បណ្ដាសហគ្រាសធុនតូច និងមធ្យមក្នុងប្រទេសកម្ពុជា កំពុងតែបោះជំហានឆ្ពោះទៅរកឱកាសនៃការនាំចេញផលិតផលរបស់ខ្លួន ចេញក្រៅប្រទេស តាមរយៈកម្មវិធី “ជើងឯកអ្នកនាំចេញកញ្ចប់ ទំនិញខ្នាតតូច” (SPEC) ដែលគាំទ្រដោយសហគ្រិនខ្មែរ និងស្វីសខន់ថាក់ (Swisscontact) ដោយមានការសហការ ពីសភាពាណិជ្ជកម្មអឺរ៉ុបនៅកម្ពុជា (EuroCham) និងសមាគមសហគ្រិនស្ត្រី កម្ពុជា (CWEA)។ កម្មវិធី “ជើងឯកអ្នកនាំចេញកញ្ចប់ទំនិញខ្នាតតូច” នេះ បានចាប់ផ្ដើមអនុវត្ត ដំណើរការកាលពីថ្ងៃទី២៨ ខែមិថុនា ឆ្នាំ២០២២ ក្រោមគម្រោង “ធ្វើឱ្យប្រសើរឡើងនូវពាណិជ្ជកម្ម តាមប្រព័ន្ធអេឡិចត្រូនិក នៃកញ្ចប់ទំនិញខ្នាតតូចសម្រាប់ សហគ្រាសធុនតូច និងមធ្យម (SeT4SME)” ដែលមានគោលបំណងពង្រឹងសមត្ថភាព របស់ភាគីពាក់ព័ន្ធសំខាន់ៗ នៅក្នុងវិស័យនាំចេញកញ្ចប់ ទំនិញខ្នាតតូច ហើយធ្វើឲ្យបណ្ដាក្រុមហ៊ុន នាំចេញកញ្ចប់ទំនិញខ្នាតតូច អាចផ្ញើកញ្ចប់ទំនិញរបស់ខ្លួន ទៅកាន់ទីផ្សារអន្តរជាតិ កាន់តែងាយស្រួល ឆាប់រហ័ស និងមានប្រសិទ្ធភាពចំណាយជាងមុន។
លោក បណ្ឌិត ឈៀង វណ្ណមុនិណ្ឌ នាយកប្រតិបត្តិសហគ្រិនខ្មែរ បានមានប្រសាសន៍ថា៖ «ការធ្វើឌីជីថលនីយកម្មអជីវកម្ម ជាយុទ្ធសាស្ត្រថ្មីមួយ ក្នុងការស្វែងរកទីផ្សារ ដែលបានធ្វើឡើងស្របតាម សសរស្តម្ភ ធុរកិច្ចឌីជីថល ក្នុងចំណោមសសរស្តម្ភទាំង៣ នៃក្របខណ្ឌគោលនយោបាយ សេដ្ឋកិច្ច និងសង្គមឌីជីថលកម្ពុជា ឆ្នាំ២០២១-២០៣៥ នៃរាជរដ្ឋាភិបាលកម្ពុជា។ ដូចនេះសហគ្រិនខ្មែរ សង្ឃឹមថា និន្នាការនៃការធ្វើអាជីវកម្មបែបនេះ នឹងក្លាយជាច្រកទ្វារថ្មី សម្រាប់បង្កើនការលក់ រួមទាំងការនាំចេញនូវកញ្ចប់ទំនិញ ពីបណ្ដាសហគ្រាសធុនតូច និងមធ្យមនានាក្នុងស្រុក ទៅកាន់ទីផ្សារអន្តរជាតិ” ។
លោក Rajiv Pradha នាយកប្រចាំប្រទេសរបស់ ស្វីសខន់ថាក់កម្ពុជា និងជាអ្នកសម្របសម្រួល សម្ព័ន្ធសកលសម្រាប់ការសម្របសម្រួលពាណិជ្ជកម្ម ប្រចាំកម្ពុជា បានថ្លែងថា៖« យើងមានក្ដីសប្បាយរីករាយ ដែលបានរៀបចំបង្កើតកម្មវិធី ជើងឯកអ្នកនាំចេញកញ្ចប់ទំនិញខ្នាតតូចនេះឡើង ជាមួយនឹងសហគ្រិនខ្មែរ និងសមាគមសហគ្រិនស្ត្រីកម្ពុជា ដោយមានការគាំទ្រ ពីសភាពាណិជ្ជកម្មអឺរ៉ុបនៅកម្ពុជា។ ខ្ញុំមានជំនឿចិត្តថា តួអង្គគំរូនៅក្នុងកម្មវិធី