AIFF រងការពិន័យពី AFC ដោយសារសកម្មភាពអវិជ្ជមានរបស់អ្នកគាំទ្រជម្រើសជាតិឥណ្ឌា អំឡុងពេលប្រកួតជាមួយ ហុងកុង និង អាហ្វហ្គានីស្ថាន។ នេះបើយោងទៅលើការផ្សាយរបស់គេហទំព័រ India Express ។
 

គណៈកម្មាធិការវិន័យ និងក្រមសីលធម៌របស់ AFC (The AFC's Disciplinary and Ethics Committee) ចាត់ទុកការលុកលុយ និងភាពរញ៉េរញ៉ៃរបស់អ្នកគាំទ្រថាជា ទង្វើមិនសមរម្យ ដែលជាផ្នែកមួយរបស់ AIFF មិនបានយកចិត្តទុកដាក់។ AFC ចាត់ទុកបញ្ហានេះ ជាកំហុសរបស់សហព័ន្ធបាល់ទាត់ឥណ្ឌា។ បើតាមAFC ក្នុងនាមជាម្ចាស់ផ្ទះ AIFF ត្រូវធានាឲ្យបាននូវសុវត្ថិភាពផ្សេងអំឡុងការប្រកួត  និងរក្សានូវសណ្តាប់ធ្នាប់ នៅក្នុងកីឡដ្ឋាន។
 

កាលពីថ្ងៃទី១៤ ខែមិថុនា អ្នកគាំទ្រឥណ្ឌា ២នាក់ បានរត់ចូលទៅក្នុងទីលាន និងអង្គុយលើកៅអីបច្ចេកទេស របស់ក្រុមម្ចាស់ផ្ទះ អំឡុងពេលប្រកួតជាមួយហុងកុង។ នេះ ត្រូវបានចាត់ទុកថា ជាទង្វើមិនសមរម្យ ហើយក៏ជាការធ្វេសប្រហែសរបស់ក្រុមម្ចាស់ផ្ទះឥណ្ឌា ដែលមិនបានគិតដល់បញ្ហាទាំងនេះ។
 

មិនត្រឹមតែប៉ុណ្ណោះទេក្នុងការប្រកួតនេះ ម្ចាស់ផ្ទះឥណ្ឌា ក៏បានធ្វេសប្រហែសចំពោះ ការមិនរៀបចំភ្លេងជាតិកម្ពុជា ផងដែរ ក្នុងជំនួបជាមួយកម្ពុជា។ ប៉ុន្ដែ បញ្ហានេះ ត្រូវបានបញ្ចប់ដោយគ្មានការដេញដោលទៀត ព្រោះ AIFF ព្រមទាំងទូតឥណ្ឌាប្រចាំនៅកម្ពុជា បានសុំទោសដល់សហព័ន្ធបាលទាត់កម្ពុជា (FFC) និងកីឡាករកម្ពុជា៕