ជាតិ
សង្គមជាតិ
រឿងត្រូវបញ្ចប់៖ អាណាព្យាបាលសិស្ស មិនប្តឹង, លោកនាយកសាលាសេរីភាព សុំការអធ្យាស្រ័យ រូបពីវិទ្យាល័យហ៊ុនសែន សេរីភាព
× ភ្នំពេញ៖ រឿងរ៉ាវនៅវិទ្យាល័យ ហ៊ុន សែន សេរីភាព ត្រូវភាគីទាំងពីរ ស្រុះស្រួលគ្នាបញ្ចប់តាមផ្លូវសន្តិវិធី ដោយភាគីអាណាព្យាបាល សម្រេចមិនប្តឹងលោកនាយកឡើយ ហើយលោកនាយក បានសុំការអធ្យាស្រ័យចំពោះទង្វើរបស់ខ្លួន។
កាលពីព្រឹកថ្ងៃទី១៦ ខែកញ្ញា ឆ្នាំ២០២២ គណៈគ្រប់គ្រងវិទ្យាល័យហ៊ុនសែនសេរីភាព ក្រុងតាខ្មៅ ខេត្តកណ្ដាល បានជួបប្រជុំជាមួយអាណាព្យាបាលសិស្ស និងសិស្សជាសាមីខ្លួន ដើម្បីសម្របសម្រួលករណីវិវាទ ដែលលោកនាយកបានវាយសិស្សស្រីមួយរូបចំស្មាខាងក្រោយ ព្រោះសិស្សនោះមិនគោរពវិន័យ។ ជាលទ្ធផល ភាគីទាំងសងខាង ព្រមព្រៀងលើការសម្រេច៤ចំណុច។
តាមរយៈសារសំឡេងដែលលោក រស់ សុវាចា អ្នកនាំពាក្យក្រសួងអប់រំ ផ្ដល់ឱ្យសារព័ត៌មានថ្មីៗ កិច្ចព្រមព្រៀងទាំង៤នោះ៖
ទី១ មាតាបិតាទទួលស្គាល់ មិនបានខឹង និងមិនមានគម្រោងប្ដឹងទៅលោកនាយកឡើយ។ ប៉ុន្តែអាណាព្យាបាលសិស្ស បានសំណូមពរទៅលោកនាយក និងអ្នកសារព័ត៌មាន ឲ្យបញ្ឈប់ការយកព័ត៌មានទៅចុះផ្សាយ ដែលមានចេតនាចោទប្រកាន់ថា កូនរបស់គាត់ខូច ច្រឡើសបើស ដែលជាហេតុផលមួយធ្វើឱ្យកូនរបស់គាត់អាចបាក់ទឹកចិត្ត ឬប៉ះពាល់ដល់កិត្តិយសរបស់នាង។
ទី២ អាណាព្យាបាលស្នើសុំកុំឱ្យមានការគុំកួន ធ្វើបាបដោយចេតនា ឬអចេតនា និងដាក់បន្ទុកឱ្យកូនរបស់គាត់។
ទី៣ លោកនាយក បានទទួលយកសំណូមពរនោះ ដើម្បីកែលម្អ និងសុំការអធ្យាស្រ័យចំពោះទង្វើឆ្គាំឆ្គងរបស់លោកផងដែរ។
ទី៤ ភាគីទាំងពីរបានឯកភាពស្រុះស្រួលគ្នា បញ្ចប់ព័ត៌មាននេះ ដោយសន្ដិវិធី។
សូមបញ្ជាក់ថា ក្រោយពីសាធារណជន បានឃើញខ្លីបវីដេអូមួយ ដែលមានរយៈពេលជាង១នាទី បង្ហាញពីសកម្មភាពគ្រូវាយសិស្សស្រីម្នាក់មួយដៃចំស្មាពីក្រោយ និងបានប្រទាញកាបូបស្ពាយក្រោយរបស់នាងផងនោះ បានធ្វើឱ្យសាធារណជនជាច្រើន បានយកបណ្ដាញសង្គមហ្វេសប៊ុក ជាវេទិកាវែកញែក។ ភ្លាមៗក្រោយពីមានការរិះគន់ លោកនាយកវិទ្យាល័យសេរីភាព ម៉ម សុធានី បានបកស្រាយថា គឺមកពីសិស្សស្រីនោះ យកប៊ិកគូសវាសលើអាវរៀន ផ្គើននិងគ្រូ ខណៈពេលដែលគ្រូកំពុងប្រាប់ឱ្យសិស្សក្នុងសាលាឈប់គូសវាសបែបនោះ។ យ៉ាងណាក៏ដោយ ក៏មានដែរ អ្នកដែលបានរិះគន់ នារីម្នាក់ដែលទំនងជាអ្នកថតវីដេអូនោះ ថានាងមានសម្ដីមិនសមរម្យ ជាសិស្សដែលទទួលបានការអប់រំ៕
Tag:
អប់រំ
សាលា
នាយកសាលា
សិស្ស
អាណាព្យាបាល
© រក្សាសិទ្ធិដោយ thmeythmey.com