ជើងឯកអ្នកនាំចេញ កញ្ចប់ទំនិញខ្នាតតូចនេះ នឹងជួយដល់សហគ្រាសធុនតូច និងមធ្យមផ្សេងទៀត ឲ្យពង្រីកទីផ្សាររបស់ខ្លួនជាលក្ខណៈអន្តរជាតិ ហើយជួយពង្រឹងដល់ភាពស័ក្ដិសិទ្ធិ នៃសកម្មភាពនាំចេញកញ្ចប់ទំនិញខ្នាតតូច ពីក្នុងប្រទេសផងដែរ។ សហគ្រាសធុនតូច និងមធ្យម ដែលចូលរួមនៅក្នុងកម្មវិធីនេះ នឹងអាចទទួលបានចំណេះដឹងទាក់ទង ក្បួនច្បាប់ និងនីតិវិធី ក៏ដូចជាការអនុវត្តជាក់ស្ដែងក្នុងការ នាំចេញកញ្ចប់ទំនិញខ្នាតតូច ទៅកាន់ទីផ្សារគោលដៅរបស់ខ្លួន។ យើងក៏សង្ឃឹមផងដែរថា ការអនុវត្តសាកល្បងដែលយើងកំពុងធ្វើឡើង តាមរយៈកម្មវិធី ជើងឯកអ្នកនាំចេញកញ្ចប់ទំនិញខ្នាតតូចនេះ មានភស្តុតាងបង្ហាញពិតៗ ហើយកម្មវិធី ជើងឯក អ្នកនាំចេញកញ្ចប់ទំនិញខ្នាតតូចនេះ នឹងក្លាយជាកម្មវិធីសំខាន់សម្រាប់វិស័យនាំចេញ កញ្ចប់ទំនិញខ្នាតតូចនៅកម្ពុជា” ។
កម្មវិធី ជើងឯកអ្នកនាំចេញកញ្ចប់ទំនិញខ្នាតតូច (SPEC) បាន និងកំពុងជួយគាំទ្រដល់សហគ្រាស ធុនតូច និងមធ្យមនានា ដែលមានបំណងនាំចេញទំនិញកញ្ចប់ខ្នាតតូច ទៅកាន់ទីផ្សារអន្តរជាតិ ក៏ដូចជាជំរុញកំណើននាំចេញរបស់ខ្លួន។ សហគ្រាសធុនតូច និងមធ្យម ក្នុងវិស័យវាយនភណ្ឌកសិកម្ម សិប្បកម្ម កែច្នៃចំណីអាហារ និងឧស្សាហកម្មភស្តុភារកម្ម ជាសហគ្រាសគោលដៅក្នុងការទទួលជំនួយនេះ។ ផលិតផលដែលសមស្រប គឺជាផលិតផល ដែលផលិតក្នុងស្រុក ហើយអាចនាំចេញជាកញ្ចប់ខ្នាតតូចបាន ក្នុងទម្ងន់រហូតដល់ទៅ ២០គីឡូក្រាម តាមរយៈសេវាប្រៃសណីយ៍ ឬសេវាដឹកជញ្ជូនបញ្ញើរហ័ស ហើយទំនិញទាំងអស់នោះ មិនត្រូវជាប់ក្នុងបញ្ជីទំនិញហាមឃាត់សម្រាប់ការនាំចេញនោះឡើយ។ បណ្ដាសហគ្រាសធុនតូច និងមធ្យម បានសម្ដែងការអរគុណចំពោះការផ្ដល់ ឱកាសចូលរួម នៅក្នុងកម្មវិធីនៅអំឡុងពេលសម្ពោធ ដាក់ឲ្យអនុវត្តកម្មវិធីជើងឯកអ្នកនាំចេញកញ្ចប់ ទំនិញខ្នាតតូច (SPEC) ហើយពួកគាត់ នឹងបន្តចូលរួមក្នុងកម្មភាពជាបន្តបន្ទាប់ ពីកម្មវិធី “ជើងឯកអ្នក នាំចេញកញ្ចប់ទំនិញខ្នាតតូច (SPEC)” ។
លោកស្រី សេង តក្កនារី ស្ថាបនិកក្រុមហ៊ុន Sentosa Silk មានប្រសាសន៍ថា៖ “ព្រឹត្តិការណ៍នេះល្អណាស់ ហើយជាវេទិកាមួយល្អ សម្រាប់ភាគីពាក់ព័ន្ធទាំងអស់ដូចជា អង្គការស្វីសខន់ថាក់កម្ពុជា ប្រៃសណីយ៍កម្ពុជា សហគ្រិនខ្មែរ និងភាគីពាក់ព័ន្ធជាច្រើនផ្សេងទៀត។ ប្រសិនបើនិយាយពីដំណោះស្រាយ ព្រឹត្តិការណ៍នាថ្ងៃនេះ ពិតជាបានជួយបំភ្លឺ ពីរាល់ជំហានបន្ទាប់នៅក្នុងការរៀបចំ ឯកសារ និងដំណើរការផ្សេងៗទៀត។ ឱកាស គឺមាននៅនឹងមុខយើង ហើយយើងពិតជាអាចអភិវឌ្ឍ កម្មវិធីនេះ ឲ្យបានរីកចម្រើនមួយកម្រិតថែមទៀត” ។
