កីឡាអន្តរជាតិ
អន្តរជាតិ
World Cup ៖ កីឡាករអាល្លឺម៉ង់នឹងទទួលបានប្រាក់លើកទឹកចិត្តម្នាក់ ៣៩ម៉ឺនដុល្លារ ពី DFB បើឈ្នះពាននៅកាតា
× កីឡាករដែលលេងឱ្យក្រុមបាល់ទាត់ជម្រើសជាតិអាល្លឺម៉ង់ នឹងទទួលបានប្រាក់លើកទឹកចិត្តបន្ថែមចំនួន ៤០ម៉ឺនអឺរ៉ូ (៣៩ម៉ឺនដុល្លារ) ក្នុងម្នាក់ ប្រសិនបើពួកគេអាចលើកពានជើងឯកកំពូល World Cup ជាថ្មីក្នុងប្រទេសកាតានាចុងឆ្នាំ ២០២២ ។ នេះបើតាមសហព័ន្ធបាល់ទាត់អាល្លឺម៉ង់ (DFB) ប្រកាសកាលពីពេលថ្មីៗនេះ ។
ប្រាក់លើកទឹកចិត្ត ដែល DFB នឹងផ្តល់ឱ្យកីឡាករអាល្លឺម៉ង់នេះ បានកើនឡើងពីចំនួន ៣៤ម៉ឺនដុល្លារ បើធៀបនឹងការប្រកួតក្នុងព្រឹត្តិការណ៍ World Cup នេះដូចគ្នា ក្នុងឆ្នាំ ២០១៨ ដែលធ្វើឡើងនៅប្រទេសរុស្ស៊ី។ កាលណោះ អាល្លឺម៉ង់ ក្នុងនាមជាក្រុមការពារតំណែងជើងឯក បានធ្លាក់ចេញត្រឹមវគ្គចែកពូល។
កាលពីWorld Cup ២០១៤ នៅប្រទេសប្រេស៊ីល កីឡាករអាល្លឺម៉ង់ ទទួលបានប្រាក់លើកទឹកចិត្តក្នុងម្នាក់ចំនួន ៣០ម៉ឺនអឺរ៉ូ(២៩ម៉ឺនដុល្លារតម្លៃបច្ចុប្បន្ន) ក្រោយជួយជម្រើសជាតិគ្រងជើងឯក។
សម្រាប់ការប្រកួតនៅកាតាវិញ បើអាល្លឺម៉ង់ឆ្លងផុតវគ្គចែកពូល នោះកីឡាករម្នាក់ៗ នឹងទទួលបានប្រាក់ចំនួន ៥ម៉ឺនអឺរ៉ូ ហើយនៅពេលអាចឈានជើងដល់វគ្គ៨ក្រុមចុងក្រោយនោះ តម្លៃប្រាក់លើកទឹកចិត្តនេះ នឹងកើនឡើងដល់ ១០ម៉ឺនអឺរ៉ុក្នុងម្នាក់។
បើអាល្លឺម៉ង់ឈានជើងបន្តដល់វគ្គពាក់កណ្តាលផ្តាច់ព្រ័ត្រ ប្រាក់លើកទឹកចិត្តនឹងកើនឡើងដល់ ១៥ម៉ឺនអឺរ៉ូ ហើយបើត្រឹមប្រកួតឈ្នះចំណាត់ថ្នាក់លេខ៣ នោះកីឡាករនឹងទទួលបានត្រឹមម្នាក់ ២០ម៉ឺនអឺរ៉ូប៉ុណ្ណោះ។ តែបើចាញ់ការប្រកួតនៅវគ្គផ្តាច់ព្រ័ត្រកីឡាករនឹងទទួលបានប្រាក់ ២៥ម៉ឺនអឺរ៉ូក្នុងម្នាក់ៗ។
«យើងបានជជែកគ្នាយ៉ាងខ្លាំងក្លាលើរឿងទាំងនេះក្នុងបរិយាកាសដ៏ល្អ និងដើម្បីជាការស្ថាបនា ហើយជិតទៅនឹងការបញ្ចប់នៃកិច្ចពិភាក្សានេះ យើងបានរកឃើញនៅដំណោះស្រាយដ៏សមហេតុសមផលមួយសម្រាប់អ្នកគ្រប់គ្នា។»។ នេះបើសម្តីលោក Bernd Neuendorf ប្រធាន DFB ដោយបានជួបជាមួយក្រុមកីឡាករអាល្លឺម៉ង់ រួមមាន Manuel Neuer, Thomas Mueller, Joshua Kimmich និង Illkay Guendogan រួច។
នាព្រឹត្តិការណ៍ World Cup 2022 នៅប្រទេសកាតា អាល្លឺម៉ង់ ចង់កែប្រែលទ្ធផលដ៏អាក្រក់របស់ពួកគេ កាលពីឆ្នាំ ២០១៨ ដែលបានធ្លាក់ចេញត្រឹមវគ្គចែកពូលនេះ ។ សម្រាប់ការប្រកួតខាងមុខនេះ ពួកគេស្ថិតនៅក្នុងពូល E ដែលមានក្រុមអេស្ប៉ាញ កូស្តារីកា និងជប៉ុន ។
សូមជម្រាបថា World Cup 2022 នៅកាតានឹងចាប់ផ្តើមពីថ្ងៃទី២០ ខែវិច្ឆិកា ហើយអាល្លឺម៉ង់ត្រូវប្រកួតបើកឆាកទល់ជប៉ុននៅថ្ងៃទី២៣ ខែវិច្ឆិកា ជាជំនួបដំបូងពូល E៕
Tag:
World Cup
DFB
Germany
© រក្សាសិទ្ធិដោយ thmeythmey.com