អន្តរជាតិ
ហ្វូងដំរីដើរនៅក្បែរភ្នំ Kilimanjaro នៅព្រឹកព្រលឹមថ្ងៃទី១៧ ខែធ្នូ ឆ្នាំ២០១២។
×![]()
ដោយ: VOA
ប្រទេសតង់សានី (Tanzania) បានដំឡើងអ៊ីនធឺណិតល្បឿនលឿននៅលើភ្នំ Kilimanjaro ដែលជាកំពូលភ្នំខ្ពស់បំផុតនៅទ្វីបអាហ្វ្រិក។
រដ្ឋមន្ត្រីក្រសួងព័ត៌មានតង់សានី លោក Nape Nnauye បានសម្ពោធដាក់ឱ្យដំណើរការប្រព័ន្ធអ៊ីនធឺណិតល្បឿនលឿនកាលពីថ្ងៃទី១៦ ខែសីហាកន្លងទៅ។ ប្រព័ន្ធអ៊ីនធឺណិតនេះ ត្រូវបានដំឡើងដោយក្រុមហ៊ុនទូរគមនាគមន៍គ្រប់គ្រងដោយរដ្ឋ ដែលជាផ្នែកមួយនៃគម្រោងលើកទឹកចិត្តដល់ការប្រើប្រាស់បច្ចេកវិទ្យាព័ត៌មាន សម្រាប់ការអភិវឌ្ឍសេដ្ឋកិច្ច និងសង្គមនៅក្នុងប្រទេសតង់សានី។
រដ្ឋមន្ត្រីក្រសួងព័ត៌មានរូបនេះនិយាយថា ពេលនេះអ្នកទេសចរអាចធ្វើការទំនាក់ទំនងជាមួយផ្នែក ផ្សេងៗទៀតនៃពិភពលោកពីតាំងចំនួនបីនៅលើភ្នំនេះ។
លោក Nnauye បាននិយាយក្នុងសម្តីដើមថា៖ «តាមរយៈការដំឡើងប្រព័ន្ធទំនាក់ទំនងនេះ យើងអាចទទួលបានភ្នាក់ងារដោយឥតគិតថ្លៃជាច្រើន ដែលនឹងផ្សព្វផ្សាយពីភ្នំរបស់យើង។ លោកបានបន្ថែមថា ជាឧទាហរណ៍ នៅពេលដែលពួកគេថតរូប និងចែករំលែករួបថតទៅកាន់ពិភពលោក នោះគឺជាអត្ថប្រយោជន៍សម្រាប់យើង។ អ្នកទេសចរនិងអ្នកផ្តល់សេវាឥឡូវនេះ នឹងទទួលបានអ៊ីនធឺណិតពីមជ្ឈម Mandara ទៅកាន់កំពូលភ្នំ Uhuru»។
សេវាអ៊ីនធឺណិតនេះរហូតមកដល់ពេលនេះ ក៏បានទៅដល់កំពូលភ្នំ Horombo ដែលជាចំណុចកំពូលភ្នំខ្ពស់បំផុតទីពីរ បន្ទាប់ពីកំពូលភ្នំ Uhuru ។ រដ្ឋាភិបាលតង់សានីនិយាយថា សេវាអ៊ីនធឺណិតគ្រោងនឹងឡើងទៅដល់កំពូលភ្នំ Uhuru នៅខែតុលាខាងមុខនេះ។
រដ្ឋាភិបាលនិយាយទៀតថា នៅពេលដែលសេវាកម្មអ៊ីនធឺណិតចាប់ផ្តើមនៅលើកំពូលភ្នំនោះ វានឹង ក្លាយជាចំណុចខ្ពស់បំផុតនៅលើពិភពលោក ដែលអាចប្រើប្រាស់សេវាអ៊ីនធឺណិតបាន៕
ប្រែសម្រួលដោយ អ៊ុន សុដាវី
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 3 ថ្ងៃ
