អន្តរជាតិ
នយោបាយអន្តរជាតិ
ប្រមុខសិទ្ធិមនុស្ស UN៖ ចិនទំនងជាប្រព្រឹត្តឧក្រិដ្ឋកម្មប្រឆាំងមនុស្សជាតិនៅស៊ីនជាំង ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស Michelle Bachelet ។ រូបថត Xinhua
× ប្រមុខសិទ្ធិមនុស្សរបស់អង្គការសហប្រជាជាតិ (UN) នៅថ្ងៃទី៣១ ខែសីហា បានចេញរបាយការណ៍មួយដែលគេរង់ចាំជាយូរមកហើយទាក់ទងបញ្ហាសិទ្ធិមនុស្សស៊ីនជាំង។ របាយការណ៍គួរឱ្យភ្ញាក់ផ្អើលនេះសេរថា ការឃុំខ្លួនដោយបំពាន និងការរើសអើងទៅលើជនជាតិវីហ្គ័រ និងជនជាតិមូស្លីមផ្សេងទៀតនៅក្នុងតំបន់ស៊ីនជាំង ទំនងអាចចាត់ទុកជាឧក្រិដ្ឋកម្មប្រឆាំងនឹងមនុស្សជាតិ។
ឧត្តមស្នងការអង្គការសហប្រជាជាតិ (UN) ទទួលបន្ទុកសិទ្ធិមនុស្ស លោកស្រី Michelle Bachelet បានរងការរិះគន់យ៉ាងខ្លាំងពីអ្នកការទូត និងក្រុមសិទ្ធិមនុស្សមួយចំនួន ដោយសារមិនព្រមចេញផ្សាយរបាយការណ៍ស្ដីពីស្ថានភាពសិទ្ធិមនុស្សនៅតំបន់ស៊ីនជាំង។
ទីបំផុតលោកស្រី Bachelet បានចេញរបាយការណ៍នេះប៉ុន្មាននាទីក្រោយបញ្ចប់អាណត្តិរបស់ខ្លួននៅថ្ងៃទី៣១ ខែសីហា។ ក្នុងរបាយការណ៍នោះ ចិនទំនងជាប្រព្រឹត្តិឧក្រិដ្ឋកម្មប្រឆាំងសិទ្ធមនុស្សពិតមែន។
«ស្ថានភាពនៃការឃុំខ្លួនដោយបំពាន ក៏ដូចជាការរើសអើងក្រុមជនជាតិវីហ្គ័រ និងក្រុមជនជាតិមូស្លីមផ្សេងទៀត ទំនងជាឧក្រិដ្ឋកម្មអន្តរជាតិ ជាពិសេសឧក្រិដ្ឋកម្មប្រឆាំងមនុស្សជាតិ»។ របាយការណ៍របស់ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សបានបញ្ជាក់បែបនេះ។
ប្រមុខសិទ្ធិមនុស្ស UN បានផ្តល់អនុសាសន៍តាមរបាយការណ៍ដដែល ឱ្យរដ្ឋាភិបាលចិន ប្រញាប់ចាត់វិធានការភ្លាមៗដើម្បីដោះលែងអ្នកដែលត្រូវបានឃុំខ្លួនទាំងអស់នៅក្នុងមជ្ឈមណ្ឌលបណ្តុះបណ្តាល ពន្ធនាគារ ឬកន្លែងឃុំឃាំង។ ម៉្យាងវិញទៀត របាយការណ៍បង្ហាញពីការរំលោភសិទ្ធិបន្តពូជរបស់ប្រជាជនតាមរយៈការកំណត់ផែនការគ្រួសារ។
នៅមុនរបាយការណ៍របស់អង្គការសិទ្ធិមនុស្សចេញផ្សាយបន្តិច អគ្គរដ្ឋទូតចិនប្រចាំ UN នៅទីក្រុងញូវយ៉ក លោក Zhang Jun ប្រាប់ទីភ្នាក់ងារព័ត៌មាន Reuters ថា ទីក្រុងប៉េកាំងនៅតែប្រឆាំងការចេញរបាយការណ៍nV។ លោក Zhang ក៏បានសង្កត់ធ្ងន់ថា ប្រមុខសិទ្ធិមនុស្សរបស់ UN មិនគួរលូកដៃចូលក្នុងកិច្ចការផ្ទៃក្នុងរបស់ចិនឡើយ ខណៈរបាយការណ៍នេះមិនបានបង្កើតផលល្អដល់អ្នកណាម្នាក់ទេ តែធ្វើឲ្យខូចកិច្ចសហប្រតិបត្តិការរវាងអង្គការសហប្រជាជាតិ និងរដ្ឋជាសមាជិកប៉ុណ្ណោះ។
កន្លងមក ក្រុមសិទ្ធិមនុស្សជាច្រើន រួមទាំងប្រទេសលោកខាងលិចបានចោទទីក្រុងប៉េកាំងពីការរំលោភបំពានសិទ្ធិលើជនជាតិវីហ្គ័នៅក្នុងតំបន់ស៊ីនជាំង រួមមានការប្រើប្រាស់កម្លាំងពលកម្មដោយបង្ខំ ការឃុំឃាំង ការបំផ្លាញទីតាំងវប្បធម៌ និងសាសនារបស់ជនជាតិវីហ្គ័រ។ ចំណែកអាម៉េរិកកន្លងមកបានចោទចិនថាប្រព្រឹត្តអំពើប្រល័យពូជសាសន៍៕
© រក្សាសិទ្ធិដោយ thmeythmey.com