ជាតិ
សង្គមជាតិ
អ្នកស្រី ត្រឹង ងា ម្ចាស់ស្នាដៃ “អរិយធម៌ខ្មែរ” ទទួលមរណភាព ក្នុងវ័យ៨៧ឆ្នាំ អ្នកស្រី ត្រឹង ងា ឈ្មោះដើម ឡាយ ហ៊ុនគី ជាអ្នកនិពន្ធសៀវភៅអរិយធម៌ខ្មែរ ថ្នាក់បញ្ចប់ បានទទួលមរណៈភាពនៅព្រឹកថ្ងៃទី២៨ សីហា ឆ្នាំ២០២២
×
ដោយ៖ វ៉ន ស៊ីចេន
ភ្នំពេញ៖ អ្នកស្រី ត្រឹង ងា ឈ្មោះដើម ឡាយ ហ៊ុនគី ជាអ្នកនិពន្ធសៀវភៅ «អរិយធម៌ខ្មែរ» បានទទួលមរណភាពក្នុងជន្មាយុ៨៧ឆ្នាំ នៅថ្ងៃទី២៨ សីហា ឆ្នាំ២០២២ វេលាម៉ោង៧ព្រឹក ដោយរោគាពាធ។ នេះបើតាមទំព័រហ្វេសប៊ុក ក្រុមព្រះសុរិយា។
ជុំវិញបញ្ហានេះ សារព័ត៌មានថ្មីៗ ពុំទាន់អាចសុំការបញ្ជាក់បន្ថែមពីសាច់ញាតិសពបាននៅឡើយទេ ដោយមិនមានអ្នកទទួលទូរស័ព្ទ។
សូមរម្លឹកថា លោក ត្រឹង បញ្ចារុណ ធ្លាប់ផ្តល់ព័ត៌មានដល់សារព័ត៌មានថ្មីៗថា ម្តាយរបស់លោក មានជំងឺពុកឆ្អឹងខ្នងនិងជំងឺលើសសម្ពាធឈាម ហើយគួបផ្សំនឹងវ័យជរាផងនោះ គឺធ្វើឲ្យសុខភាពរបស់ម្តាយ ទន់ខ្សោយ។ លោក បន្តថា ម្តាយរបស់លោក មិនអាចងើបដើរបានឡើយ។ និយាយមួយៗ និងសំឡេងក្នុងស្ថានភាពរវើយៗ ។
អ្នកស្រី ឡាយ ហ៊ុនគី មានឈ្មោះល្បីល្បាញតាមរយៈស្នាដៃសៀវភៅ «អរិយធម៌ខ្មែរ» ថ្នាក់បញ្ចប់ ដែលបានបោះពុម្ពផ្សាយកាលពីឆ្នាំ១៩៧៤។ អ្នកស្រីជាអតីតសាស្ត្រាចារ្យអក្សរសាស្ត្រមួយរូប។ ពិសេសអ្នកស្រី ត្រឹង ងា បានទទួលសញ្ញាបត្រកិត្តិបណ្ឌិតផ្នែកអក្សរសាស្ត្រពីរាជបណ្ឌិត្យសភាកម្ពុជាផងដែរ។
ត្រឹង ងា ជាឈ្មោះស្វាមីរបស់អ្នកស្រី ដែលជាអតីតសាស្ត្រាចារ្យ និងជាអ្នកនិពន្ធសៀវភៅ «ប្រវត្តិសាស្ត្រខ្មែរ» ភាគទី១ និងទី២ ដែលបោះពុម្ពផ្សាយនៅឆ្នាំ១៩៧៣។ សាស្ត្រារ្យត្រឹង ងា ត្រូវបានខ្មែរក្រហមយកទៅសម្លាប់នៅមន្ទីរស-២១ កាលពីអំឡុងខែវិច្ឆិកា ឆ្នាំ១៩៧៥។
ចំណែកឯ សញ្ញាបត្រកិត្តិបណ្ឌិតផ្នែកអក្សរសាស្ត្រដែលរាជបណ្ឌិត្យសភាកម្ពុជាប្រគល់ជូន អ្នកស្រី ឡាយ ហ៊ុនគី ហៅ ត្រឹង ងា ជាការលើកកម្ពស់សម្រាប់ឥស្សរជនជាន់ខ្ពស់ ដែលបានបំពេញកាតព្វកិច្ចជូនជាតិមាតុភូមិ៕
Tag:
ត្រឹង ងា
អរិយធម៍ខ្មែរ
© រក្សាសិទ្ធិដោយ thmeythmey.com