លោកវេជ្ជបណ្ឌិត ហេង ប៊ុនគៀត ប្រធាននាយកដ្ឋានឱសថ ចំណីអាហារ បរិក្ខារពេទ្យ និងគ្រឿសម្អាងនៃក្រសួងសុខាភិបាល ផ្ញើសារទៅកាន់ប្រជាពលរដ្ឋ កុំឲ្យភ័យព្រួយពីរឿងឱសថ ហើយកុំគិតថា ឱសថ ដែលនាំចូលកម្ពុជា មិនមានគុណភាព ឬគិតថា ទាល់តែប្រទេសនេះ-ប្រទេសនោះ ទើបមានឱសថល្អ។ លោក អះអាងថា ឱសថ ដែលចរាចរនៅកម្ពុជា និងឱសថ ដែលចរាចរនៅប្រទេសដទៃ គឺមានគុណភាពដូចគ្នា។    
 

ធ្វើជាវាគ្មិន១រូបក្នុងសន្និសីទសារព័ត៌មានស្តីពីសមិទ្ធផលរយៈពេល៥ឆ្នាំចុងក្រោយ នៅទីស្តីការគណៈរដ្ឋមន្រ្តី កាលពីព្រឹកថ្ងៃទី១៥ ខែកញ្ញា ឆ្នាំ២០២២ លោកវេជ្ជបណ្ឌិតដែលបម្រើការងារលើផ្នែកឱសថរូបនេះ មានប្រសាសន៍ដូច្នេះថា៖«យើង មើលតាមរោងចក្រផលិត ខ្សែច្រវាក់ផលិតកកម្ម យើង មើលតាំងពីគុណភាពមួយចប់ រហូតដល់ដាក់លក់លើទីផ្សារ គឺត្រូវតែមានគុណភាពដូចនឹងឯកសារ និងគុណភាពរបស់វាឲ្យដូចផលិតផលឱសថរបស់បរទេស»។ 
  

លោក លើកឧទាហរណ៍ថា បើកម្ពុជា យកឱសថរបស់ប្រទេសបារាំង និងឱសថរបស់អឺរ៉ុប ធ្វើជាគោល ឱសថពីបណ្តាប្រទេសដទៃទៀត ដែលត្រូវនាំចូលកម្ពុជា គឺត្រូវតែមានគុណភាព និងមានសុវត្ថិភាព ដូចឱសថរបស់ប្រទេសបាំង និងឱសថរបស់អឺរ៉ុបដែរ។ លោក បន្តថា រដ្ឋាភិបាលកម្ពុជា និងលោក មម ប៊ុនហេង រដ្ឋមន្រ្តីក្រសួងសុខាភិបាល បានយកចិត្តទុកដាក់លើបញ្ហាឱសថនេះ។   

លោកវេជ្ជបណ្ឌិត ជម្រាបសាធារណជនទៀតថា គ្រប់ឱសថ សុទ្ធតែត្រូវចុះបញ្ជីទទួលស្គាល់ដោយក្រសួសុខាភិបាល មុននឹងអាចដាក់លក់លើទីផ្សារកម្ពុជា។ លោក បន្ថែមថា នៅពេលឱសថ ចូលទៅក្នុងទីផ្សាយហើយ ក៏មិនមែនក្រសួងសុខាភិបាល ឈប់អើពើដែរ ដោយក្រសួង នៅតែតាមពិនិត្យមើលជាប់ជាប្រចាំ ដើម្បីធានាថា ឱសថទាំងអស់នោះ នៅតែរក្សាគុណភាពបាន១០០ភាគរយ ដូចដើម។ 
 

របាយការណ៍១ស្តីពីសមិទ្ធផលរយៈពេល៥ឆ្នាំរបស់ក្រសួងសុខាភិបាល ត្រូវបានចែកជូនអ្នកសារព័ត៌មាន ក្នុងសន្និសីទសារព័ត៌មានខាងលើ។ ផ្អែកតាមរបាយការណ៍នោះ មន្ទីរពេទ្យរដ្ឋនៅគ្រប់២៥រាជធានី-ខេត្ត ត្រូវបានវាយតម្លៃថា មានគុណភាព៨០ភាគរយ ដោយគិតត្រឹមឆ្នាំ២០២១៕