​ឯកអគ្គរាជទូតអូស្តា្រលី ប្រចាំព្រះរាជាណាចក្រកម្ពុជា ឯកឧត្តម បាប្លូ កាង​ (Pablo Kang) បាន​ប្រកាសដាក់ឱ្យដំណើរការគម្រោង «បច្ចេកវិទ្យាជលផល»​​ ​FishTech នេះ ​ដោយមានការចូលរួមពីសាស្រ្តាចារ្យ អេនឌ្រូ ខេមបែល (Andrew Campbell) នាយកប្រតិបត្តិរបស់មជ្ឈមណ្ឌលអូស្ត្រាលីសម្រាប់ការស្រាវជ្រាវកសិកម្មអន្តរជាតិ (ACIAR), ឯកឧត្តម ព្រឹម រដ្ឋា អភិបាលរងខេត្តកំពង់ធំ, ឯកឧត្តម ឃុត សាវឿន រដ្ឋលេខាធិការ ក្រសួងកសិកម្មរុក្ខាប្រមាញ់ និងនេសាទ និងឯកឧត្តម ពុំសុថា ប្រតិភូរាជរដ្ឋាភិបាលកម្ពុជា ទទួលបន្ទុក ប្រធានរដ្ឋជលផលផងដែរ។ 

ឯកឧត្តម បាប្លូ កាង​ Pablo Kang បានមានប្រសាសន៍ថា៖ «ការគ្រប់គ្រង និងការពារទឹក និងធនធានដែលពាក់ព័ន្ធ កាន់តែមានសារៈសំខាន់ខ្លាំងឡើង នៅក្នុងតំបន់នេះ ជាមួយនឹងការអភិវឌ្ឍសេដ្ឋកិច្ច ដែលមានល្បឿនលឿន កំណើនប្រជាជន និងការប្រែប្រួលអាកាសធាតុ។ ជលផល គឺជាគន្លឺះនៃសន្តិសុខស្បៀងរបស់ប្រជាជនកម្ពុជា ព្រមទាំងផ្តល់អត្ថប្រយោជន៍ការងារ និងការចិញ្ចឹមជីវិតដល់ប្រជាជនកម្ពុជា ប្រមាណពីរលាននាក់ផងដែរ។ អូស្រ្តាលី កំពុងចាប់ដៃគូជាមួយរដ្ឋាភិបាលកម្ពុជា ដើម្បីការពារត្រី នឹងធ្វើឱ្យប្រសើរឡើងនូវគុណភាពទន្លេ ព្រមទាំងបង្កើនភាពធន់នឹងអាកាសធាតុ តាមរយៈគម្រោង Fish Tech នេះ»។ គម្រោង​ ​FishTech នេះ នឹងជួយសម្រួលដល់ផ្លូវត្រី ឬ «ជណ្តើរត្រី» ដើម្បីទ្រទ្រង់ការផ្លាស់ទីរបស់ត្រី នៅក្នុងប្រព័ន្ធធារាសាស្រ្ត​ និងទំនប់ទឹក ដែលនឹងនាំឱ្យផលិតកម្មជីវៈចម្រុះ និងការបង្កើតប្រាក់ចំណូលក្នុងស្រុកកាន់តែរឹងមាំផងដែរ។

 

បន្ទាប់ពីការប្រកាសដាក់ឱ្យដំណើរការ គម្រោង FishTech នេះ នឹងគ្រប់គ្រងដោយមជ្ឈមណ្ឌលអូស្ត្រាលីសម្រាប់ការស្រាវជ្រាវកសិកម្មអន្តរជាតិ (ACIAR) ដឹកនាំដោយសាស្រា្តចារ្យ Lee Baumgartner មកពីសាកលវិទ្យាល័យ Charles Sturt របស់ប្រទេសអូស្ត្រាលី។

 

 

 

សាស្រា្តចារ្យ Campbell បានមានប្រសាសន៍ថា៖ «ត្រីគឺជាប្រភពប្រូតេអ៊ីនចំនួន ៦០ភាគរយ នៃចំនួនប្រូតេអ៊ីនទាំងអស់ ដែលប្រជាជនរស់នៅតាមដងទន្លេគង្គទទួលបាន។ ជាធម្មតា ប្រភេទត្រីទន្លេមេគង្គ ធ្វើចរាចរផ្លាស់ទីទៅខ្សែទឹកខាងលើនៃទន្លេមេគង្គ នារដូវប្រាំងដើម្បីពង-កូន ហើយ​ធ្វើចរាចរផ្លាស់ទីត្រឡប់ចូលមកតំបន់វាលទំនាបលិចទឹកនានាវិញ ជាពិសេស ចូលទៅក្នុងបឹងទន្លេសាប ដើម្បីបំពេញវដ្តជីវិតរបស់ពួកវា។ ការសាងសង់សំណង់នានា ដូចជា សំណង់ទំនប់ធារាសាស្រ្ត ឬទំនប់វារីអគ្គិសនី បានរារាំងផ្លូវធ្វើចរាចរផ្លាស់ទីរបស់ត្រី ទាំងទៅផ្នែកខ្សែទឹកខាងលើនៃទន្លេ និងទាំងការត្រឡប់ចុះមកខ្សែទឹកខាងក្រោមទន្លេវិញ ដែលជាការគំរាមកំហែងដល់សន្តិសុខស្បៀងក្នុងតំបន់។ ជំនួយនេះ ជាឧទាហរណ៍យ៉ាងច្បាស់ របស់រដ្ឋាភិបាលអូស្រ្តាលី ដែលធ្វើការជាមួយដៃគូតាមបណ្តាប្រទេស​ ដើម្បីផ្តល់នូវបច្ចេកវិទ្យាថ្មីៗ ប្រកបដោយភាពច្នៃប្រឌិត ដើម្បីការពារពូជត្រី និងធ្វើ​ឱ្យប្រសើរឡើងនូវគុណភាពទឹកទន្លេ នៅទូទាំងអាងទន្លេមេគង្គ។ 
 

ការស្រាវជ្រាវមុនៗ ដែលផ្តល់មូលនិធិដោយ ACIAR បានបង្ហាញថា នៅពេលដែលយើងសាងសង់ផ្លូវសម្រាប់ត្រីហែលឆ្លងកាត់បានល្អ វាបានកាត់បន្ថយផល់ប៉ះពាល់ដែលបណ្តាមកពីការអភិវឌ្ឍប្រព័ន្ធធារាសាស្រ្តទៅលើការផ្លាស់ទីរបស់ត្រី ព្រមទាំងផ្តល់នូវអត្ថប្រយោជន៍ដល់សេដ្ឋកិច្ច និងសង្គម​របស់សហគមន៍ដែលពឹងផ្អែកលើទន្លេមេគង្គបានយូរអង្វែង។
 

គួរបញ្ជាក់ផងដែរថា តាមរយៈភាពជាដៃគូមេគង្គ-អូស្តា្រលី ប្រទេសអូស្ត្រាលីនឹងផ្តល់ជំនួយសរុបជាថវិកាចំនួន ៥លានដុល្លាអូស្រ្តាលី សម្រាប់រយៈពេល៣ឆ្នាំ (២០២២-២០២៥) ដល់​គម្រោង FishTech នេះ។ សកម្មភាពក្នុងគម្រោងនេះ ភាគច្រើនត្រូវបានអនុវត្តនៅក្នុងប្រទេសកម្ពុជា និងប្រទេសឡាវ ព្រមទាំងមានការចូលរួមពីប្រទេសវៀតណាម និងថៃ ក្នុងវគ្គបណ្តុះបណ្តាលនានា ផងដែរ៕