«ខ្ញុំធ្លាប់បានប្រកាសហើយថា យើងអត់គាំទ្រទេ ដោយយើងប្រឆាំងជាមួយការបង្កើតរដ្ឋ ផ្ដាច់រដ្ឋ ផ្ដាច់ទឹកដី។ ហើយនឹងការមិនប្រើប្រាស់កម្លាំងប្រឆាំង និងការប្រើប្រាស់កម្លាំងគំរាម។ អ៊ីចឹងគេអាចយល់បានហើយ»។ នេះជាការបញ្ជាក់របស់សម្ដេច ហ៊ុន សែន ប្រាប់ទៅលោក ប្រាក់ សុខុន រដ្ឋមន្រ្តីក្រសួងការបរទេសកម្ពុជា ពីជំហររបស់កម្ពុជាលើកឆាកអន្តរជាតិ ជុំវិញបញ្ហាជម្លោះរវាងរុស្ស៊ី និងអ៊ុយក្រែន។
 

សម្រាប់ប្រមុខរដ្ឋាភិបាលកម្ពុជា ការរំលោភបំពានយកទឹកដីរបស់រដ្ឋណាមួយ ជារឿងមិនគួរគប្បី និងមិនត្រឹមត្រូវឡើយ។

 

កាលពីថ្ងៃទី៣០ ខែកញ្ញា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានចុះហត្ថលេខាដាក់បញ្ចូលដែនដីអ៊ុយក្រែនចំនួន៤ ជាផ្នែកមួយរបស់រុស្ស៊ីជាផ្លូវការ។​ ក្នុងពិធីចុះហត្ថលេខានេះ លោកពូទីនបានផ្តាំប្រាប់ក្រុងកៀវ និងប្រទេសលោកខាងលិចថា ក្រុងមូស្គូ នឹងមិនបោះបង់ប្រជាជននៅក្នុងតំបន់ដែលខ្លួនគ្រប់គ្រងទាំងនោះឡើយ។ ដែនដីអ៊ុយក្រែនចំនួន ៤ ដូចជា ​តំបន់ Donetsk, តំបន់ Kherson, តំបន់ Luhansk និង​តំបន់ Zaporizhzhia ។
 

 
 

ការដាក់បញ្ចូលតំបន់ចំនួន ៤នៅអ៊ុយក្រែន ដែលស្មើប្រហែលនឹង១៥ភាគរយនៃទឹកដីអ៊ុយក្រែនទាំងអស់ មិនត្រូវបានគាំទ្រពីអន្តរជាតិនោះទេ។ អគ្គលេខាធិការអង្គការសហប្រជាជាតិ បានចាត់ទុកទង្វើរបស់រុស្ស៊ី ខុសនឹងធម្មនុញ្ញអង្គការសហប្រជាជាតិ។ បើគិតចាប់ពីឆ្នាំ ២០១៤ ដែលគ្រប់គ្រងតំបន់គ្រីមេ រុស្ស៊ីបានកាន់កាប់ដែនដីអ៊ុយក្រែនប្រមាណ ២២ភាគរយ៕