ក្រៅពីអ្នកមានពិការភាព ស្ត្រីមានផ្ទៃពោះ កុមារ ជនចាសជរា ក៏ទទួលបានអាទិភាព ចូលទៅពិនិត្យពិគ្រោះជំងឺ មុនគេផងដែរ។  លោក លី ប៊ុណ្ណារិទ្ធ មានប្រសាសន៍ថា៖ «ខ្ញុំបានតែងតែដាក់វិធានការទៅហើយ។ ចំពោះជនពិការ កុមារ ចាស់ជរា ខ្ញុំឱ្យអាទិភាពមុន។ អាទិភាពហ្នឹង គឺត្រូវផ្តល់សេវាជូនគាត់មុន។ មានលេខចាប់កាល(ពី)មុន តែឥឡូវ យល់ដឹងហើយ លែងឱ្យចាប់លេខទៅហើយ»។  

 

 

លោក អ៊ុក សីហា អាយុ ៧១ឆ្នាំ ជាពលរដ្ឋរស់នៅភូមិស្វាយធំ ឃុំត្រពាំងធំ ស្រុកទឹកឈូ ខេត្តកំពត ដែលតែងតែទៅទទួលសេវាសុខភាពនៅមណ្ឌលសុខភាពព្រៃឃ្មុំ រាល់ពេលដែលលោកឈឺថ្កាត់។ ​លោកតា អ៊ុក សីហា មានពិការភាពជើងតាំងពីកុមារមកនោះ ឱ្យដឹងថា គ្រូពេទ្យនៅមណ្ឌលសុខភាពព្រៃឃ្មុំ តែងតែខ្នះខ្នែងក្នុងការផ្តល់សេវាសុខភាពដល់លោកដែលមានពិការភាព។ ពលរដ្ឋរូបនេះ អះអាងទៀតថា ​លោកតែងតែទទួលបានការស្វាគមន៍យ៉ាងរាក់ទាក់ជានិច្ច ពីគ្រូពេទ្យ។ «ទៅដល់គេ (ពេទ្យ) ទទួលរាក់ទាក់។ ពេទ្យនៅហ្នឹងស្រួល បើថាយើងទៅក្រោយគេ (ពេទ្យ)ប្រាប់ឱ្យចាំបន្តិច។ គេយកចិត្តទុកដាក់ ហើយគេអត់យកលុយទៀត»។  នេះជាការពន្យល់បន្ថែមរបស់លោក​ អ៊ុក សីហា។

 

 

ក្រៅពីសរសើរពីការផ្តល់សេវាសុខភាពរបស់គ្រូពេទ្យហើយនោះ លោក អ៊ុក សីហា ក៏មិនភ្លេចរំឭកពីជម្រាលសម្រាប់អ្នកពិការភាព ដែលមាននៅអគារមណ្ឌលសុខភាពនោះថា បានផ្តល់ភាពងាយស្រួល មួយកម្រិតដល់លោក ក្នុងពេលទៅទទួលសេវាសុខភាព។

 

 

ជុំវិញការសង់ជម្រាលសម្រាប់អ្នកមានពិការភាពនេះ លោក លី ប៊ុណ្ណារិទ្ធ បានបញ្ជាក់ថា ​គ្រូក្នុងនាមលោក ជាប្រធានមណ្ឌលសុខភាព គឺតែងតែគិតគូរដល់ជនដែលមានពិការភាពមុនគេ។ ហើយការដែលគាត់សាងសង់ជម្រាលនេះ បានផ្តល់ភាពងាយស្រួលដល់អ្នកមានពិការភាពផង និងដល់គ្រូពេទ្យផង។ «ការពារការគ្រោះថ្នាក់សម្រាប់គាត់(អ្នកមានពិការភាព)។ ឡើងអត់រួច (ចុះ)មកអត់រួច។ ឧទាហរណ៍គាត់ជិះរទេះមកអ៊ីចឹង ពិបាករុញ ពិបាកលើក។ (មានជម្រាល) ងាយស្រួលទាំងពេទ្យ មិនបាច់ជួយលើកគាត់ គាត់ក៏មិនបាច់ពឹងពេទ្យប៉ុន្មាន»។  ​នេះជាការពន្យល់របស់លោក លី ប៊ុណ្ណារិទ្ធ។  

 

 

ប្រធានមណ្ឌលសុខភាពរូបនេះ ក៏បើកចំហ និងទទួលទាំងការសរសើរ និងមតិរិះគន់ ក្នុងន័យស្ថាបនាចំពោះគុណភាពនៃការផ្តល់សេវាសុខភាព នៅមណ្ឌលសុខភាពព្រៃឃ្មុំនេះដែរ ដើម្បីរួមគ្នាធ្វើឱ្យការផ្តល់សេវាសុខភាព កាន់តែល្អប្រសើរសម្រាប់ពលរដ្ឋគ្រប់រូបនៅក្នុងឃុំ​៕

 

 

 

 

 

​

 

 

​