ដើម្បីឲ្យផ្លាស់ប្តូរការគិតខុសរបៀបនេះ អ្នកស្រី អ៊ឹង កន្ថាផាវី ផ្ញើសារទៅសង្គមទាំងមូលយ៉ាងដូច្នេះថា៖«ស្រ្តី អាចពាក់អាវខ្លីលើខ្លីក្រោម ប៉ុន្តែអត់ផ្តល់សិទ្ធិឲ្យបុរសមករំលោភ អត់ឲ្យបុរសមកបៀតបៀនគេទេ គាត់ មិនមែនបើកផ្លូវឲ្យបុរសមកបៀតបៀនគាត់ឯណា។ នេះជាសិទ្ធិសេរីភាពរបស់គាត់ ក្នុងការ [ស្លៀក] ពាក់ខោអាវ តាមម៉ូត តាមសម័យកាល ដែលគាត់ចង់បាន»។

សាររបស់អ្នកស្រីរដ្ឋមន្រ្តី ធ្វើឡើងក្នុងសន្និសីទសារព័ត៌មានស្តីពីលទ្ធផល៥ឆ្នាំចុងក្រោយរបស់ក្រសួងកិច្ចនារី ដែលត្រូវបានរៀបចំនៅទីស្តីការគណៈរដ្ឋមន្រ្តី នាព្រឹកថ្ងៃទី២១ ខែកញ្ញា ឆ្នាំ២០២២។ អ្នកស្រី បន្តថា ដើម្បីទប់ស្កាត់ការរំលោភ ឬការបៀតបៀនផ្លូវភេទលើស្រ្តី គឺត្រូវអប់រំសង្គមទាំងមូល មិនមែនអប់រំតែបុរសនិងស្រ្តីនោះទេ។ ជាមួយគ្នានេះ អ្នកស្រី រំលេចថា ក្រសួងកិច្ចការនារី តែងធ្វើយុទ្ធនាការបុរសល្អ ជារៀងរាល់ឆ្នាំ៕