត្ថិភាព ការពារទប់ស្កាត់រាល់ក្មេងទំនើង កុំឲ្យបង្កបញ្ហាអសន្តិសុខផ្សេងៗ នៅក្នុងមូលដ្ឋាន និងដើម្បីពិនិត្យស្វែងរកអ្នកពាក់ព័ន្ធសារធាតុញៀន និងអ្នកប្រើប្រាស់ថ្នាំញៀន»៕