លោកស្រី ហោ សុគន្ធា មកពីក្រុមហ៊ុន Sokunthea Natural Rice មានប្រសាសន៍ថា៖ «ព្រឹត្តិការណ៍ថ្ងៃនេះ ពិតជាល្អណាស់ ហើយលោកស្រី មានសេចក្ដីរីករាយ ដែលយើងមានវេទិកាបែបនេះ ដើម្បីចែករំលែកនូវគំនិតយោបល់របស់យើង។ សកម្មភាពនានាក្នុងថ្ងៃនេះ គួរឲ្យចាប់អារម្មណ៍ ដែលអនុញ្ញាតឲ្យសិក្ខាកាមអាចចូលរួមបានយ៉ាងពេញលេញ” ។
បណ្ដាសហគ្រាសធុនតូច និងមធ្យម បានទទួលការបណ្ដុះបណ្ដាល តម្រង់ទិស ទាក់ទងនឹងកម្មវិធី ពាណិជ្ជកម្មអេឡិចត្រូនិក និងការរៀបចំឯកសារភស្តុភារកម្ម ជាពិសេសពាណិជ្ជកម្មអេឡិចត្រូនិក ឆ្លងប្រទេស និងការរចនាផលិតផល សម្រាប់ទីផ្សារនាំចេញ។ បន្ទាប់មកទៀត សហគ្រាស នឹងត្រូវឆ្លងកាត់វគ្គបង្ហាត់បង្ហាញ ក្នុងការជំរុញដល់ការនាំចេញ ផលិតផលទៅកាន់ទីផ្សារក្រៅប្រទេស។ ជាចុងក្រោយ សហគ្រាសធុនតូច និងមធ្យម ចំនួន១៥ នឹងទទួលបានវិញ្ញាបនបត្រ ជាជើងឯកអ្នកនាំចេញ ហើយសហគ្រាសធុនតូច និងមធ្យម ដែលនាំមុខគេចំនួន៣ នឹងទទួលបានជំនួយជាទឹកប្រាក់ តាមរយៈការប្រកួតប្រជែងនៅវគ្គផ្ដាច់ព្រ័ត្រ។
គួរបញ្ជាក់ផងដែលថា សហគ្រិនខ្មែរ បង្កើតឡើងដោយក្រសួងសេដ្ឋកិច្ច និងហិរញ្ញវត្ថុ មានគោលបំណងកៀរគរ វិនិយោគ និងគ្រប់គ្រងធនធាន ដើម្បីគាំទ្រដល់ការអភិវឌ្ឍប្រព័ន្ធអេកូឡូស៊ី សហគ្រិន ដ៏រស់រវើកនៅកម្ពុជា ដោយជំរុញសកម្មភាពសហគ្រិន ទៅដល់ការច្នៃប្រឌិត និងការបង្កើតតម្លៃបន្ថែម នៅក្នុងសេដ្ឋកិច្ចកម្ពុជា។ សហគ្រិនខ្មែរ មានចក្ខុវិស័យក្លាយជាវេទិកាថ្នាលជាតិ សម្រាប់ការលើកកម្ពស់សកម្មភាពសហគ្រិន ក្នុងវិស័យអាទិភាពចំនួនបួន៖ វិស័យបច្ចេកវិទ្យា ផ្តោតលើបច្ចេកវិទ្យាក្នុងធុរកិច្ចថ្មី វិស័យសេវាកម្មផ្តោត លើផ្នែកបដិសណ្ឋារកិច្ច និងផ្នែកដឹកជញ្ជូន វិស័យកសិកម្មផ្តោតលើផលិតផលកែច្នៃ សម្រាប់ការប្រើប្រាស់ ក្នុងស្រុក និងការនាំចេញ និងវិស័យ កម្មន្តសាលផ្តោតសំខាន់ ទៅលើផលិតកម្ម ជំនួសការនាំចូល និងបណ្តុំឧស្សាហកម្មសហគ្រាសធុនតូច និងមធ្យម៕
(អត្ថបទពាណិជ្ជកម្ម)