ចិន បិទខ្ទប់ក្រុងChengdu ដែលមានប្រជាជនរស់នៅ២១,២លាននាក់ ដើម្បីទប់ស្កាត់ជំងឺកូវីដ-១៩

អន្តរជាតិ

ចិន បិទខ្ទប់ក្រុងChengdu ដែលមានប្រជាជនរស់នៅ២១,២លាននាក់ ដើម្បីទប់ស្កាត់ជំងឺកូវីដ-១៩

01, Sep 2022 , 9:33 pm

រូបភាព

អាជ្ញាធរចិនធ្វើតេស្តរកជំងឺកូវីដ-១៩ នៅក្នុងខេត្ត Hainan។ រូបភាព៖ Xinhua

ដោយ: ធៀន ភារិន្ទ

ទីក្រុងដែលស្ថិតនៅភាគខាងត្បូងចិន Chengdu នៅថ្ងៃទី១ ខែកញ្ញា បានប្រកាសបិទខ្ទប់ និងធ្វើតេស្តទ្រង់ទ្រាយធំ ដើម្បីទប់ស្កាត់ជំងឺកូវីដ-១៩។ ទីក្រុងមួយនេះ មានប្រជាជនរស់នៅប្រមាណ ២១,២លាននាក់។

ខណៈបណ្តាប្រទេសជាច្រើននៅជុំវិញពិភពលោក កំពុងបើកប្រទេសឡើងវិញ ក្រោយផ្តល់វ៉ាក់សាំងជាច្រើនលានដូសឱ្យប្រជាជន ចិន នៅតែបន្តអនុវត្តវិធានការទប់ស្កាត់ជំងឺកូវីដ-១៩ ដ៏តឹងរ៉ឹង។ ក្រុង Chengdu ខេត្តSichuan នៅថ្ងៃទី៣១ ខែសីហា បានរាយការណ៍ករណីឆ្លងជំងឺកូវីដ-១៩ ចំនួន ១៥៧ករណី។

ដោយករណីឆ្លងហក់ឡើងខ្ពស់ ប្រជាជនប្រមាណ ២១,២ លាននាក់ នៅក្នុងក្រុងភាគខាងត្បូងចិនមួយនេះ ត្រូវបានបញ្ជាឱ្យស្នាក់នៅផ្ទះបណ្តោះអាសន្ន ចាប់ពីម៉ោង ៦ល្ងាច នៅថ្ងៃទី១ ខែកញ្ញា។ តាមរយៈវិធានបិទខ្ទប់ក្រុងនេះ គ្រួសារមួយ អាចបញ្ជូនសមាជិក ១នាក់ប៉ុណ្ណោះទៅទិញទំនិញ ដែលចាំបាច់។ នេះបើតាមសេចក្តីថ្លែងការណ៍មួយរបស់រដ្ឋាភិបាលក្រុង Chengdu។

វិធានការនៅក្នុងក្រុង Chengdu ជាករណីបិទខ្ទប់ក្រុងដ៏ធំបំផុត ចាប់តាំងពីបិទក្រុងសៀងហៃ នៅក្នុងខែមេសា និងខែឧសភា នាពេលកន្លងមក ស្របពេលអាជ្ញាធរចិន បានចាប់ផ្តើមធ្វើតេស្តរកជំងឺឆ្លងទ្រង់ទ្រាយធំរយៈពេល ៤ថ្ងៃ។ យ៉ាងណាមិញ គេមិនទាន់ដឹងច្បាស់ឡើយ ថាតើវិធានបិទខ្ទប់នេះ នឹងលើកចោលក្រោយការធ្វើតេស្តទ្រង់ទ្រាយធំឬយ៉ាងណា។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។

មិនតែប៉ុណ្ណោះ ក្នុងសប្តាហ៍នេះ ក្រុង Shenzhen ដែលស្ថិតនៅភាគខាងត្បូង និងក្រុង Dalian ដែលស្ថិតនៅភាគឦសាន ក៏បានបង្កើនចំណាត់ការមួយចំនួន ដើម្បីទប់ស្កាត់ជំងឺកូវីដ-១៩ ផង ក្នុងនោះមានដូចជា ការអំពាវនាវឱ្យធ្វើការពីផ្ទះ និងបិទអាជីវកម្មកម្សាន្តមួយចំនួនផង។

មកទល់ពេលនេះ ចិន មានករណីឆ្លងជំងឺកូវីដ-១៩ សរុបជាង ២៤ម៉ឺនករណី និងស្លាប់ជាង ៥ពាន់នាក់។ មិនតែប៉ុណ្ណោះ ប្រជាជនចិនជាច្រើនលាននាក់ បានទទួលវ៉ាក់សាំងបង្ការជំងឺកូវីដ-១៩ ចំនួន ២ដូស៕