អន្តរជាតិ
រុស្ស៊ីថា មន្ត្រីចិនយល់ពីស្ថានភាព និងគាំទ្រសកម្មភាពរុស្ស៊ីនៅអ៊ុយក្រែន លោក Li Zhanshu ចាប់ដៃប្រធានាធិបតីរុស្ស៊ី វ៉្លាឌីមៀ ពូទីន។ រូបថត AFP
× ឯកសារមួយរបស់សភារុស្ស៊ីដែលចេញផ្សាយនៅថ្ងៃទី៩ ខែកញ្ញា បានស្រង់សម្ដីមន្ត្រីចិនជាន់ខ្ពស់ម្នាក់ដែលបានប្រាប់សមាជិកសភារុស្ស៊ីថា ក្រុងប៉េកាំងយល់ និងគាំទ្ររុស្ស៊ីក្នុងស្ថានភាពនៅអ៊ុយក្រែន។ មន្ត្រីចិនរូបនោះក៏បានសន្យាផ្ដល់ការគាំទ្ររុស្ស៊ីដើម្បីការពារប្រយោជន៍សំខាន់ៗផងដែរ។
មន្រ្តីចិនរូបនេះ ជាសមាជិកលំដាប់ទីបីនៃបក្សកុម្មុយនីស្តចិន Li Zhanshu បានធ្វើដំណើរទស្សនកិច្ចទៅកាន់ទីក្រុងមូស្គូកាលពីសប្ដាហ៍មុន បន្ទាប់ពីបានចូលរួមវេទិកាសេដ្ឋកិច្ចនៅទីក្រុង Vladivostok ភាគខាងកើតរុស្ស៊ី។ លោក Li Zhanshu ក៏បានជួបជាមួយសមាជិកសភារុស្ស៊ី និងប្រធានា ធិបតីរុស្ស៊ីលោក វ្ល៉ាឌីមៀ ពូទីន ផងដែរ។
អំឡុងពេលនៅទីក្រុង Vladivostok លោក Li បានកោតសរសើរលោកពូទីន ដោយនិយាយថា ក្រោមការដឹកនាំរបស់លោក ពូទីន រុស្ស៊ីនៅតែមិនរងការបាត់បង់ដោយទណ្ឌកម្មដ៏សម្បើមរបស់អាម៉េរិក និងលោកខាងលិចឡើយ ហើយផ្ទុយទៅវិញ ក្នុងរយៈពេលមួយដ៏ខ្លី រុស្ស៊ីអាចរក្សាស្ថិរភាព និងភាពរឹងមាំរបស់ខ្លួន។ បន្ថែមពីនេះ អំឡុងពេលនៅទីក្រុងមូស្គូក្នុង ជំនួបជាមួយសមាជិកសភារុស្ស៊ីនៅថ្ងៃទី៩ ខែកញ្ញា មន្ត្រីចិនជាន់ខ្ពស់រូបនេះបានផ្ដល់ការគាំទ្រ យ៉ាងរឹងមាំបំផុតចំពោះភាពជាអ្នកដឹកនាំរបស់រុស្ស៊ី។
«ពួកយើងឃើញថា អាម៉េរិកនិងសម្ព័ន្ធមិត្តយោធាណាតូកំពុងពង្រីកវត្តមានរបស់ពួកគេនៅជិតព្រំដែនរុស្ស៊ីដែលគំរាមកំហែងយ៉ាងធ្ងន់ធ្ងរដល់សន្តិសុខជាតិ និងអាយុជីវិតរបស់ពលរដ្ឋរុស្ស៊ី។ ពួកយើងយល់ច្បាស់ណាស់ចំពោះភាពចាំបាច់នៃវិធានការទាំងអស់ដែលបានធ្វើឡើងដោយរុស្ស៊ីក្នុងគោលបំណងការពារផលប្រយោជន៍សំខាន់ៗរបស់ខ្លួន។» លោក Li បានសង្កត់ធ្ងន់បែបនេះបើយោងតាមឯកសារពិពណ៌នារបស់សភារុស្ស៊ី ដែលត្រូវបានរាយការណ៍ដោយកាសែត New York Times ។
លោក Li ក៏បានបន្តថា លើបញ្ហាអ៊ុយក្រែន ចិនយល់ពីភាពមិនអាចធ្វើទៅរួចនៃការទាមទាររបស់លោកខាងលិចពីរុស្ស៊ី ហើយរុស្ស៊ីបានជ្រើសរើសជម្រើសដ៏សំខាន់មួយហើយបានឆ្លើយតបយ៉ាងម៉ឺងម៉ាត់ចំពោះបញ្ហាមួយនេះ។
គួរបញ្ជាក់ថា ចិនបានជ្រើសផ្លូវដើរយ៉ាងប្រុងប្រយ័ត្នក្នុងសង្រ្គាមនៅអ៊ុយក្រែន។ ប្រព័ន្ធផ្សព្វផ្សាយរដ្ឋចិនមិនបានរាយការណ៍អំពីការអត្ថាធិប្បាយលើបញ្ហាអ៊ុយក្រែនដោយ លោក Li ទេ ហើយបានផ្តល់ការរាយការណ៍តិចតួចអំពីដំណើរទស្សនកិច្ចរបស់លោកនៅរុស្ស៊ី៕
© រក្សាសិទ្ធិដោយ thmeythmey.com