អ្នកចាត់ការទូទៅជម្រើសជាតិអង់គ្លេស លោក Gareth Southgate មិនមានការអត្ថាធិប្បាយស្តីបន្ទោសអ្វីឡើយលើខ្សែការពារ Harry Maguire និងអ្នកចាំទី Nick ដែលបានបង្កើតកំហុសនាជំនួបស្មើ ៣-៣ ជាមួយអង់គ្លេសក្នុងព្រឹត្តិការណ៍ Nations League។

 

Maguire ទទួលរងនូវការហ៊ោចំអកយ៉ាងខ្លាំងពីអ្នកគាំទ្រនៅពេលឮការប្រកាសពីឈ្មោះខ្សែការពាររូបនេះ។ អ្វីដែលកាន់តែទទួលរងនូវការរិះគន់នោះ គឺខ្សែការពារ Manchester United បានទាក់ជើង Jamal Musiala ឲ្យដួលក្នុងតំបន់គ្រោះថ្នាក់ ដែលនាំឲ្យ Ilkay Gundogan ស៊ុតបាល់ប៉េណាល់ទីនាំមុខ ១-០ នៅនាទី៥២។

 

ឈានដល់នាទី៦៧ Kai Havertz បានបង្កើនការនាំមុខ ២-០ សម្រាប់អាល្លឺម៉ង់ មុនពេលដែល Luke Shaw, Mason Mount និង Harry Kane រកបានម្នាក់១គ្រាប់ ដើម្បីឲ្យតោកំណាចអង់គ្លេស នាំមុខ ៣-២ វិញ។

 

ទោះបីជាយ៉ាងណាក៏ដោយ ជាមួយនឹង៣នាទីដែលនៅសេសសល់ អាល្លឺម៉ង់ បានវាយបកតាមស្មើវិញ ៣-៣ ដែលជាការសម្រេចបានគ្រាប់ទីពីររបស់ Havertz ខណៈអ្នកចាំទីអង់គ្លេស Nick Pope រងនូវការរិះគន់ផងដែរពីការធ្វេសប្រហែសចំពោះគ្រាប់បាល់ដែលកើតចេញពីការស៊ុតស្រាលៗ។

 

លោក Southgate បានមើលឃើញពីកំហុសរបស់ Maguire និង Pope ប៉ុន្តែលោកនៅតែសរសើរចំពោះស្មារតីក្រុមទាំងមូល។ 

 

«នៅរាត្រីនេះ នៅចុងបញ្ចប់ ការបង្ករកំហុសមួយចំនួន បានបង្កឲ្យយើងធ្លាយគ្រាប់បាល់ ប៉ុន្តែខ្ញុំនឹងផ្តោតលើកត្តាជាក់ស្តែង ដោយពួកគេលេងក្នុងស្មារតីជាក្រុម និងមានការជឿជាក់»។ នេះជាការអះអាងរបស់អ្នកចាត់ការទូទៅក្រុមជម្រើសជាតិអង់គ្លេស។

 

សម្រាប់ព្រឹត្តិការណ៍ UEFA Nations League នេះ អង់គ្លេស បន្តស្ថិតក្នុងបាតតារាងនៃក្រុមបី ដោយមានត្រឹម៣ពិន្ទុ។ អ៊ីតាលី ដែលបានយកឈ្នះម្ចាស់ផ្ទះ ហុងគ្រី ២-០ បន្តឈរលើតារាងដោយមាន១១ពិន្ទុ។ ហុងគ្រីមាន១០ពិន្ទុ និងអាល្លឺម៉ង់ មាន៧ពិន្ទុ ក្រោយប្រកួតបាន៦លើករៀងៗខ្លួន៕