អតីតប្រមុខរដ្ឋាភិបាលជប៉ុន លោក អាប៉េ ស៊ិនហ្សូ ត្រូវបានខ្មាន់កាំភ្លើងបាញ់សម្លាប់នៅថ្ងៃទី៨ ខែកក្កដា ក្នុងអំឡុងពេលលោកស្វែងរកសំឡេងឆ្នោតសម្រាប់ការបោះឆ្នោតសភា នៅតំបន់ណារ៉ា។ ទាក់ទិននឹងការបាញ់សម្លាប់អតីតមេដឹកនាំជប៉ុនរូបនេះ លោក Itaru Nakamura ប្រធានទីភ្នាក់ងារប៉ូលិសជប៉ុន បានប្រកាសលាលែងពីតំណែង។ 

 

«វាមានការខ្វះខាតលើផែនការសន្តិសុខ និងការវាយតម្លៃហានិភ័យនៅទីតាំង រួមទាំងមន្រ្តីបញ្ជាការ គឺមិនគ្រប់គ្រាន់»។ លោក Nakamura បានប្រាប់អ្នកសារព័ត៌មានបែបនេះ នៅថ្ងៃទី២៥ ខែសីហា ដោយបន្តថា លោកបានដាក់សំណើលាលែងទៅគណៈកម្មការសុវត្ថិភាពសាធារណៈរួចហើយ។ លោក Nakamura បានចូលធ្វើការក្នុងទីភ្នាក់ងារប៉ូលិសជាតិ នៅក្នុងឆ្នាំ១៩៨៦ និងបានកាន់តំណែងជាប្រធានទីភ្នាក់ងារប៉ូលិសជប៉ុន ជិតមួយឆ្នាំប៉ុណ្ណោះ។ 

 

ទន្ទឹមនេះ ប្រធានប៉ូលិតតំបន់ណារ៉ា លោក Onizuka Tomoaki ក៏បានបញ្ជាក់ពីបំណងលាលែងពីតំណែងនៅក្នុងថ្ងៃទី២៥ ខែសីហានេះដែរ៕