មន្រី្តជំនាញរបស់ក្រសួងការងារ និងបណ្តុះបណ្តាលវិជ្ជាជីវះ បានពិនិត្យផ្ទៀងផ្ទាត់ការទូទាត់ប្រាក់បំណាច់ បញ្ចប់កិច្ចសន្យាការងារជាមួយតំណាងក្រុមហ៊ុនណាហ្គាវើលដ៍ និងអតីតបុគ្គលិកណាហ្គាវើលដ៏ចំនួន៣រូបបន្ថែមទៀត ដែលយល់ព្រមទទួលយកសំណង។ ដោយឡែក អតីតបុគ្គលិកណាហ្គាវើលដ៏ នៅសល់១៣៤រូបប៉ុណ្ណោះ ដែលមិនទាន់យល់ព្រមទទួលយកសំណង។

 

សេចក្ដីប្រកាសព័ត៌មានក្រសួងការងារនិងបណ្តុះបណ្តាលវិជ្ជាជីវៈ​ ចេញថ្ងៃទី៤ កញ្ញា នេះ បានបញ្ជាក់ដូច្នេះថា៖ « អតីតបុគ្គលិក៣រូប បន្ថែមទៀត ក្នុងចំណោមអតីតបុគ្គលិក ដែលមិនទាន់ឯកភាពទទួលយកការទូទាត់ប្រាក់បំណាច់បញ្ចប់កិច្ចសន្យា បានមកទទួលយកដំណោះស្រាយ តាមរយៈការធ្វើលិខិតព្រមព្រៀងទទួលយកប្រាក់បំណាច់បញ្ចប់កិច្ចសន្យាការងារពីក្រុមហ៊ុនរួចហើយ»។  

 

គិតមកត្រឹមថ្ងៃទី៤ កញ្ញា មានអតីតបុគ្គលិកណាហ្គាវើលដ៏២៣៩រូបហើយ ក្នុងចំណោម៣៧៣រូប បានយល់ព្រមទទួលយកសំណងទូទាត់ប្រាក់បំណាច់បញ្ចប់កិច្ចសន្យាការងារជាមួយក្រុមហ៊ុន។ ក្នុងខែកញ្ញានេះ មានអតីតបុគ្គលិកណាហ្គាវើលដ៏ ២១រូប ដែលយល់ព្រមទទួលយកសំណង។

 

សូមរម្លឹកថា អតីតបុគ្គលិកណាហ្កាវើលដ៍ បាននាំគ្នាចេញតវ៉ាជិត៩ខែហើយ ចាប់តាំងពីចុងឆ្នាំ២០២១មក។ ពួកគេ ទាមទារឲ្យក្រុមហ៊ុនទទួលយកអ្នកដែលត្រូវបានបញ្ឈប់ពីការងារ ចូលធ្វើការងារវិញ។ យ៉ាងណា ការតវ៉ានេះ ពុំទទួលបានផ្លែផ្កាឡើយ ហើយថែមទាំងមានការចាប់ខ្លួនក្រុមអ្នកតវ៉ាជាបន្តបន្ទាប់។ ប៉ុន្តែក្រោយមកក៏ដោះលែងវិញ៕