កីឡាអន្តរជាតិ
អន្តរជាតិ
គ្រូ Man City សរសើរ Haaland មានទេពកោសល្យពិសេស ក្រោយស៊ុត hat-trick បំបែកកំណត់ត្រាថ្មីនៅ EPL
× លោក Pep Guardiola អ្នកចាត់ការក្រុម Manchester City សរសើរខ្សែប្រយុទ្ធ Erling Haaland ថាមានទេពកោសល្យពិសេសដែលអាចស៊ុត Hat-Trick បានតាំងពីវគ្គទីមួយ នៃការប្រកួតដែលក្រុមមេឃខៀវឈ្នះ Nottingham Forest ក្នុងលទ្ធផល ៦-០ នៅថ្ងៃទី១ ខែកញ្ញា។
ចាប់តាំងពី Haaland ចូលប្រកួតប្រជែងក្នុងក្របខណ្ឌ Premier League មក រូបគេអាចរកគ្រាប់បាល់ ១គ្រាប់គ្រប់ការប្រកួត ដោយប្រើពេលត្រឹម ៤៣នាទីប៉ុណ្ណោះ។ ពេលនេះខ្សែប្រយុទ្ធវ័យ ២២ឆ្នាំរូបនេះចាប់ផ្តើមអាជីពដ៏រីកចម្រើន ជាមួយការបំបែកកំណត់ត្រាថ្មីនានាជាមួយ Man City។
រកបាន ៣គ្រាប់ម្នាក់ឯង ត្រឹម ៣៨នាទីលើក្រុម Nottingham Forest ជាគ្រាប់បាល់ទី៩ របស់ Haaland នៅលីគកំពូលអង់គ្លេស និងជា Hat-Trick លើកទីពីរសម្រាប់អាជីពនៅ Premier League។ Haaland ក្លាយជាកីឡាករដំបូងគេបង្អោះដែលរកបាន ៩គ្រាប់ គិតត្រឹមការបង្ហាញខ្លួន ៥ប្រកួតដំបូងនៃ Premier League ដោយបំបែកកំណត់ត្រាវីរបុរស Man City កីឡាករ Sergio Aguero និងលោក Micky Quinn ដែលធ្វើបាន ៨គ្រាប់ដូចគ្នា។
ប៉ះបាល់ត្រឹម ១៦លើក ធ្វើបាន ៣គ្រាប់ លោក Guardiola បាននិយាយថាលោកពិតជាសប្បាយចិត្តពេលឃើញកូនក្រុមបំបែកកំណត់ត្រា Premier League ដ៏លឿនបែបនេះ។
«ខ្ញុំដឹងថាគេសប្បាយចិត្តដែលបានរកគ្រាប់បាល់ ខ្ញុំកាន់តែសប្បាយចិត្តចំពោះរូបគេ ហើយខ្ញុំគិតថាអ្វីដែលជាចង់បាននោះគឺជ័យជម្នះ។ កំណត់ត្រាថ្មីគឺមិនជាអ្វីនោះទេ ប្រសិនបើអ្នកតាមស្មើកំណត់ត្រានោះហើយពេលនោះអ្នកស៊ុតមិនចូល មិនអាចឈ្នះការប្រកួត ទើបជារឿងដ៏ដែលអ្នកនឹងមិនពេញចិត្ត ជាពិសេសចំពោះ Haaland គេមានទេពកោសល្យពិសេសមួយសម្រាប់ការបំបែកកំណត់ត្រាអស់ទាំងនេះ។»។ លោក Pep និយាយប្រាប់ទូរទស្សន៍ BT Sports បែបនេះ។
មិនត្រឹមតែ Haaland ឡើយដែលអាចបំបែកកំណត់ត្រា ក្រុម Man City ផ្ទាល់ក៏ធ្វើបានកំណត់ត្រាថ្មីមួយដែរ ដោយក្លាយជាក្រុមមានគ្រាប់ស៊ុតគូប្រកួតលើស ៥គ្រាប់ ជាលើកទី៣២ នៅលីគកំពូលអង់គ្លេស ក្រោមការដឹកនាំ ២៣៣ប្រកួតរបស់លោក Guardiola។
ក្រុមមេឃខៀវ Man City នឹងធ្វើដំណើរទៅប្រកួតនៅទឹកដីក្រុម Aston Villa ថ្ងៃទី៣ ខែកញ្ញា សម្រាប់យុទ្ធនាការ Premier League សប្តាហ៍ទី៦។ បច្ចុប្បន្ន Man City ឈរលំដាប់លេខ ២ មាន ១៣ពិន្ទុ តាមពីក្រោយ Arsenal ឈរកំពូលតារាងមាន ១៥ពិន្ទុ ពីជ័យជម្នះទាំង ៥សប្តាហ៍៕
Tag:
Erling Haaland
Pep Guardiola
© រក្សាសិទ្ធិដោយ thmeythmey.com