លោក សរ វីរៈតារា មន្ត្រីកម្មវិធីរបស់ Let's Read – Digital Library បញ្ជាក់ថា សៀវភៅទាំងនេះនឹងត្រូវបង្ហាញនៅក្នុងសិក្ខាសាលាប្រចាំឆ្នាំរបស់ BookLap នៅថ្ងៃទី១៧ ខែកញ្ញា និងថ្ងៃទី១ និងទី២ ខែតុលា ដែលសៀវភៅទាំងនេះផ្ដោតលើបញ្ហាសម្រាម និងចំណេះដឹងផ្នែកហិរញ្ញវត្ថុ។ កម្មវិធីនេះ មានគោលបំណងបោះពុម្ពសៀវភៅចំនួន១០ក្បាល ឬច្រើនជាងនេះជារៀងរាល់ឆ្នាំ ជាមួយប្រធានបទផ្សេងៗគ្នា។

 

«អ្នកប្រើប្រាស់អាចទាញយកសៀវភៅដោយឥតគិតថ្លៃពីកម្មវិធី Let's Read – Digital Library របស់យើង ដើម្បីអាននៅពេលក្រោយដោយគ្មានអ៊ីនធឺណិត។ វាជាអត្ថប្រយោជន៍មួយសម្រាប់អ្នកអាន»។ លោក វីរៈតារាបន្ថែមបែបនេះ មុនលើកអត្ថប្រយោជន៍មួយទៀតគឺ ឪពុកម្តាយអាចកំណត់ពេលវេលាសមស្របសម្រាប់ការអានកូនរបស់ពួកគេ ដូច្នេះនៅពេលដល់ពេលអាន កម្មវិធីនឹងជូនដំណឹងតែម្ដង។

 

បង្កើងក្នុងឆ្នាំ២០១៦ ដោយមូលនិធិអាស៊ី (Asia Foundation) កម្មវិធីបណ្ណាល័យឌីជីថលនេះ ផ្តល់សៀវភៅអប់រំលើប្រធានបទដូចជា សមភាពយេនឌ័រ បរិស្ថាន និងសកម្មភាពអាកាសធាតុ ភាពចម្រុះ ការយល់ដឹង និងការយល់ចិត្ត ព្រមទាំងចំណេះដឹងផ្នែកវិទ្យាសាស្រ្ត បច្ចេកវិទ្យា វិស្វកម្ម សិល្បៈ និងគណិតវិទ្យា (STEM)។ សៀវភៅនីមួយៗ អាចទាញយក និងបោះពុម្ពបាន។ កម្មវិធីនេះ មាន​សៀវភៅ​ជាង​មួយ​ពាន់​ក្បាល​ជា​ភាសា​អង់គ្លេស និង​ភាសា​ដទៃ​ទៀត ហើយ​សៀវភៅ​៥២៣ក្បាល​​ជា​ភាសា​ខ្មែរ។

 

អ្វីទៅជា Let’s Read – Digital Library?

 

បើតាមលោក វីរៈតារា ជាការទាក់ទាញក្មេងៗ សារអបអរសាទរមួយនឹងលេចឡើយនៅពេលពួកគេអានរឿងដល់ចប់ ដែលនេះជាលើកទឹកចិត្តផង និងប្រៀបដូចជាការទទួលបានរង្វាន់ផង។

 

លើសពីនេះ កម្មវិធីនេះ ក៏មានសៀវភៅជាសំឡេង (Audiobook) ដែលអនុញ្ញាតឱ្យឪពុកម្តាយដែលមិនអាចអានបាន រៀនជាមួយកូនៗរបស់ពួកគេ។ សៀវភៅជាសំឡេងនេះ មានកម្មវិធីអានតែម្ដង ហើយឪពុកម្តាយអាចអានជាមួយកូនរបស់ពួកគេ ឬឱ្យកូនៗស្តាប់សំឡេងអានក៏បាន។

 

