មេដឹកនាំសមាជិកអង្គការសហប្រជាជាតិចាប់តាំងពីថ្ងៃទី២០ ខែកញ្ញា បានមកជួបជុំគ្នានាទីស្នាក់ការកណ្តាលនៃមហាសន្និបាតអង្គការសហប្រជាជាតិ។ ក្នុងសម័យប្រជុំលើកទី​៧៧ នេះ ប្រមុខការទូតចិន លោកវ៉ាង យី បានអំពាវនាវឱ្យប្រទេសទាំងអស់ ជាពិសេសរុស្ស៊ី និងអ៊ុយក្រែន ដោះស្រាយជម្លោះប្រកបដោយសន្តិវិធី និងតាមការចរចា។ 

 

«រក្សាសន្តិភាព កុំបង្កជម្លោះ។ យើងត្រូវតែដោះស្រាយជម្លោះតាមរយៈកិច្ចចរចា និងការពិភាក្សា»។ លោកវ៉ាង បានសង្កត់ធ្ងន់បែបនេះ នៅចំពោះមុខមេដឹកនាំបណ្តាប្រទេសជាច្រើន។ ការអំពាវនាវបែបនេះ ធ្វើឡើងដោយសារ ប្រមុខការទូតចិនយល់ថា ពិភពលោក កំពុងប្រឈមបញ្ហាជាច្រើន និងបង្ការកុំឱ្យជះឥទ្ធិពលអវិជ្ជមានលើប្រទេសកំពុងអភិវឌ្ឍ។ 

 

ជាមួយគ្នានេះ លោកវ៉ាង បានបន្ថែមថា ចិនគាំទ្ររាល់កិច្ចទាំងអស់ ក្នុងការស្វែងរកការដោះស្រាយប្រកបដោយសន្តិភាព ចំពោះវិបត្តិនៅអ៊ុយក្រែន។ ចិន ជាប្រទេសមួយ ក្នុងចំណោមប្រទេសតិចតួចផ្សេងទៀត ដែលមិនធ្លាប់រិះគន់លើរុស្ស៊ីឡើង ជុំវិញការឈ្លានពានអ៊ុយក្រែន។ 

 

បន្ថែមពីនេះ ទីប្រឹក្សារដ្ឋចិន ក៏បានស្នើឱ្យប្រទេសទាំងអស់ អនុវត្តកិច្ចសហប្រតិបត្តិការជាមួយគ្នា​ ជាជាងការប្រឈមមុខ និងសាមគ្គីគ្នា ជាជាងបង្កភាពបែកបាក់៕