អន្តរជាតិ
ថៃ ចង់បង្កើនចំណូលវិស័យទេសចរណ៍ តាមរយៈការរៀបចំពិធីមង្គលការឱ្យភ្ញៀវបរទេស រូបថត Xinhua
× ថៃសង្ឃឹមថា ខ្លួននឹងអាចបង្កើនចំណូលក្នុងវិស័យទេសចរ តាមរយៈការរៀបចំកម្មវិធីដែលចំណាយច្រើនដូចជាពិធីរៀបមង្គលការ និងក្រេបទឹកឃ្មុំរបស់ភ្ញៀវបរទេស ពិសេសជនជាតិឥណ្ឌា។ នេះបើតាមការអះអាងរបស់មន្ត្រីទេសចរជាន់ខ្ពស់របស់ថៃ។
ដោយមានឆ្នេរខ្សាច់ស្រស់ស្អាត និងមានកន្លែងកម្សាន្តពេលរាត្រី ដែលអាចទាក់ទាញភ្ញៀវទេសចរបរទេសបាន ថៃរំពឹងថា វិស័យទេសចរណ៍នឹងអាចទាក់ទាញចំណូលបន្ថែម ចន្លោះពី១៦ពាន់លានដុល្លារទៅ១៩ពាន់លានដុល្លារក្នុងឆ្នាំ២០២២ នេះ។
អនុប្រធានអាជ្ញាធរទេសចរណ៍ថៃ លោក Siripakorn Cheawsamoot បានប្រាប់ទីភ្នាក់ងារព័ត៌មាន Reuters ក្នុងបទសម្ភាសន៍មួយកាលពីសប្ដាហ៍មុនថា ថៃនឹងផ្ដោតការយកចិត្តទុកដាក់ខ្លាំងចំពោះការរៀបចំកម្មវិធីដែលចំណាយច្រើនៗដូចជាពិធីជប់លៀង មង្គលការ និងការក្រេបទឹកឃ្មុំរបស់ភ្ញៀវបរទេសដែលបានមកលេងប្រទេសខ្លួន។
«ទិន្នន័យពីរឆ្នាំចុងក្រោយនេះបង្ហាញថា គូស្វាមីភរិយាឥណ្ឌាជាច្រើនបានរៀបការ ប៉ុន្តែពិបាករកកន្លែងសម្រាប់ប្រារព្ធពិធីក្រេបទឹកឃ្មុំ ឬលើកថ្ងៃរៀបការ ដោយសារពួកគេចង់ឱ្យភ្ញៀវនៅក្រៅប្រទេសចូលរួម ក្នុងនោះក៏មានភ្ញៀវជនជាតិថៃដែរ»។ លោក Siripakorn បានបញ្ជាក់បែបនេះ។
ពិធីមង្គលការជនជាតិឥណ្ឌាដែលធ្វើនៅថៃ អាចចំណាយលុយប្រហែលពី២៧ម៉ឺនដុល្លារទៅជាង៨ម៉ឺនដុល្លារ។ ក្នុងការចំណាយនោះ គូរស្វាមីភរិយាអាចស្នាក់នៅរយៈពេលមួយសប្តាហ៍ ហើយរួមបញ្ចូលសេវាកម្មគ្រប់យ៉ាងចាប់ពីការរៀបចំពិធី ម្ហូបអាហារ ការតុបតែង និងការដឹកជញ្ជូនផងដែរ។ ប្រហែល៦០ភាគរយនៃជនជាតិឥណ្ឌាចង់រៀបការនៅថៃគឺជាអ្នករស់នៅឥណ្ឌាផ្ទាល់ ខណៈដែលនៅសល់គឺមកពីគ្រួសារឥណ្ឌារស់នៅក្រៅប្រទេស។
លើសពីនេះ ចាប់ពីខែតុលាតទៅ ថៃនឹងពន្យារទិដ្ឋាការភ្ញៀវទេសចរមួយចំនួនពី១៥ថ្ងៃទៅ៣០ថ្ងៃ ដោយសារភ្ញៀវទេសចរចង់នៅឱ្យបានយូរ ព្រោះការធ្វើដំណើរមានតម្លៃថ្លៃ ហើយជើងហោះហើរនៅមានតិចនៅឡើយ។ ម្យ៉ាង វាក៏អាចផ្ដល់ចំណូលបន្ថែមតាមរយៈការស្នាក់នៅយូរដែរ។
គិតពីខែមករាដល់ចុងខែសីហា នៃឆ្នាំ ២០២២ ថៃទទួលបានប្រាក់ចំណូលជាង៥ពាន់លានដុល្លារពីភ្ញៀវទេសចរបរទេសជាង ៤លាននាក់។ រដ្ឋាភិបាលថៃកំពុងកំណត់គោលដៅរកប្រាក់ចំណូលថ្មីក្នុងឆមាសទី២ គឺឱ្យបានចំនួន១១ពាន់លានដុល្លារ។
ប្រទេសអាស៊ីអាគ្នេយ៍មួយនេះ ពឹងផ្អែកខ្លាំងលើវិស័យទេសចរ ដែលជាកត្តាជំរុញកំណើនសេដ្ឋកិច្ច។ យ៉ាងណាមិញ ភ្ញៀវទេសចរបរទេសបានធ្លាក់ចុះយ៉ាងខ្លាំងដោយសារជំងឺកូវីដ-១៩។ ក្នុងឆ្នាំ២០១៩ ថៃមានភ្ញៀវទេសចររហូតដល់ជិត ៤០លាននាក់ ដែលជាចំនួនខ្ពស់បំផុតមិនធ្លាប់មាន ហើយពេលនោះ វិស័យទេសចរថៃរកបានចំណូលស្មើ១២ភាគរយនៃផលិតផលក្នុងស្រុកសរុប៕
© រក្សាសិទ្ធិដោយ thmeythmey.com