«យើងបានទទួលមតិវិជ្ជមានជាច្រើនពីអាណាព្យាបាលកុមារ ដែលនិយាយថា កូនរបស់ពួកគេមិនត្រឹមតែស្រលាញ់សាច់រឿងប៉ុណ្ណោះទេ ថែមទាំងចូលចិត្តរូបភាពក្នុងរឿងផងដែរ»។ លោក វីរៈតារាបន្ថែមបែបនេះ។ ជាមួយសមិទ្ធផលនេះ ឪពុកម្ដាយជាច្រើន ចង់ឃើញការចេញផ្សាយសៀវភៅឱ្យបានច្រើនទៀត ហើយអ្នកខ្លះចង់បានសៀវភៅជាស៊េរីនៃសាច់រឿងទៀតផង។

 

ទោះបីជាកម្មវិធីនេះមានបំណងចង់លើកកម្ពស់ការអានតាមប្រព័ន្ធឌីជីថលក៏ដោយ ក្រុមការងារក៏ចែកសៀវភៅដល់បណ្ណាល័យនៅតាមសាលារដ្ឋ និងឯកជនដែរ។

 

លោក សាត ឌិច ជាគ្រូបង្រៀន និងជាអ្នកនិពន្ធម្នាក់ ហើយមានក្មួយស្រីអាយុ៨ឆ្នាំ កំពុងរៀនថ្នាក់ទី៣។ ឌិត បានដឹងពីកម្មវិធី Let's Read – Digital Library តាមរយៈបណ្តាញសង្គម ហើយបានដំឡើងកម្មវិធីនៅលើទូរសព្ទរបស់ខ្លួន។

 

លោក ឌិច ​ប្រាប់ថា ក្មួយស្រីរបស់លោក ​​ប្រើកម្មវិធី​បណ្ណាល័យ​ឌីជីថល​៥ខែ​ហើយ។ វាមានប្រយោជន៍ខ្លាំងណាស់សម្រាប់នាងក្នុងការរៀន ព្រោះមានរឿងអប់រំជាច្រើនភាសា ដែលវាផ្ដល់ទាំងការកម្សាន្ត និងការអប់រំដំណាលគ្នា។ លើសពីនោះ សៀវភៅ​នីមួយៗ ​មាន​ស្នាដៃ​សិល្បៈ​ដ៏​ស្រស់​ស្អាត និងទាក់ទាញ​មិន​ត្រឹម​តែ​ក្មេងៗ​ប៉ុណ្ណោះ​ទេ ប៉ុន្តែ​ក៏​សម្រាប់​លោក​ផ្ទាល់ដែរ។

 

គ្រូបង្រៀនវ័យ២៩ឆ្នាំរូបនេះ បានសម្រេចចិត្តឱ្យក្មួយស្រីខ្លួនប្រើប្រាស់កម្មវិធីខាងលើ ដោយសារតែនាងគ្រប់អាយុដើម្បីគ្រប់គ្រងខ្លួនឯងលើការប្រើប្រាស់ស្មាតហ្វូននេះ។ ប៉ុន្តែលោក ឌិច ក៏អនុញ្ញាតឱ្យប្រើតែកម្មវិធីអប់រំដែលមិនប៉ះពាល់ខួរក្បាលរបស់កុមារដូចប្រព័ន្ធផ្សព្វផ្សាយសង្គមនានាឡើយ។

 

បន្ថែមពីអ្វីដែលមានស្រាប់ លោក ឌិច ចង់ឱ្យកម្មវិធីនេះបញ្ចូលវីដេអូ ឬបង្កើតឱ្យមានការប្រកួតប្រជែងដែលអាចបង្កើនការយល់ដឹងអំពីកម្មវិធីនេះក្នុងចំណោមប្រជាជន ជាពិសេសឪពុកម្តាយក្មេងៗ។ យ៉ាង​ណា​ក៏​ដោយ សម្រាប់​កុមារ ការ​មើល​អេក្រង់​ទូរសព្ទ​យូរ​ពេក​គឺ​មាន​គ្រោះថ្នាក់ ហើយ​លោក ឌិច ខ្លួនឯង​មិន​លើក​ទឹក​ចិត្ត​ក្មេងៗ​​មើល​អេក្រង់​ទូរសព្ទ​យូរ​ពេក​ទេ។

