រដ្ឋាភិបាលចិន នៅថ្ងៃទី៣ ខែកញ្ញា សន្យាផ្ដល់ជំនួយចំនួន៣០០លានយ័ន (៤៣,៥លានដុល្លារ) ដល់ប៉ាគីស្ថានដើម្បីស្រោចស្រង់ប្រទេសពីគ្រោះងទឹកជំនន់ដ៏អាក្រក់ បន្ទាប់ពីផ្ដល់ជំនួយរួចម្ដងហើយកាលពីសប្ដាហ៍មុនចំនួន១០០លានយ័ន (១៤,៥លានដុល្លារ) ។ មេដឹកនាំប៉ាគីស្ថាន ក៏បានអរគុណយ៉ាងជ្រាលជ្រៅចំពោះជំនួយជាបន្តបន្ទាប់របស់ចិនដែលជាមិត្តដ៏សំខាន់មួយ។
អំឡុងកិច្ចប្រជុំតាមប្រព័ន្ធអនឡាញនៅថ្ងៃទី៣ខែកញ្ញាជាមួយប្រធានអាជ្ញាធរគ្រប់គ្រងគ្រោះ មហន្តរាយជាតិប៉ាគីស្ថាន (NDMA) លោក AKhtar Nawaz ប្រធានទីភ្នាក់ងារសហប្រតិបត្តិការអភិវឌ្ឍន៍អន្តរជាតិចិនលោក Luo Zhaohui បានប្រកាសអំពីការសម្រេចចិត្តបរិច្ចាគប្រាក់ជំនួយបន្ថែមទៀតសម្រាប់ប៉ាគីស្ថាន។ លោក Luo បានលើកឡើងថា ភាគីទាំងពីរមានទម្លាប់ជួយគ្នាទៅវិញទៅមកទាំងក្នុងស្ថានភាពរីករាយ និងស្ថានលំបាក។
«ប្រជាជនចិននឹងមិនភ្លេចថា ប៉ាគីស្ថានបានបរិច្ចាគតង់បណ្តោះអាសន្នទាំងអស់របស់ខ្លួនដល់ចិននៅគ្រោះរញ្ជួយដីនៅទីក្រុង Wenchuan នោះទេ»។ លោក Luo បានសង្កត់ធ្ងន់បែបនេះ ដោយចង់រម្លឹកដល់ការជួយជ្រោមជ្រែងរបស់ប៉ាគីស្ថានអំឡុងគ្រោះរញ្ជួដីនៅ Wenchuan កាលពីឆ្នាំ២០០៨។ នេះបើតាមទូរទស្សន៍ចិន CGTN ។
ក្នុងជំនួបដដែលនោះ លោក Luo ក៏បានអះអាងថា ចិនបានចាប់ផ្ដើមបញ្ជូនតង់ប្រហែល៣ពាន់តាមរយៈយន្តហោះយោធា ហើយបានរៀបចំខ្ទឹមបារាំងចំនួន២០០តោនដែលនឹងទៅដល់ប៉ាគីស្ថានតាមរយៈផ្លូវហាយវ៉េ Karakoram ក្នុងមួយសប្តាហ៍ទៀត។
ទន្ទឹមនេះ ប្រធានទីភ្នាក់ងារសហប្រតិបត្តិការអភិវឌ្ឍន៍អន្តរជាតិចិនរូបនេះបានបញ្ជាក់ថា រដ្ឋបាលឧតុនិយមចិនបានផ្តល់ការព្យាករអាកាសធាតុតាមពេលវេលាជាក់ស្តែងដល់ប៉ាគីស្ថាន ហើយពលរដ្ឋចិន សហគ្រាស និងរដ្ឋាភិបាលក្នុងតំបន់ជាច្រើន កំពុងរៀបចំការបរិច្ចាគដើម្បីជួយប៉ាគីស្ថានបន្ថែមទៀត។ លោក Luo ក៏បានសន្យានឹងប៉ាគីស្ថានក្នុងការជួយជ្រោមជ្រែងប្រទេសមួយនេះក្នុងការស្តារ និងកសាងប្រទេសឡើងវិញក្រោយគ្រោះមហន្តរាយផងដែរ។
ជាការឆ្លើយតបនឹងជំនួយជាបន្តបន្ទាប់របស់ក្រុងប៉េកាំង នាយករដ្ឋមន្ត្រីប៉ាគីស្ថានលោក Shehbaz Sharif នៅថ្ងៃទី៣ ខែកញ្ញា បានសម្ដែងការដឹងគុណចំពោះជំនួយរបស់ក្រុងប៉េកាំង ចាត់ទុក ការជួយនេះបង្ហាញពីចំណងមិត្តភាពដ៏សំខាន់បំផុតសម្រាប់ប្រទេសទាំងពីរ។ លោក Sharif ក៏បានបង្ហោះសារលើបណ្ដាញសង្គម Twitter ថា ជំនួយចិននឹងជួយផ្ដល់ជំនួយសង្គ្រោះចាំបាច់ដល់ប្រជាជនប៉ាគីស្ថាន។
យោងតាម NDMA ទឹកជំនន់បានសម្លាប់មនុស្ស១,២៩០នាក់, ប៉ះពាល់ដល់មនុស្សជាង៣៣លាននាក់, បំផ្លាញផ្ទះប្រជាពលរដ្ឋជាង១,៤៦លានខ្នង, ស្ពាន២៤៣ និងផ្លូវហាយវេប្រវែង៥,៥៦៣គីឡូម៉ែត្រ។ បន្ថែមពីលើនេះ មួយភាគបីនៃប៉ាគីស្ថាននាពេលបច្ចុប្បន្ន កំពុងលិចក្រោមទឹក ហើយទឹកមិនទាន់ចាប់ផ្តើមស្រកនៅឡើយ៕