ជាង២ឆ្នាំក្នុងអំឡុងកូវីដ-១៩ ក្រសួងសុខាភិបាល ចំណាយថវិកាអស់ ៧៥២លានដុល្លារ

ជាតិ

សង្គមជាតិ

ជាង២ឆ្នាំក្នុងអំឡុងកូវីដ-១៩ ក្រសួងសុខាភិបាល ចំណាយថវិកាអស់ ៧៥២លានដុល្លារ

17, Sep 2022 , 5:19 pm

រូបភាព

លោកស្រី យក់ សម្បត្តិ រដ្ឋលេខាធិការ និងជាអ្នកនាំពាក្យក្រសួងសុខាភិបាល ថ្លែងក្នុងសន្និសីទសារព័ត៌មាន នៅទីស្តីការគណៈរដ្ឋមន្រ្តី កាលពីថ្ងៃទី១៥ ខែកញ្ញា ឆ្នាំ២០២២។ រូបពី អង្គភាពអ្នកនាំពាក្យរដ្ឋាភិបាល

ដោយ៖ វន ស៊ីចេន

ភ្នំពេញ៖ លោកស្រី យក់ សម្បត្តិ រដ្ឋលេខាធិការ និងជាអ្នកនាំពាក្យក្រសួងសុខាភិបាល ថ្លែងថា រដ្ឋាភិបាលចំណាយថវិការប្រមាណ៧៥២លានដុល្លារ ក្នុងរយៈពេលជាង២ឆ្នាំ នៃវិបត្តិកូវីដ-១៩។ ថវិការនេះ ក្រសួងសុខាភិបាល បានផ្ដល់ឲ្យក្រុមគ្រូពេទ្យ សម្រាប់ទិញឱសថ វ៉ាក់សាំង សម្ភារៈសុខាភិបាល និងឧបត្ថម្ភដល់មន្ដ្រីសុខាភិបាលជួរមុខ។

ក្នុងសន្និសីទសារព័ត៌មាន ស្តីពី «សមិទ្ធផលសម្រេចបានរយៈពេល៥ឆ្នាំ របស់ក្រសួងសុខាភិបាល » នាព្រឹកថ្ងៃទី១៥ ខែកញ្ញា ឆ្នាំ២០២២ នៅទីស្តីគណៈរដ្ឋមន្រ្តី អ្នកស្រី យក់ សម្បត្តិ លើកឡើងថា វិស័យសុខាភិបាលគឺជាជ្រុងមួយនៃយុទ្ធសាស្ត្រចតុកោណ និងកំពុងអនុវត្តផែនការរបស់ខ្លួន ទៅតាមផែនការយុទ្ធសាស្ត្រអភិវឌ្ឍន៍ជាតិឆ្នាំ ២០១៩-២០២៣។ អ្នកស្រី បញ្ជាក់ថា ថវិការនេះបានទទួលការគាំទ្រពីក្រសួងសេដ្ឋកិច្ច និងហិរញ្ញវត្ថុ និងមានការសម្រេចពីសម្ដេចនាយករដ្ឋមន្រ្តី ហ៊ុន សែន។ ក្រសួងសុខាភិបាល ប៉ាន់ស្មានទៅលើការចំណាយថវិការនេះ ប្រហែល៣៦លានដុល្លារ ក្នុងឆ្នាំ២០២០។

ដោយឡែក ក្នុងឆ្នាំ២០២១ ក្រសួងក៏បានចំណាយថវិកាទាំងទិញវ៉ាក់សាំង ឧបករណ៍ និងថវិកាមួយចំនួន នឹងបានឧបត្ថម្ភដល់មន្ដ្រីសុខាភិបាល មន្ដ្រីជួរមុខ មន្ដ្រីចត្តាឡីស័ក ក្រុមគ្រូពេទ្យព្យាបាលនៅមន្ទីរពេទ្យ និងក្រុមគ្រូពេទ្យដែលចុះទៅព្យាបាលដល់មូលដ្ឋានតាមភូមិ។ បើតាម អ្នកស្រី យក់ សម្បត្តិ ក្រសួងចំណាយថវិកាអស់ប្រមាណ៦៩២ លានដុល្លារ ក្នុងឆ្នាំ២០២១ ។ ចំណែក ក្នុងឆ្នាំ២០២២ គិតត្រឹមខែកញ្ញា រដ្ឋចំណាយថវិការអស់ ២៤លានដុល្លារ ដែលជាការប៉ានស្មាន។ នេះបើតាម អ្នកនាំពាក្យក្រសួងសុខាភិបាលដដែល។

អ្នកនាំពាក្យរដ្ឋាភិបាលរូបនេះ ថ្លែងយ៉ាងដូច្នេះថា៖ «ថវិកានេះ ខ្ញុំគិតថាសម្ដេចតេជោ ហ៊ុន សែន លោកតែងតែជម្រាបជូនថា ក្នុងរយៈពេលជាង២ឆ្នាំកន្លងមកនេះ យើងប្រើប្រាស់ធនធានថវិកាច្រើនណាស់។ សម្រាប់ក្រសួងសុខាភិបាលតួលេខយើងអត់បានគិតថា ប្រមុខរដ្ឋាភិបាលបានឧបត្ថម្ភថវិកាជូនដល់ពលរដ្ឋក្រីក្រក្រោយពីវិបត្ដិកូវីដ-១៩ នោះទេ»។

ទន្ទឹមនេះ ប្រទេសដែលជាដៃគូអភិវឌ្ឍន៍របស់កម្ពុជា មានប្រទេសចិន និងប្រទេសផ្សេងទៀត បានជួយផ្ដល់វ៉ាក់សាំងមកកម្ពុជា ដែលជាជំនួយឥតសំណង។ អ្នកស្រី បន្ថែមថា រហូតមកដល់ពេលនេះ វ៉ាក់សាំងទាំងទិញ ទាំងជំនួយសរុបប្រហែល ៧៤លានដូស។

គួរបញ្ជាក់ថា នៅសល់វ៉ាក់សាំងមកពីកូវ៉ាក់ប្រមាណជាង ៥លានដូស និងវ៉ាក់សាំងមកពីប្រទេសចិន ១៥លានដូសទៀត រួមទាំងវ៉ាក់សាំងប្រទេសជាដៃគូ ដែលរំពឹងថាទទួលបាននៅឆ្នាំ ២០២៣ផងដែរ ។ ដោយឡែក វ៉ាក់សាំងដែលប្រើប្រាស់រាល់ថ្ងៃមានប្រហែល ៦លានដូស។ ក្រសួងបានបញ្ជូនវ៉ាក់សាំងមួយចំនួនទៅតាមមន្ទីរពេទ្យនិងមណ្ឌលសុខភាពដើម្បីចាក់ជូនពលរដ្ឋរួចរាល់ហើយ។ នេះបើតាម អ្នក ស្រី យក់ សម្បត្តិ៕