 

ទោះចង់​ទិញ​សៀវភៅ​ឱ្យ​ក្មេងៗ ព្រោះ​ក្រដាសសៀវភៅ​​ល្អ​សម្រាប់​ភ្នែក​​ លោក ឌិច នៅតែយល់ថា កម្មវិធីបណ្ណាល័យខាងលើ គឺល្អ និងមានប្រយោជន៍ដែលឪពុកម្តាយគួរមានសម្រាប់កូនៗរបស់ពួកគេដែលធំល្មម ហើយមិនងាយមានបញ្ហាពេលមើលអេក្រង់ទូរស័ព្ទ។

 

 

បើតាមមន្ត្រីកម្មវិធីខាងលើ ការបញ្ចូលសៀវភៅក្នុង App ចំណាយពេលជិត៣ខែ ដោយរាប់ចាប់ពីការជ្រើសរើសបេក្ខជនដែលបញ្ជូនរឿងដើមមកអ្នកកាន់កម្មវិធីដើម្បីត្រួតពិនិត្យនិងបញ្ចប់រឿង ក៏ដូចជាការកែសម្រួល និងការបង្កើតរូបភាពសម្រាប់សាច់រឿង។

 

 

រៀងរាល់ឆ្នាំ ក្រុមលោក វីរៈតារា ​ជ្រើសរើស​បេក្ខភាព​​១០​នាក់​ដើម្បី​ផ្សាយ​រឿង​របស់​ពួក​គេ។ លោកពន្យល់ថា ក្រុមរបស់លោក មានសិក្ខាសាលារយៈពេលបីសប្តាហ៍ ដែលម្ដងក្នុងមួយសប្តាហ៍ ដើម្បីបណ្តុះបណ្តាលអ្នកនិពន្ធ ឬសិល្បករដែលមានបទពិសោធតិចតួច ហើយចង់រៀនពីអ្នកជំនាន់មុន ឬអ្នកប្រឹក្សាយោបល់ទាក់ទងសៀវភៅកុមារ។

 

កម្មវិធី Let's Read ក៏កំពុងធ្វើការជាមួយក្រសួងអប់រំផងដែរលើការបញ្ចូលរឿងរបស់ខ្លួនទៅក្នុងកម្មវិធីសិក្សាថ្នាក់មត្តេយ្យ និងបង្កើតសម្ភារៈបន្ថែមទាក់ទងនឹងការអប់រំ។ រឿង​ទាំង​នោះ​ត្រូវ​បានអនុម័តដោយ​ក្រសួង​​ មុន​នឹង​ចុះ​ផ្សាយ។

 

«ឥឡូវនេះ យើងមានទាំងបណ្ណាល័យឌីជីថល និងសម្ភារនៅក្នុងកម្មវិធីសិក្សា ដែលអនុញ្ញាតឱ្យកុមារស្វែងយល់បន្ថែមអំពីភាសាខ្មែរ ក្រៅពីខ្លឹមសារអប់រំនៅក្នុងរឿង»។ លោក វីរៈតារា បន្ថែមដូច្នេះ។

 

 

ជាការពិត ការអានលើអេក្រង់ទូរស័ព្ទយូរពេកអាចប៉ះពាល់ដល់ភ្នែករបស់កុមារ។ ទោះជាយ៉ាងណាក៏ដោយ កម្មវិធី Let's Read រំពឹងថា ឪពុកម្តាយរបស់ក្មេងៗ នឹងដឹងអំពីកត្តានេះ និងកំណត់ពេលអានសម្រាប់កូនៗរបស់ពួកគេរៀងរាល់ថ្ងៃ។

 

ឆ្លើយតបនឹងបញ្ហានេះ លោក Virakdara លើកឡើងថា៖ «នៅពេលអនាគត យើងអាចពិចារណាដំឡើងមុខងារមួយនៅលើកម្មវិធី ដែលផ្ដល់ការណែនាំលើរយៈពេលសម្រាប់ការអាន ដើម្បីជៀសវាងការប៉ះពាល់ភ្នែកពេលមើលអេក្រង់ទូរស័ព្ទ»។

