ជាតិ
សង្គមជាតិ
ក្រសួងការងារថា មិនបានព្រងើយនឹងរឿងវិវាទណាហ្គាវើលដ៍ឡើយ តែសហជីពថា ជាការដោះសា កម្មករណាហ្គាវើលដ៍តវ៉ានាពេលកន្លងមក។ រូបដោយ វតី
× ភ្នំពេញ៖ ក្រសួងការងារ និងបណ្ដុះបណ្ដាលវិជ្ជាជីវៈ អះអាងថា វិវាទណាហ្គាវើលដ៍ រ៉ាំរ៉ៃនេះ ដោយសារភាគីទាំងពីរ ពុំមានឆន្ទៈអនុវត្តតាមនីតិវិធី ពោលគឺមិនមែនក្រសួងព្រងើយកន្តើយទេ។ ប៉ុន្តែ កញ្ញា ឈឹម ស៊ីថរ មេសហជីពកម្មករណាហ្គាវើលដ៍ថា ក្រសួងយកលេសបែបនេះ ដើម្បីរួចខ្លួន។
គិតត្រឹមថ្ងៃទី១តុលា កម្មករណាហ្គាវើលដ៍ដែលមានវិវាទជាមួយក្រុមហ៊ុន មាន២៤៤នាក់ហើយ ព្រមទទួលសំណង ក្នុងចំណោមក្រុមកម្មករតវ៉ានាពេលកន្លងមក។ ដូច្នេះ សព្វថ្ងៃនៅសល់កម្មករ១២៩នាក់ទៀត ពុំព្រមទទួលសំណង ក្នុងករណីដែលក្រុមហ៊ុនបញ្ឈប់បុគ្គលិកជាង១ពាន់នាក់កាលអំឡុងខែមេសា ឆ្នាំ២០២១។ នេះបើតាមសេចក្ដីបំភ្លឺរបស់ក្រសួងការងារ។
ក្នុងលិខិតបកស្រាយរបស់ក្រសួងបានបញ្ជាក់យ៉ាងដូច្នេះ៖ «ចំពោះបញ្ហាដែលជាប់គាំងកន្លងនេះ គឺមិនមែនជាការព្រងើយកន្តើយរបស់ក្រសួងឡើយ…។ ការជាប់គាំង គឺដោយសារតែគូភាគីវិវាទមិនមានឆន្ទៈក្នុងការអនុវត្តនីតិវិធីដោះស្រាយវិវាទ ការងាររួមឲ្យត្រឹមត្រូវ…»។
វិវាទការងារជិត១ឆ្នាំមកនេះ ក្រសួងការងារបានរុញឲ្យពួកគេប្ដឹងទៅតុលាការ សម្រាប់នីតិវិធីបន្ទាប់។
ករណីនេះ កញ្ញា ឈឹម ស៊ីថរ យល់ថាមិនមែនជារឿងថ្មីឡើយ ដែលក្រសួងបរាជ័យក្នុងការអនុវត្តច្បាប់ ពិសេសសិទ្ធិសហជីព ទើបក្រសួងបកស្រាយយករួចខ្លួន។ កញ្ញា សង្កត់ធ្ងន់ថា ក្រសួងបានចោទភាគីវិវាទ ពុំគោរពតាមការអនុវត្តច្បាប់ គឺខុសការពិត ខណៈក្រសួងពុំបានបំពេញតួនាទីឱ្យបានត្រឹមត្រូវ។
«ក្រសួងអ្នកមានតួនាទីក្នុងការ ស្របសម្រួលជាអ្នកពិនិត្យមើលថាក្រុមហ៊ុនគោរពច្បាប់ឬអត់ ប៉ុន្តែបែរជា មកចោទថា ភាគីវិវាទអត់គោលរពនីតិវិធី ហើយជារឿយៗចោលកម្មករសព្វគ្រប់បែបយ៉ាងវិញ»។ នេះបើតាមកញ្ញា ឈឹម ស៊ីថរ ប្រាប់សារព័ត៌មានថ្មីៗតាមប្រព័ន្ធតេឡេក្រាម។
សូមរម្លឹកថា អតីតបុគ្គលិកណាហ្កាវើលដ៍ បាននាំគ្នាចេញតវ៉ាជិត៩ខែហើយ ចាប់តាំងពីចុងឆ្នាំ២០២១មក។ ពួកគេ ទាមទារឲ្យក្រុមហ៊ុនទទួលយកអ្នកដែលត្រូវបានបញ្ឈប់ពីការងារ ចូលធ្វើការងារវិញ។ យ៉ាងណា ការតវ៉ានេះ ពុំទទួលបានផ្លែផ្កាឡើយ ហើយថែមទាំងមានការចាប់ខ្លួនក្រុមអ្នកតវ៉ាជាបន្តបន្ទាប់។ ប៉ុន្តែក្រោយមកក៏ដោះលែងវិញ៕
Tag:
វិវាទការងារ
ណាហ្គាវើលដ៍
© រក្សាសិទ្ធិដោយ thmeythmey.com