នៅកិច្ចប្រជុំលើកទីមួយ រដ្ឋមន្រ្តីពាណិជ្ជកម្មនៃប្រទេសចូលរួមក្របខ័ណ្ឌវិបុលភាពសេដ្ឋកិច្ចឥណ្ឌ-ប៉ាស៊ីហ្វិក (IPEF) បានគូសវាសពីសសរស្ដម្ភសំខាន់ៗសម្រាប់ធ្វើជាស្ដង់ដាមូលដ្ឋានរួមគ្នាមួយ សម្រាប់ការចរចាបន្តទៀត។ ក្រៅពីច្រវាក់ផ្គត់ផ្គង់ ក្របខណ្ឌសេដ្ឋកិច្ចថ្មីដែលផ្ដួចផ្ដើមដោយអាម៉េរិក ក៏​រួមបញ្ចូលថាមពលបៃតង និងការប្រយុទ្ធប្រឆាំងនឹងអំពើពុករលួយនៅក្នុងប្រទេសទាំង១៤ ដែលមានទំហំ៤០ភាគរយនៃសេដ្ឋកិច្ចពិភពលោក។

 

«ខ្ញុំជឿជាក់យ៉ាងខ្លាំងក្នុងការនិយាយថា IPEF នឹងបង្កើតការងារបន្ថែមទៀតនៅអាម៉េរិក ក៏ដូចជា​ក្នុង​ប្រទេស IPEF ផ្សេងទៀតផងដែរ»។ រដ្ឋមន្ត្រីពាណិជ្ជកម្មអាម៉េរិកលោកស្រី Gina Raimondo បានថ្លែង​នៅចុងបញ្ចប់នៃកិច្ចប្រជុំនេះនៅ Los Angeles ។

 

លោកស្រី Raimondo ក៏បានកោតសរសើរការឯកភាព និងការប្តេជ្ញាចិត្តក្នុង​ចំណោម​សមាជិក​ទាំងអស់ ទោះបីជាលោកស្រីបានទទួលស្គាល់ថាឥណ្ឌាដែលជាសមាជិកមួយដែរនោះ មិនបាន​ចុះ​ហត្ថលេខាលើកិច្ចព្រមព្រៀងស្តីពីពាណិជ្ជកម្ម និងសេដ្ឋកិច្ចឌីជីថលក៏ដោយ។

 

មេដឹកនាំធុរកិច្ចដែលចូលរួមកិច្ចប្រជុំ បង្ហាញក្ដីរីករាយចំពោះការវិវត្តរបស់ IPEF ស្របពេលដែលកិច្ចព្រមព្រៀងភាពជាដៃគូអន្តរប៉ាស៊ីហ្វិក (TPP) មិនមានសកម្មភាពអ្វីនោះ។ អាម៉េរិកដើរចេញពី TPP កាលពីឆ្នាំ២០១៧។

 

គួរបញ្ជាក់ថា IPEF ប្រមូលផ្តុំដោយសមាជិកចំនួន ១៤ រួមមាន អាម៉េរិក, អូស្ត្រាលី, ព្រុយណេ, ហ្វីជី, ឥណ្ឌា, ឥណ្ឌូណេស៊ី, ជប៉ុន, កូរ៉េខាងត្បូង, ម៉ាឡេស៊ី, នូវែលសេឡង់, ហ្វីលីពីន, សិង្ហបុរី, ថៃ និងវៀតណាម៕