 

បញ្ហា​ប្រឈម​មួយ​ទៀត ​គឺ​កម្មវិធី​នេះ​មិន​អាច​ចូល​ប្រើ​បាន​ដោយ​អ្នករាល់​គ្នាឡើយ ​ជា​ពិសេស​អ្នកនៅ​តំបន់​ជន​បទ​មិន​ដឹង​អំពី​កម្មវិធី​នេះ ខ្លះ​មិន​មាន​ការ​តភ្ជាប់​អ៊ីនធឺណិត​ល្អ ឬខ្លះទៀតមិនមានសូម្បី​ឧបករណ៍​ដើម្បី​ចូល​ប្រើ​វាតែម្ដង។

 

«នោះហើយជាមូលហេតុដែលយើងព្យាយាមបើកឱ្យចូលអានដោយឥតគិតថ្លៃ ដោយសហការជាមួយអង្គការក្នុងស្រុកដែលជាដៃគូរបស់យើង ដើម្បីបង្កើតសកម្មភាពផ្សព្វផ្សាយនៅក្នុងសហគមន៍ ដើម្បីផ្ដល់ព័ត៌មាន និងបង្រៀនពួកគេពីរបៀបប្រើប្រាស់កម្មវិធីឱ្យកាន់តែមានប្រសិទ្ធភាព។» មន្រ្តីកម្មវិធីដដែលលើកឡើងបែបនេះ។

 

លោក វីរៈតារា បន្ថែមថា ទោះបីជាពួកគេមិនអាចទៅដល់គោលដៅនៅគ្រប់កន្លែងក្ដី ជាមួយនឹងការកើនឡើងនៃការប្រើប្រាស់បច្ចេកវិទ្យា ក្រុមការងាររបស់លោកសង្ឃឹមថា ឪពុកម្តាយកាន់តែច្រើននឹងអាចចូលប្រើកម្មវិធីសម្រាប់កូនៗរបស់ពួកគេនាពេលអនាគត។

 

បញ្ហាប្រឈមមួយទៀត គឺការព្យាយាមផ្សព្វផ្សាយការយល់ដឹងពីអត្ថប្រយោជន៍របស់កម្មវិធីដល់ឪពុកម្តាយឱ្យបានច្រើនតាមដែលអាចធ្វើទៅបាន។ នេះក៏ដោយសារឪពុកម្តាយមួយចំនួនមិនខ្វល់ពីការប្រើប្រាស់ស្មាតហ្វូនរបស់កូនៗពួកគេឡើយដូចជាការប្រើប្រាស់បណ្ដាញសង្គម ខណៈដែលស្មាតហ្វូនអាចផ្តល់អត្ថប្រយោជន៍ច្រើនជាងនោះ។

 

«យើងចង់ឱ្យឪពុកម្តាយយល់ដឹងអំពីវិធីបង្រៀនកូនរបស់ពួកគេឱ្យប្រើស្មាតហ្វូនដើម្បីទទួលបានអត្ថប្រយោជន៍ មិនត្រឹមតែការកម្សាន្ត ឬប្រើ TikTok ឬ YouTube នោះទេ។ ស្មាតហ្វូន​អាច​មាន​អត្ថប្រយោជន៍​ច្រើន​ជាង​ការ​គិត​របស់​យើង​ ប្រសិន​បើ​ឪពុក​ម្តាយ​អនុញ្ញាត​ឱ្យ​កូន​ប្រើ​វា​តាម​វិធី​ត្រឹម​ត្រូវ។ យើងកំពុងព្យាយាមផ្សព្វផ្សាយការយល់ដឹងអំពីកម្មវិធីមានប្រយោជន៍សម្រាប់កូនៗរបស់ពួកគេ។» មន្រ្តីកម្មវិធីខាងលើពន្យល់ដូច្នេះ៕